Nation News Daily

កម្ពុជាលុបចោលបម្រាមការផ្សាយមុនពេលបោះឆ្នោតជាតិ

វ៉ាស៊ីនតោន — រដ្ឋាភិបាលកម្ពុជាបានអនុញ្ញាតជាថ្មីឱ្យមានការផ្សាយបន្តតាមស្ថានីយវិទ្យុអេហ្វអឹមក្នុងស្រុកនូវកម្មវិធីរបស់វិទ្យុបរទេសផ្សាយជាភាសាខ្មែរដែលមានដូចជាវិទ្យុវីអូអេនិងវិទ្យុអាស៊ីសេរី បន្ទាប់ពីមានការជំទាស់យ៉ាងខ្លាំងក្លាពីសហរដ្ឋអាមេរិកនិងសហគមន៍អន្តរជាតិ។

នេះជាការសម្រេចដែលបញ្ច្រាសទៅនឹងការហាមឃាត់ដែលបានចេញកាលពីប៉ុន្មានថ្ងៃមុនដែលដាក់បម្រាមចំនួន៣១ថ្ងៃសម្រាប់អំឡុងពេលឃោសនាបោះឆ្នោតនិងថ្ងៃបោះឆ្នោត។

នៅក្នុងសេចក្តីប្រកាសព័ត៌មានមួយដែលបានផ្សាយតាមទូរទស្សន៍ជាតិកម្ពុជានៅយប់ថ្ងៃសៅរ៍បានបញ្ចាក់ថា៖ «យោងតាមសំណូមពរសុំឱ្យក្រសួងព័ត៌មានអនុញ្ញាតឱ្យមានការចាក់ផ្សាយឡើងវិញនូវការផ្សាយបន្តរបស់វិទ្យុបរទេសជាខេមរភាសាតាមរយៈវិទ្យុអេហ្វអឹមក្នុងស្រុក ក្រសួងព័ត៌មានសម្រេចអនុញ្ញាតឱ្យវិទ្យុអេហ្វអឹមទាំងអស់ដែលជួលម៉ោងផ្សាយបន្តឱ្យស្ថានីយវិទ្យុបរទេសបន្តការផ្សព្វផ្សាយតាមធម្មតាដូចដើមឡើងវិញចាប់ពីពេលនេះតទៅ»។

សេចក្តីប្រកាសនោះក៏បន្ថែមទៀតថា សេចក្តីណែនាំចុះថ្ងៃទី២១ខែមិថុនារបស់លោកខៀវ កាញារិទ្ធរដ្ឋមន្ត្រីក្រសួងព័ត៌មានគឺនៅមានសុពលភាពដដែល។

«ទន្ទឹមនឹងនេះ ក្រសួងព័ត៌មានសូមឱ្យប្រព័ន្ធផ្សព្វផ្សាយព័ត៌មានទាំងអស់ត្រូវយកចិត្តអនុវត្តតាមសេចក្តីណែនាំរបស់ក្រសួងព័ត៌មានលេខ០៤ពមសណន ចុះថ្ងៃទី២១ខែមិថុនាឆ្នាំ២០១៣ដែលចុះហត្ថលេខាដោយឯកឧត្តមខៀវ កាញារិទ្ធ រដ្ឋមន្ត្រីក្រសួងព័ត៌មាន»។

នៅក្នុងសេចក្តីណែនាំរបស់លោក ខៀវ កាញារិទ្ធ បានប្រាប់គ្រប់បណ្តាញឃោសនាឱ្យ«បញ្ឈប់ការផ្សព្វផ្សាយនិងការផ្សាយបន្តពីវិទ្យុបរទេសទាំងអស់ ពីការស្ទង់មតិ លទ្ធផលនៃការស្ទង់មតិដែលទាក់ទងនឹងដំណើរការបោះឆ្នោតក្នុងរយៈពេល៥ថ្ងៃមុនថ្ងៃបោះឆ្នោតនិងថ្ងៃបោះឆ្នោត រួមទាំងបញ្ឈប់ការផ្សព្វផ្សាយពីសកម្មភាពឃោសនាអ្វីទាំងអស់អំឡុងពេល២៤ម៉ោងមុនថ្ងៃបោះឆ្នោតនិងថ្ងៃបោះឆ្នោត»។

ការផ្សាយរបស់វីអូអេត្រូវបានដកចេញពីស្ថានីយដៃគូក្នុងស្រុករបស់ខ្លួនដែលមានវិទ្យុសំបុកឃ្មុំអេហ្វអឹម១០៥ វិទ្យុរបស់មណ្ឌលព័ត៌មានស្រ្តីអេហ្វអឹម១០២ និងអង្គររដ្ឋាអេហ្វអឹម៩៥,៥នៅថ្ងៃសុក្រនិងថ្ងៃសៅរ៍បន្ទាប់ពីមានលិខិតមួយចុះថ្ងៃទី២៥ខែមិថុនាដោយលោកអ៊ុក ប្រាថ្នា រដ្ឋមន្ត្រីស្តីទីនៃក្រសួងព័ត៌មានបញ្ជាមិនឱ្យស្ថានីយទាំងនោះបន្តផ្សាយលើរលកធាតុអាកាសរបស់ខ្លួនហើយគំរាមថាបើមិនអនុវត្តតាមអាចប្រឈមមុខនឹងវិធានការតាមផ្លូវច្បាប់។

លិខិតនោះត្រូវស្ថានីយវិទ្យុអេហ្វអឹមក្នុងស្រុកនានាទទួលបានយ៉ាងតក់ក្រហល់នៅរសៀលថ្ងៃសុក្រទី២៨ខែមិថុនា ហើយម្ចាស់ស្ថានីយបានបង្ខំចិត្តផ្អាកការផ្សាយបើទោះបីជាត្រូវប្រឈមមុខនឹងកង្វះកម្មវិធីដែលត្រូវមកបំពេញម៉ោងនោះ។

អ្នកប្រើប្រាស់បណ្តាញសង្គមខ្មែរមានប្រតិកម្មរិះគន់ភ្លាមៗនៅលើទំព័រ Facebook របស់វីអូអេ ទៅនឹងព័ត៌មាននៃបម្រាមរបស់ក្រសួងព័ត៌មាន។ (២៩ មិថុនា ២០១៣)

ការហាមឃាត់នោះបាននាំឱ្យមានការតវ៉ានិងថ្កោលទោសពីសហគមន៍អន្តរជាតិ ក្រុមការពារសិទ្ធិមនុស្ស អ្នកស្តាប់វិទ្យុនិងអ្នកដែលប្រើប្រាស់បណ្តាញសង្គមហ្វេសប៊ុក (Facebook) ជាដើម រហូតដល់មានការប្រកាសធ្វើយុទ្ធនាការតាមប្រព័ន្ធហ្វេសប៊ុកអំពាវនាសុំមិនឱ្យបោះឆ្នោតឱ្យគណបក្សកាន់អំណាចបើសិទ្ធិសេរីភាពជាមូលដ្ឋានរបស់ពួកគេត្រូវបានដកហូតតាំងពីមុនពេលការបោះឆ្នោតមកដល់។

កាលពីថ្ងៃសុក្រ សហរដ្ឋអាមេរិកបានថ្កោលទោសប្រទេសកម្ពុជាក្នុងការហាមប្រាមមិនឱ្យផ្សព្វផ្សាយបន្តកម្មវិធីវិទ្យុបរទេសនៅតាមស្ថានីយអេហ្វអឹមក្នុងពេលយុទ្ធនាការបោះឆ្នោតថាជាការរំលោភធ្ងន់ធ្ងរនឹងសេរីភាពសារព័ត៌មាននិងសេរីភាពបញ្ចេញមតិធ្ងន់ធ្ងរ ហើយបានព្រមានថា ចំណាត់ការនេះនឹងនាំឱ្យការបោះឆ្នោតនេះមិនមានលក្ខណៈគួរឱ្យជឿទុកចិត្តបាន។

ក្រសួងការបរទេសសហរដ្ឋអាមេរិកក៏បានទទូចឱ្យរដ្ឋាភិបាលកម្ពុជាពិចារណាឡើងវិញនូវការសម្រេចចិត្តរបស់ខ្លួន។

លោក Patrick Ventrell អ្នកនាំពាក្យក្រសួងការបរទេសបានប្រាប់ក្រុមអ្នកសារព័ត៌មានថា៖ «ក្នុងខណៈពេលដែលមន្ត្រីរាជរដ្ឋាភិបាលកម្ពុជានៅកម្រិតកំពូលបានសម្តែងជាសាធារណៈនូវចេតនាក្នុងការរៀបចំការបោះឆ្នោតមួយដែលសេរីនិងយុត្តិធម៌ ការរឹតត្បិតសារព័ត៌មាននេះនិងការខិតខំប្រឹងប្រែងដទៃទៀតក្នុងការកំហិតសេរីភាពនៃការបញ្ចេញមតិធ្វើឱ្យមានការសង្ស័យដល់ចេតនានិងភាពគួរឱ្យជឿទុកចិត្តបាននៃដំណើរការរៀបចំការបោះឆ្នោតនេះ»។

ព័ត៌មានពីការហាមឃាត់នោះបានត្រូវផ្សព្វផ្សាយយ៉ាងរហ័សដោយសារតែបណ្តាញផ្សព្វផ្សាយឯករាជ្យដែលមានតែពីរបីសម្រាប់កម្ពុជាបានប្រឈមមុខនឹងការបំបិទមាត់ក្នុងពេលដែលកម្ពុជាកំពុងធ្វើការឃោសនាបោះឆ្នោតដ៏សំខាន់មួយ។

គណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន និងអ្នកគាំទ្ររបស់លោកគ្រប់គ្រងបណ្តាញផ្សព្វផ្សាយដែលមានវិទ្យុនិងទូរទស្សន៍ស្ទើរតែទាំងអស់ក្នុងប្រទេស។

ការបោះឆ្នោតជ្រើសរើសតំណាងរាស្ត្រអណត្តិទី៥នឹងប្រព្រឹត្តទៅនៅ ថ្ងៃទី២៨ខែកក្កដាខាងមុខនេះហើយការឃោសនាបានចាប់ផ្តើមកាលពីថ្ងៃទី២៧ខែមិថុនាមក។ មានគណបក្សនយោបាយចំនួន៨បានចុះឈ្មោះចូលរួមការបោះឆ្នោតនេះប៉ុន្តែគេសង្កេតឃើញមានតែគណបក្សពីរប៉ុណ្ណោះដែលមានសំទុះខ្លាំងជាងគេគឺគណបក្សប្រជាជនកម្ពុជានិងគណបក្សសង្គ្រោះជាតិរបស់លោកសម រង្ស៊ីនិងលោកកឹមសុខា។

លោក ស្ទីវ រ៉េដឌីស (Steve Redish) និពន្ធនាយករបស់វីអូអេបានថ្កោលទោសចំពោះកិច្ចខិតខំប្រឹងប្រែងណាមួយក្នុងការបំបិតមាត់សារព័ត៌មាន។

លោករ៉េដឌីសបានបន្ថែមថា ដំណឹងនិងព័ត៌មានដែលមានតុល្យភាពត្រឹមត្រូវនិងគួរឱ្យទុកចិត្តបានគឺមានសារៈសំខាន់ណាស់ដែលត្រូវការជាចាំបាច់នៅមុនការបោះឆ្នោត។

លោកបានបន្ថែមថា៖ «ការសម្រេចដកកម្មវិធីរបស់វីអូអេចេញពីស្ថានីយអេហ្វអឹមក្នុងប្រទេសកម្ពុជាគឺជាការដកហូតនូវសិទ្ធិរបស់អ្នកស្តាប់មិនឱ្យដឹងនូវព័ត៌មាននិងដំណឹងដ៏សំខាន់នៅមុនពេលការបោះឆ្នោតជាតិនៅថ្ងៃទី២៨ខែកក្កដា»។

រីឯគណៈអភិបាលផ្នែកការផ្សាយវិញដែលជាស្ថាប័នគ្រប់គ្រងរបស់វិទ្យុវីអូអេនិងអាស៊ីសេរី កាលពីថ្ងៃសុក្រក៏បានថ្កោលទោសការហាមប្រាមនោះដែរហើយក៏បានដាក់ចេញ វិធានការបន្ទាន់ភ្លាមៗក្នុងការបន្ថែមរលកធាតុអាកាសផ្សាយ។

លោកវិកទ័រ អែស (Victor Ashe) ដែលជាអភិបាលមួយរូបបានបញ្ជាក់ថា៖
«ការបដិសេធចោលនូវសិទ្ធិពលរដ្ឋក្នុងការទទួលបានដំណឹងនិងព័ត៌មានក្នុងពេលដ៏សំខាន់នេះគឺជាការប្រមាថដល់ភាពស្របច្បាប់របស់ខ្លួនឯងនិងជាការបដិសេធចោលដោយអត់អៀនខ្មាស់នូវលទ្ធិប្រជាធិបតេយ្យដែលកម្ពុជាខ្លួនឯងជាអ្នកសម្រេចយក»។

លោកអភិបាលវិកទ័រ អែស បានបន្ថែមថាពេលដែលលោកទៅទស្សនកិច្ចប្រទេសកម្ពុជាក្នុងខែឧសភាកន្លងមក លោកបានជួបជាមួយថ្នាក់ដឹកនាំខាងអង្គការសង្គមស៊ីវិលនិងបណ្តាញព័ត៌មាន ហើយលោកបានដឹងថា តើអ្នកទាំងនោះពឹងផ្អែកលើការផ្សាយរបស់វីអូអេនិងអាស៊ីសេរីយ៉ាងណា។

ទោះជាយ៉ាងណាក៏ដោយ ក៏គណៈកម្មាធិការជាតិរៀបចំការបោះឆ្នោត (គជប) យល់ថា ពលរដ្ឋនៅតែអាចទទួលព័ត៌មានតាមប្រភពផ្សេងៗបានហើយការហាមឃាត់មិនប៉ះពាល់ដល់លទ្ធផលឆ្នោតទេ។

លោក ទេព នីថា អគ្គលេខាធិការនៃគជបបានបញ្ជាក់ប្រាប់វីអូអេនៅយប់ថ្ងៃសៅរ៍មុនពេលដែលមានសេចក្តីសម្រេចរបស់ក្រសួងព័ត៌មានថា៖ «ខ្ញុំគិតថាមិនមែនជាមូលហេតុប៉ុណ្ណឹងដែលអាចវាយតម្លៃការទទួលព័ត៌មានអំពីអ្នកបោះឆ្នោតនៅប្រទេសកម្ពុជាថាខ្វះខាតនោះទេ ព្រោះថាប្រព័ន្ធផ្សព្វផ្សាយក្នុងស្រុកក៏មានច្រើនដែរ ហើយម៉្យាងទៀតការផ្សព្វផ្សាយពីបរទេសគាត់មានគោលនយោបាយរបស់គាត់ដោយឡែកអញ្ចឹងទេអាចមួយចំណែកនោះវាប៉ះពាល់ដល់គណបក្សនយោបាយដែលកំពុងប្រកួតប្រជែងដែលកំពុងធ្វើការឃោសនានៅប្រទេសកម្ពុជា»។

លោកម៉ម សុណង់ដូនាយកវិទ្យុសំបុកឃ្មុំអេហ្វអឹម១០៥បានប្រាប់វីអូអេថាលោកបានដឹងពីការប្រកាសលើកលែងបម្រាមរបស់រដ្ឋាភិបាលហើយ ហើយលោកនឹងដាក់ផ្សាយកម្មវិធីរបស់វីអូអេឡើងវិញដូចធម្មតា៕

សចេក្តីណែនាំរបស់ក្រសួងព័ត៌មានឲ្យម្ចាស់ស្ថានីយវិទ្យុអេហ្វអឹមក្នុងស្រុកផ្អាកការផ្សាយកម្មវិធីបន្តពីវិទ្យុបរទេស។

ប្រភពព័ត៌មានពី៖ VOA

ជម្លោះដីធ្លី ពត័មានជាតិ

អ្នកបឹងកក់៖ ក្រសួងព័ត៌មានបំបិទសិទ្ធិនិងសំឡេងអ្នករងគ្រោះ

at 10:50 PM No comments:

ប្រជាពលរដ្ឋដែលនិយមតាមដានស្ដាប់វិទ្យុអន្តរជាតិផ្សាយជាខេមរភាសាកាន់តែច្រើនឡើង បានប្រតិកម្មចំពោះក្រសួងព័ត៌មាន និងរាជរដ្ឋាភិបាល ថាបានបំបិទសិទ្ធិសេរីភាពក្នុងការទទួលព័ត៌មាន និងរំលោភច្បាប់រដ្ឋធម្មនុញ្ញដែលជាច្បាប់កំពូលរបស់កម្ពុជា។

ប្រជាពលរដ្ឋបានហៅសេចក្ដីណែនាំរបស់ក្រសួងព័ត៌មាន ដែលបានហាមមិនឲ្យវិទ្យុអែហ្វអឹម (FM) ក្នុងស្រុកផ្សាយបន្តកម្មវិធីព័ត៌មានជាភាសាខ្មែររបស់វិទ្យុបរទេស ថារឹតត្បិតសិទ្ធិសេរីភាពរបស់ពលរដ្ឋក្នុងការទទួលព័ត៌មានធ្ងន់ធ្ងរ ហើយទាមទារឲ្យមានការដោះស្រាយបញ្ហានេះជាបន្ទាន់។

ប្រជាពលរដ្ឋរស់នៅតំបន់បឹងកក់ មានគម្រោងជួបជុំគ្នាហែញត្តិតវ៉ាទៅក្រសួងព័ត៌មាន ទាក់ទងជាមួយការហាមវិទ្យុអែហ្វអឹម ក្នុងស្រុកផ្សាយបន្តវិទ្យុបរទេសដែលផ្សាយជាខេមរភាសា ក្នុងឱកាសយុទ្ធនាការឃោសនាបោះឆ្នោត ៣១ថ្ងៃ និងក្នុងថ្ងៃបោះឆ្នោត។

សកម្មជនការពារដីធ្លីនៅតំបន់បឹងកក់ អ្នកស្រី ទេព វន្នី មានប្រសាសន៍ថា គ្រួសារអ្នកស្រី និងអ្នកភូមិបឹងកក់ ដែលរងផលប៉ះពាល់ពីការបណ្ដេញចេញដោយបង្ខំ នឹងត្រូវបាត់សំឡេងតវ៉ាពីការរំលោភ និងជិះជាន់ពីអ្នកមានលុយ និងមានអំណាច៖ «ជាពិសេស គឺវិទ្យុអាស៊ីសេរី ហ្នឹង គឺជាវិទ្យុឯករាជ និងផ្ដល់ព័ត៌មានដែលពិតៗ និងយុត្តិធម៌»។

អ្នកស្រីបន្តថា ក្រុមអ្នកភូមិ និងសហគមន៍ដែលរងផលប៉ះពាល់ពីការបណ្ដេញចេញ មានគម្រោងជួបប្រជុំគ្នា ដើម្បីធ្វើការតវ៉ា និងដង្ហែញត្តិទៅមុខក្រសួងព័ត៌មាន ដើម្បីសុំឲ្យក្រសួងបើកការផ្សាយបន្តវិទ្យុអន្តរជាតិ ដូចជាវិទ្យុសំឡេងសហរដ្ឋអាមេរិក និងវិទ្យុអាស៊ីសេរី ឡើងវិញ។

ស្រដៀងគ្នានេះដែរ តំណាងសហគមន៍បុរីកីឡា អ្នកស្រី ឆាយ គឹមហ៊ន មានប្រសាសន៍ថា ប្រសិនបើក្រសួងបិទការផ្សាយបន្ត គួរណាស់តែបិទវិទ្យុក្នុងស្រុកដែរ ព្រោះវិទ្យុក្នុងស្រុកភាគច្រើនមិនដែលបានផ្សាយពីទុក្ខលំបាក និងវិនាសខ្លោចផ្សារបស់ប្រជាពលរដ្ឋនោះទេ៖ «ដល់អីចឹង ប្រសិនបើអត់ពីពីរហ្នឹងទៀត ពួកខ្ញុំចប់ហើយ ដូចផ្ដាច់ជីវិតពួកខ្ញុំចោលហ្មង និយាយទៅណា៎អានេះចំពោះអ្នកដែលពួកខ្ញុំកំពុងតែរងគ្រោះកំពុងប្រឈមមុខណាបង»។

ក្រុមអាជីវករ អ្នករត់ម៉ូតូឌុប អ្នកលក់ដូង និងទឹកសុទ្ធនៅតាមដងផ្លូវនានាក្នុងរាជធានីភ្នំពេញ ស្នើសុំក្រសួងព័ត៌មាន និងរាជរដ្ឋាភិបាល អនុញ្ញាតឲ្យវិទ្យុអែហ្វអឹម ក្នុងស្រុកទាំងអស់បានផ្សាយបន្តនូវកម្មវិធីវិទ្យុអន្តរជាតិឯករាជ្យឡើងវិញជាបន្ទាន់៖ «សំណូមពរឲ្យរដ្ឋាភិបាលហ្នឹង បើកវិទ្យុអាស៊ីសេរី វិទ្យុវីអូអេ (VOA) ហ្នឹង ឡើងវិញ កុំធ្វើបាបប្រជាជនអួតខ្លួនឯងថាខ្លួនប្រជាធិបតេយ្យ ហើយមកបិទសិទ្ធិប្រជាជនអីចឹង អត់ត្រឹមត្រូវទេ។ វាអាចមានផលប៉ះពាល់បានគេឲ្យផ្អាកផ្សាយបើអត់បញ្ហា គេមិនអាចឲ្យផ្អាកបានទេ យល់ឃើញថាអីចឹងណា៎។ យី! ចង់ឲ្យបើកស្អែកហ្នឹង ព្រោះមនុស្សត្រូវការស្ដាប់ព័ត៌មានដូចបាយទឹកយើងត្រូវហូបអីចឹង ដល់ម៉ោងឲ្យតែដល់ម៉ោងរត់ទៅ ខ្ញុំរត់ម៉ូតូឌុបក៏ដោយ តែដល់ម៉ោងខ្ញុំរត់ទៅស្ដាប់អាស៊ីសេរី ហើយ»។

ប្រជាពលរដ្ឋម្នាក់រស់នៅសង្កាត់ចោមចៅ រាជធានីភ្នំពេញ ឈ្មោះ ដេ ប៉ូ មានប្រសាសន៍ថា រូបលោក និងប្រជាពលរដ្ឋនៅក្នុងមូលដ្ឋានជាច្រើននាក់ មានការហួសចិត្តចំពោះក្រសួងព័ត៌មាន ដែលបានផ្អាកការផ្សាយបន្តកម្មវិធីវិទ្យុបរទេសជាខេមរភាសាតាមវិទ្យុអែហ្វអឹម ក្នុងស្រុកនេះ។ លោកបន្តថា ប្រជាពលរដ្ឋបាត់ឱកាសក្នុងការទទួលព័ត៌មាន និងរឿងរ៉ាវសំខាន់ៗដែលកើតឡើងក្នុងអំឡុងពេលយុទ្ធនាការឃោសនាបោះឆ្នោត៖ «ខ្ញុំជាប្រជាពលរដ្ឋមានសិទ្ធិគ្រប់គ្រាន់ក្នុងការទទួលព័ត៌មាន ខ្ញុំមានសម្បត្តិរដ្ឋធម្មនុញ្ញព្រះរាជាណាចក្រកម្ពុជា ដែរ ហេតុអីបានជាប្រជាពលរដ្ឋមិនអាចទទួលព័ត៌មានទាំងអស់នេះបាន ហើយសុខៗបែរទៅបិទវិទ្យុ»។

ក្រសួងព័ត៌មាន កាលពីល្ងាចថ្ងៃទី២៥ មិថុនា ឆ្នាំ២០១៣ បានចេញសេចក្ដីណែនាំមួយ ប៉ុន្តែលិខិតនោះបានផ្សព្វផ្សាយជាសាធារណៈនៅថ្ងៃទី២៨ មិថុនា ដោយបានណែនាំដល់ស្ថានីយវិទ្យុអែហ្វអឹម ក្នុងស្រុកទាំងអស់ត្រូវផ្អាកការផ្សាយបន្តកម្មវិធីវិទ្យុបរទេសជាខេមរភាសា ក្នុងអំឡុងពេលយុទ្ធនាការបោះឆ្នោតរយៈពេល ៣១ថ្ងៃ និងក្នុងថ្ងៃបោះឆ្នោត៕

___________________
ប្រភពព័ត៌មានពី៖ អាស៊ីសេរី

ជម្លោះដីធ្លី ពត័មានជាតិ សង្គម

ពលរដ្ឋមានជម្លោះដីសុំឲ្យនាយករដ្ឋមន្ត្រីជួយ

at 9:15 AM No comments:

ព្រះ សីហនុៈ ពលរដ្ឋក្រុងព្រះសីហនុជាង ១០០គ្រួសារ បានអង្វរប្រមុខរដ្ឋាភិបាលឲ្យជួយអន្តរាគមន៍ ករណីជម្លោះដីធ្លីដែលពួកគាត់បានចោទថា ត្រូវបានមន្ត្រីមានអំណាចឃុបឃិតគ្នាធ្វើប្លង់ដីនិងប្រើហិង្សា ឈូសឆាយបណ្តេញគាត់ចេញពីលំនៅឋាន។

លោក ឈុន សារឿនអាយុ ៥១ឆ្នាំ ជាតំណាងប្រជាពលរដ្ឋ ចំនួន១០៤គ្រួសារក្នុងភូមិ ៣ សង្កាត់លេខ១ បានធ្វើដំណើរមកកាន់ការិយាល័យកាសែតភ្នំពេញ ប៉ុស្តិ៍កាលពីម្សិលមិញហើយបានប្រគល់ឯកសារពាក់ព័ន្ធទំនាស់ដីធ្លី ចំនួន ៤៦ ទំព័រនិងរូបថត១៣៦សន្លឹក។ រូបថតទាំងនេះបានបង្ហាញពីសកម្មភាពឈូសឆាយ និងរុះរើលំនៅឋានរបស់ពលរដ្ឋកាលពីពេលកន្លងមក។ លោក សារឿន អះអាងថា ពលរដ្ឋបានរស់នៅលើផ្ទៃដីទំហំ ៥ហិកតា និង៣អា តាំងពីឆ្នាំ១៩៩៤ ដោយសុខសាន្ត។ ប៉ុន្តែនៅឆ្នាំ ២០០៥ ស្រាប់តែមានមន្ត្រីកំពង់ផែ និងមេបញ្ជាការរងយោធាខេត្តព្រះសីហនុ បានដាក់ពាក្យបណ្តឹងប្តឹងប្រជាពលរដ្ឋចោទថា បានចូលរស់នៅនិងកាន់កាប់ដោយខុសច្បាប់លើដីរបស់ពួកគេ។

តុលាការខេត្តនិងកំពូលបានកាត់ឲ្យប្រជាពលរដ្ឋចាញ់ដោយកំបាំងមុខ ដោយសំអាងលើប្លង់ដីដែលពួកគេបានធ្វើដោយស្ងាត់ៗ។ លោកបន្តថា៖«ពួកគេបានឃុបឃិតគ្នាលួចធ្វើប្លង់កម្មសិទ្ធិដោយមិន មានអាជ្ញាធរមូលដ្ឋានដឹងឮទេហើយបានយកកម្លាំងប្រហែល២០០នាក់និង គ្រឿងចក្រឈូសបំផ្លាញផ្ទះអស់គ្មានសល់»។បន្ទាប់ពីឈូសនិង បណ្តេញពលរដ្ឋចេញទាំងកម្រោលកាលពីឆ្នាំ ២០១១ នោះ ពួកគេបានធ្វើរបងព័ទ្ធដីនោះ ហើយសព្វថ្ងៃនេះមាននគរបាលមួយគ្រួសារបានរស់នៅយាមកាមលើដីនោះ។

ក្នុងនាមតំណាងប្រជាពលរដ្ឋទាំង១០៤គ្រួសារដែលកំពុងសុំដីនិង ផ្ទះគេជ្រកកោន លោកសារឿនបានអំពាវនាវសុំឲ្យប្រមុខរដ្ឋាភិបាលលោកហ៊ុន សែនជួយអន្តរាគមន៍បានរស់នៅនិងកាន់កាប់ដីនោះដូចដើមវិញ។

យោងតាមឯកសារដីទំនាស់នោះត្រូវបានជនជាតិសិង្ហបុរីម្នាក់ឈ្មោះ ទៀវ ប៊ីសេង ស្នាក់នៅបណ្តោះអាសន្នក្នុងខណ្ឌដូនពេញ រាជធានីភ្នំពេញ បានលក់ទៅឲ្យមន្រ្តីកំពង់ផែនៅក្នុងតម្លៃ១៧ម៉ឺនដុល្លារដោយមានការ ផ្ទេរប្លង់ដីកម្មសិទ្ធិផងដែរ។ ប៉ុន្តែពលរដ្ឋថា មិនមានអ្នកឈ្មោះប៊ីសេងនោះទេ។ វាគ្រាន់តែជាការប្រឌិតឈ្មោះប៉ុណ្ណោះហើយអាជ្ញាធរខណ្ឌដូនពេញក៏ បញ្ជាក់ក្នុងលិខិតថា មិនដែលឃើញឈ្មោះប៊ីសេងនោះដែរ។ ម្យ៉ាងទៀតមេភូមិ ៣ ក៏ថា មិនមានឈ្មោះ ប៊ីសេងកាន់កាប់ដីនោះដែរ។

លោកឈិត សុផាត ចៅសង្កាត់លេខ១ បានថ្លែងថា ពលរដ្ឋទាំងនេះរស់នៅលើដីឯកជនខុសច្បាប់ដែលមានប្លង់កម្មសិទ្ធិត្រឹមត្រូវ។

លោកបួន ណារិទ្ធិមន្រ្តីសម្របសម្រួលអង្គកាលីកាដូបានឲ្យដឹងថា តុលាការនិងអាជ្ញាធរបានអនុវត្តសាលក្រមបណ្តោះអាសន្នប្រើកម្លាំងទៅ រុះរើផ្ទះនិងបណ្តេញពលរដ្ឋចេញ។ ពលរដ្ឋមួយចំនួនទទួលបានសំណងខ្លះតែខ្លះទៀតមិនព្រមទទួលដោយសារ សំណងមិនសមរម្យ៕

ប្រភពពី ភ្នំពេញ ប៉ុស្តិ៍

all entries politic

គណបក្សនយោបាយធំៗ លើកលែងគណបក្សប្រជាជនកម្ពុជា សន្យាធ្វើឲ្យមានច្បាប់ស្តីពីសិទ្ធិទទួលបានព័ត៌មាន

at 4:13 AM No comments:

ភ្នំពេញ — នៅសល់តែ១ខែមុនការបោះឆ្នោត តំណាងគណបក្សនយោបាយធំៗ លើកលែងតែគណបក្សប្រជាជនកម្ពុជា បានសន្យាធានាឲ្យមានការអនុម័តច្បាប់ស្តីពីការទទួលបានព័ត៌មានដែលគេរង់ចាំជាយូរមកហើយនោះ ប្រសិនបើពួកគេឈ្នះការបោះឆ្នោតនាខែកក្កដាខាងមុខនេះ។

គណបក្សនយោបាយធំៗមួយចំនួនដែលកំពុងប្រកួតប្រជែងគ្នានៅក្នុងការបោះឆ្នោតជាតិនាខែកក្កដាខាងមុខនេះ បានប្តេជ្ញាចិត្តថា នឹងអនុម័តច្បាប់ស្តីពីការទទួលបានព័ត៌មានដែលគេរង់ចាំជាមួយមកហើយនោះ ប្រសិនបើពួកគេឈ្នះឆ្នោត។

លោកគី វណ្ណដារ៉ា គឺជាតំណាងមកពីគណបក្សសង្គ្រោះជាតិ។ លោកបានថ្លែងប្រាប់វីអូអេនៅឯវេទិកានយោបាយមួយដែលរៀបចំដោយអង្គការសង្គមស៊ីវិលកាលពីពេលថ្មីៗនេះនៅក្នុងរាជធានីភ្នំពេញ។

លោកនិយាយថា៖ «យើងតាំងចិត្តថានឹងធ្វើឲ្យចេញ បើយើងធ្វើមិនចេញទេ យើងនាំគ្នាឈប់ទៅ ព្រោះបើគ្រាន់តែច្បាប់ប៉ុណ្ណឹង យើងធ្វើមិនកើត តើយើងនៅដឹកនាំប្រទេសបានការអីទៀត? ដូច្នេះការតាំងចិត្តរបស់គណបក្សសង្គ្រោះជាតិគឺច្បាស់លាស់ណាស់ ព្រោះនេះជារឿងអាយុជីវិតរបស់ប្រជាពលរដ្ឋផង និងរបស់ជាតិយើងទាំងមូលផង»។

ច្បាប់ស្តីពីសិទ្ធិទទួលបានព័ត៌មាននេះនឹងអនុញ្ញាតឲ្យសាធារណជនអាចទទួលបានឯកសារនានាដែលទាក់ទងនឹងការសម្រេចចិត្ត និងសកម្មភាពរបស់រដ្ឋាភិបាល។ តាមរយៈច្បាប់នេះ សារព័ត៌មានក៏នឹងអាចធានាបានផងដែរថា កិច្ចការរបស់រដ្ឋាភិបាលនឹងត្រូវបានដឹងឮដល់មនុស្សគ្រប់គ្នា មិនមែនដឹងត្រឹមតែអ្នកដែលមានបុព្វសិទ្ធិតែប៉ុន្មាននាក់នោះទេ។ ប៉ុន្តែសេចក្តីព្រាងច្បាប់នេះបានជាប់គាំងតាំងពីឆ្នាំ២០០៧មកម៉្លេះ។

លោកទេព នន្ទរី គឺជាតំណាងមកពីគណបក្សហ៊្វុនស៊ិនប៉ិច។

លោកនិយាយថា៖ «ច្បាប់នេះគឺជាគន្លឺះរបស់ប្រជាពលរដ្ឋ។ បើហ៊្វុនស៊ិនប៉ិចឈ្នះ ហ្វ៊ុនស៊ិនប៉ិចនឹងជំរុញច្បាប់ស្តីពីសិទ្ធិទទួលបានព័ត៌មាននេះ ឲ្យចេញ។ បើគណបក្សយើងដោះស្រាយបញ្ហាហ្នឹងមិនចេញ អាណត្តិក្រោយឬក៏អាណត្តិហ្នឹងលាឈប់ក៏ល្អដែរ ព្រោះយើងធ្វើអីអត់ចេញសម្រាប់ប្រជារាស្ត្រ»។

គណបក្សប្រឆាំង សម រង្ស៊ី ធ្លាប់បានជំរុញឲ្យមានការពិភាក្សាច្បាប់នេះចំនួនពីរដងគឺនៅឆ្នាំ២០១០និងនៅឆ្នាំ២០១២ ប៉ុន្តែ ពង្រាងច្បាប់ដែលខ្លួនបានតាក់តែងឡើង ត្រូវបានបដិសេធដោយគ្មានការជជែកដេញដោលគ្នាទាំងពីរដង ដោយរដ្ឋសភាដែលគ្រប់គ្រងដោយគណបក្សប្រជាជានកម្ពុជាដែលកំពុងកាន់អំណាច។

លោកស្រី ម៉ែន សំអន គឺជាឧបនាយករដ្ឋមន្ត្រីម្នាក់ខាងគណបក្សប្រជាជនកម្ពុជានិងជារដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភានិងអធិការកិច្ច។ ក្រសួងនេះ ត្រូវបានរដ្ឋាភិបាលចាត់តាំងឲ្យធ្វើការងារទៅលើគោលនយោបាយស្តីពីសិទ្ធិទទួលបានព័ត៌មាននេះ។

លោកស្រី បានថ្លែងទៅកាន់សន្និសិទថ្នាក់ជាតិមួយស្តីពីសិទ្ធិទទួលបានព័ត៌មាននេះ។

អ្នកស្រីនិយាយថា៖ «បន្ទាប់ពីបានសិទ្ធិក្នុងការទទួលរៀបចំគោលនយោបាយនេះ ក្រសួងបានរៀបចំក្រុមការងារហើយបានចុះកិច្ចព្រមព្រៀងជាមូយអង្គការ PACT ដោយមានការគាំទ្រពីទីភ្នាក់ងារអភិវឌ្ឍអន្តរជាតិ សហរដ្ឋអាមេរិក USAID ដើម្បីបង្កើតរៀបចំគោលនយោបាយស្តីពីសិទ្ធិទទួលបានព័ត៌មាននេះ»។

ប៉ុន្តែ នៅពេលដែលត្រូវក្រុមអ្នកកាសែតសួរថាតើគណបក្សប្រជាជនកម្ពុជា នឹងធានាថានឹងអនុម័តច្បាប់ស្តីពីសិទ្ធិទទួលបានព័ត៌មាននេះដែរឬទេ នៅក្នុងអាណត្តិរដ្ឋាភិបាលថ្មី ប្រសិនបើគណបក្សនេះឈ្នះឆ្នោតនោះ លោកស្រី បានបដិសេធមិនឆ្លើយនឹងសំណួរនេះទេ។

អ្នកស្រីថ្លែងថា៖ «ទុកឲ្យជំនាញគេឆ្លើយចាស៎!»

ក្រុមអ្នករិះគន់និយាយថា ប្រសិនរដ្ឋាភិបាលដែលដឹកនាំដោយគណបក្សប្រជាជនកម្ពុជាចង់អនុម័តច្បាប់នេះ ពួកគេអាចធ្វើបានយ៉ាងស្រួល ដូចក្នុងករណីធ្វើច្បាប់ដែលទើបនឹងអនុម័តកាលពីថ្មីៗនេះប្រឆាំងជនណាដែលបដិសេធឧក្រិដ្ឋកម្មសម័យខ្មែរក្រហមជាដើម។ ច្បាប់ថ្មីនេះចំណាយពេលមិនដល់២សប្តាហ៍ផង ក្នុងការបង្កើតឡើងនោះ។

លោកព្រាប កុលគឺជានាយកប្រតិបត្តិនៃអង្គការតម្លាភាពកម្ពុជា។

លោកនិយាយថា៖ «ចំណុចនេះគឺជាចំណុចដែលយើងទាំងអស់គ្នាចោទជាសំណួរ។ មកពីគាត់មិនឲ្យអាទិភាពទៅលើច្បាប់ហ្នឹង ឬមួយក៏ច្បាប់ហ្នឹងវាអាចមានឥទ្ធិពលទៅលើការគ្រប់គ្រងរដ្ឋ ឬមួយយ៉ាងម៉ិច? អាហ្នឹង ខ្ញុំមិនទាន់ហ៊ានសន្និដ្ឋានជំនួសប្រជាពលរដ្ឋទេ»។

លោកឈិត សំអាតគឺជានាយកប្រតិបត្តិនៃអង្គការវេទិកានៃអង្គការមិនមែនរដ្ឋាភិបាលស្តីពីកម្ពុជា។ លោកមានប្រសាសន៍ថា ការសន្យារបស់គណបក្សនយោបាយថា នឹងធានាឲ្យមានច្បាប់ស្តីពីសិទ្ធិទទួលបានព័ត៌មាននេះ អាចមានឥទ្ធិពលដល់អ្នកបោះឆ្នោតខ្លះដែរ។

លោកនិយាយថា៖ «បើអ្នកដែលយល់ថា ច្បាប់ហ្នឹងមានសារៈសំខាន់ វាអាចប៉ះពាល់ដល់សំឡេងឆ្នោតរបស់គាត់ដែរ ព្រោះថា បើគណបក្សណាមួយដែលមិនប្តេជ្ញាចិត្តធ្វើអាហ្នឹងទេ គឺអាចប៉ះពាល់ដល់ការសម្រេចចិត្តរបស់អ្នកបោះឆ្នោតដល់គណបក្សនីមួយៗ»។

ក្រុមអ្នកវិភាគមួយចំនួនព្រមានថា ប្រសិនបើគណបក្សកាន់អំណាចបច្ចុប្បន្ននៅតែបន្តដឹកនាំរដ្ឋាភិបាលអាណត្តិថ្មី នោះច្បាប់ស្តីពីសិទ្ធិទទួលបានព័ត៌មាននៅតែមិនអាចលេចចេញជារូបរាងបានដដែល៕

ប្រភពពី វីអូអេខ្មែរ

គ្រោះថ្នាក់ចរាចរណ៍នយោបាយ ពត័មានជាតិ

គ្រោះថ្នាក់ចរាចរណ៍បង្ករបួសដល់សកម្មជនគណបក្សប្រជាជននិងគណបក្សសង្គ្រោះជាតិនៅថ្ងៃឃោសនាទីពីរ

at 4:12 AM No comments:

ភ្នំពេញ — យ៉ាងតិចមានសមាជិកដែលគាំទ្រគណបក្សគ្រប់គ្រងអំណាចរបស់លោកនាយករដ្ឋមន្ត្រី ហ៊ុន សែន ចំនួន៦នាក់បានទទួលរងរបួសស្រាលនិងសមាជិកគាំទ្រខាងគណបក្សសង្គ្រោះជាតិរបស់លោក សម រង្ស៊ី ចំនួនម្នាក់បានរងរបួសដោយសារគ្រោះថ្នាក់ចរាចរណ៍នៅកន្លែងពីរដាច់ដោយឡែកៗពីគ្នា។ នេះបើតាមការបញ្ជាក់ពីមន្ត្រីក្រសួងមហាផ្ទៃ។

គ្រោះថ្នាក់ចរាចរណ៍នេះបានកើតមានឡើងក្នុងខណៈពេលដែលសកម្មជនគណបក្សនយោបាយទាំងពីរបានចូលរួមឃោសនារកសំឡេងឆ្នោតឈានដល់ថ្ងៃទីពីរ។ ក៏ប៉ុន្តែពុំបណ្តាលឱ្យឱ្យមានគ្រោះថ្នាក់ដល់អាយុជីវិតទេ។

លោកឧត្តមសេនីយ៍ឯក គៀត ច័ន្ទថារិទ្ធអ្នកនាំពាក្យអគ្គស្នងការនគបាលជាតិបាននិយាយថានៅថ្ងៃដំបូងនៃយុទ្ធនាការឃោសនាបោះឆ្នោតក្បួនរថយន្តរបស់គណបក្សប្រជាជនកម្ពុជានៅឃុំដំណាក់អម្ពិល ស្រុកអង្គស្នួលខេត្តកណ្តាលបានជួបគ្រោះថ្នាក់ចរាចរណ៍ដោយរថយន្តដឹកអ្នកគាំទ្រគណបក្សបានក្រឡាប់។

លោកបានបញ្ជាក់ថាហេតុការណ៍នេះបានបណ្តាលឱ្យមនុស្សចំនួន៦នាក់រងរបួស។ ចំណែកឯនៅក្នុងខេត្តកំពង់ចាមវិញម៉ូតូមួយគ្រឿងដែលបើកបរដោយអ្នកគាំទ្រគណបក្សសង្គ្រោះជាតិបានជួបឧប្បទ្ទវហេតុគ្រោះថ្នាក់ចររាចរណ៍បណ្តាលឱ្យរងរបួសម្នាក់នៅព្រឹកថ្ងៃសុក្រនេះ។

បើទោះបីជាមានគ្រោះថ្នាក់ចរាចរណ៍បានកើតមានឡើងទៅលើក្រុមអ្នកគាំទ្រគណបក្សនយោបាយនៅក្នុងពេលឃោសនាបោះឆ្នោតក៏ដោយក៏លោកគៀត ច័ន្ទថារិទ្ធបានវាយតម្លៃថារយៈពេលពីរថ្ងៃនេះសភាពការណ៍ជារួមបានប្រព្រឹត្តទៅយ៉ាងល្អ។

លោកនិយាយថា៖ «ពីរថ្ងៃកន្លងផុតទៅនេះខ្ញុំវាយតម្លៃថាសភាពការណ៍មិនមានអ្វីកត់សម្គាល់ទេ។ ដំណើរការឃោសនាគ្រប់គណបក្សទាំងអស់បានប្រព្រឹត្តទៅតាមកម្មវិធីរៀងៗខ្លួនដោយរលូនមិនមានបញ្ហាអ្វីទេ»។

មានគណបក្សនយោបាយចំនួន៨ដែលបានចុះបញ្ជីបោះឆ្នោតជ្រើសតាំងតំណាងរាស្រ្តអណត្តិទី៥។ក៏ប៉ុន្តែមានតែគណបក្សធំៗតែបីប៉ុណ្ណោះដែលបានធ្វើសម្មភាពឃោសនារកសំឡេងឆ្នោតលក្ខណៈទ្រង់ទ្រាយធំ។

គណបក្សទាំងបីនោះរួមមានគណបក្សប្រជាជនកម្ពុជាដែលបានត្រួតត្រាប្រទេសអស់រយៈពេលជាង៣០ឆ្នាំ គណបក្សសង្គ្រោះជាតិដែលទើបបង្កើតថ្មីរវាងគណបក្សសិទ្ធិមនុស្សនិងគណបក្សសម រង្ស៊ី និងគណបក្សរាជានិយមហ៊្វុនស៊ិនប៉ិច។

មន្ត្រីជាន់ខ្ពស់គណបក្សប្រជាជនកម្ពុជានៅថ្ងៃសុក្រនេះមិនអាចស្នើសុំដើម្បីសេចក្តីអត្ថាធិប្បាយបានទេអំពីភាពមិនប្រក្រតីក្នុងអំឡុងពេលបោះឆ្នោត។

លោក យឹម សុវណ្ណ អ្នកនាំពាក្យគណបក្សសង្គ្រោះជាតិបាននិយាយថាសកម្មភាពឃោសនារបស់គណបក្សសង្គ្រោះជាតិមិនបានប្រព្រឹត្តទៅដោយរលូនទេ។ លោកបានបញ្ជាក់ថាស្លាកសញ្ញារបស់គណបក្សសង្គ្រោះជាតិនៅខេត្តកណ្តាលត្រូវបានជនមិនស្គាល់មុខហែកចោល។

លោកថ្លែងថា៖ «មានគេហែកស្លាកនៅខេត្តកណ្តាល»។

គណបក្សរាជានិយមហ៊្វុនស៊ិនប៉ិចនៅថ្ងៃសុក្រនេះបានធ្វើយុទ្ធនាការឃោសនារកសំឡេងឆ្នោតយ៉ាងធំនៅក្នុងខេត្តកំពង់ធំ។

លោក ញឹក ប៊ុនឆៃ អគ្គលេខាធិការគណបក្សហ៊្វុនស៊ិនប៉ិចបាននិយាយថាគណបក្សរបស់លោកបានទទួលការស្វាគមន៍យ៉ាងច្រើនពីប្រជាជននៅតាមជនបទ។ លោកបានបញ្ជាក់ថាជាគោលការណ៍គណបក្សបានណែនាំសមាជិកមិនឱ្យប្រព្រឹត្តអំពើហិង្សាទេនៅពេលឃោសនាហើយរយៈពេលពីរថ្ងៃនេះបានប្រព្រឹត្តទៅយ៉ាងល្អ។

លោកឲ្យដឹងថា៖ «មិនមានទេ។ ក្បួនយើងខ្ញុំប៉ះជាមួយបក្សប្រជាជន ប៉ះទាំងសង្គ្រោះជាតិតែយើងខ្ញុំមិនមានការជេរប្រទេចទេ។ គោលនយោបាយអត់មានទៅប៉ះពារអ្វីអ្នកណាទេ»។

យុទ្ធនាការឃោសនារកសំឡេងឆ្នោតរយៈពេលមួយខែនេះយ៉ាងតិចមានកម្លាំងមានសមត្ថកិច្ចប្រមាណ២ម៉ឺននាក់ត្រូវបានដាក់ពង្រាយដើម្បីការពារសុវត្ថិភាពហើយរយៈពេលមួយថ្ងៃនៅថ្ងៃបោះឆ្នោតកម្លាំងមានសមត្ថកិច្ចនឹងកើនឡើងដល់៧ម៉ឺននាក់៕

ប្រភពពី វីអូអេខ្មែរ

ច្បាប់នយោបាយ ពត័មានជាតិ

គណបក្សសង្គ្រោះជាតិ ចេញសេចក្តីថ្លែងការណ៍ ថ្កោលទោស ចំពោះសេចក្តីណែនាំ របស់ក្រសួងព័ត៌មាន

at 4:11 AM No comments:

គណបក្សសង្គ្រោះជាតិ បានចេញសេចក្តីថ្លែងការណ៍ មួយរបស់ខ្លួន កាលពីថ្ងៃទី ២៩ ខែមិថុនា ឆ្នាំ២០១៣ នេះ ដែលក្នុងសេចក្តីថ្លែងការណ៍នោះ បានថ្កោលទោស ចំពោះសេចក្តីណែនាំ របស់ក្រសួងព័ត៌មាន ដែលបានហាម មិនអោយមានការចាក់ផ្សាយ បន្តពីវិទ្យុបរទេស ដែលផ្សាយជាខេមរភាសាទាំងអស់ ។ សូមអានសេចក្តីថ្លែងការណ៍លម្អិតខាងក្រោម៖

ចាប់រំលោភ ពត័មានជាតិ

ដើរកាត់ចំការឪឡឹក ឃើញនាងនៅតែម្នាក់ឯងស្ទុះចូលទៅចាប់រំលោភទាំងកំរោល

at 1:34 AM No comments:

ខេត្តតាកែវ ៖ យុវជនម្នាក់ត្រូវបានសមត្ថកិច្ចចាប់ឃាត់ខ្លួនកាលពីថ្ងៃពុធ ទី១៩ ខែមិថុនា ឆ្នាំ២០១៣ តាមពាក្យបណ្តឹងរបស់បងស្រីជនរងគ្រោះ ដែលបានប្តឹងចោទប្រកាន់យុវជនខាងលើ ថាបានរំលោភសេពសន្ថវៈប្អូនស្រីរបស់ខ្លួនកាលពីថ្ងៃទី១៦ ខែមិថុនា ឆ្នាំ២០១៣ នៅក្នុងខ្ទប់ចាំចម្ការ ស្ថិតក្នុងឃុំបាស្រែ ស្រុកអង្គរបុរី ខណៈពេលដែលជនរងគ្រោះនៅចាំចំការឪឡឹកតែម្នាក់ឯង។

បើតាមប្រភពព័ត៌មានពីសមត្ថកិច្ចបានឲ្យដឹងថា យុវជនល្មោភតណ្ហាខាងលើមានឈ្មោះ វណ្ណី ស៊ីណា អាយុ ២៧ឆ្នាំ ចំណែកជនរងគ្រោះមានឈ្មោះ ហ.អ អាយុ ២៧ឆ្នាំ។ ប្រភពដដែលបានបន្តថា បន្ទាប់ពីទទួលបានពាក្យបណ្តឹងរបស់ក្រុមគ្រួសារជនរងគ្រោះ សមត្ថកិច្ចក៏បានធ្វើការស្រាវជ្រាវចាប់ខ្លួនជនល្មើសដើម្បីយកមកធ្វើសួរចម្លើយ។

បន្ទាប់ពីសមត្ថកិច្ចបានធ្វើការសាកសួររួចមក ជនល្មើសបានសារភាពថា ខ្លួនពិតជាបានប្រព្រឹត្តដូចការចោទប្រកាន់ពិតប្រាកដមែន។ ដោយរូបគេបានបញ្ជាក់ថា កាលពីថ្ងៃទី១៦ ខែមិថុនា ឆ្នាំ២០១៣ ខ្លួនបានឃើញជនរងគ្រោះនៅក្នុងចំការម្នាក់ឯង ស្រាប់តែកើតមានអារម្មណ៍ផ្លូវភេទ ក៏ស្ទុះចូលទៅចាប់រំលោភនារីរងគ្រោះរហូតបានសម្រេច។

សូមចុចអានបន្ត

ប្រភពពី៖ cambodiapage.info

ពត័មានជាតិ សង្គម

តារាវ័យក្មេងសាច់ខ្ចីមានគេចោមស្នេហ៍ច្រើនស្របពេលមិនទាន់ គិតគូរ

at 10:58 PM No comments:

ភ្នំពេញៈ តារាចម្រៀងជើងថ្មីនៅផលិតកម្មភ្លេងរីខតដែលជាសាខាថ្មីរបស់ផលិតកម្មរស្មីហង្សមាស កញ្ញា គៀត សុវណ្ណឡាង បច្ចុប្បន្ននេះនៅមិនទាន់គិតគូរពីរឿងស្នេហានៅឡើយទេ ។ ខណៈមានបុរសជាច្រើនកំពុងតែតាមស្រឡាញ់ ដោយក្នុងនោះក៏មាន បុរសអាណិកជនអូស្ត្រាលីម្នាក់ក៏កំពុងព្យាយាមតាមស្រលាញ់ និងយកធ្វើជាគូរអនាគត ។

មួយរយៈចុងក្រោយនេះ កញ្ញាសាច់សខ្ចីវ័យក្មេង សុវណ្ណឡាង បន្ទាប់ពីបានចេញបទចម្រៀងលក់នៅលើទីផ្សាជាលើកដំបូងត្រូវបានមហាជនមើលឃើញថា ប្រជាប្រិយភាព និងការគាំទ្រហាក់មានសន្ទុះហក់ឡើងក្រឺតៗតែម្តង ។ ជាងនេះទៅទៀតនោះនាងក៏ជាតារាស្រីដែលលេចធ្លោជាងគេផ្នែករូបសម្បត្តិផងដែរ ។

តារាចម្រៀងរាងស្វែលវ័យក្មេង កញ្ញា គៀត សុវណ្ណឡាង បានឲ្យដឹងកាលពីថ្មីៗ នេះថា «រឿងស្នេហាមិនទាន់គិតទេ ព្រោះនៅក្មេងពេកតែ បើខ្ញុំនិយាយប្រាប់ថា គ្មានអ្នកស្រលាញ់ក៏គេមិនជឿដែរ គឺមានច្រើនទាំងនៅក្នុងស្រុក និងក្រៅស្រុក។ ប៉ុន្តែរាល់ថ្ងៃនេះដោយសាខ្ញុំមានការមមាញឹកជាមួយអាជីពរកស៊ីផ្ទាល់ខ្លួន ក៏ដូចជាការងារសិល្បៈដែរនោះគឺខ្ញុំមិនទាន់គិតពីរឿងមានស្នេហានេះនៅឡើយទេ» ។
ទាក់ទិននឹងព័ត៌មានដែលមានបុរសអាណិកជនខ្មែររស់នៅអូស្ត្រាលីកំពុងទាក់ទងជាមួយតារាស្រីវ័យ២១ឆ្នាំ រូបនេះបានបញ្ជាក់ថា អត់មាននោះទេ តែមួយរយៈមុននេះមានអ្នករស់នៅក្រៅស្រុកទាក់ទងមកច្រើនដែរ ប៉ុន្តែមិនដឹងថាបុរសទាំងនោះរស់នៅប្រទេសណាខ្លះនោះទេ ព្រោះថា នាងមិនដែលចាប់អារម្មណ៍ទៅលើរឿងនេះ ។
កញ្ញា គៀត សុវណ្ណឡាង ក៏បានបញ្ជាក់ទៀតថា ចំពោះបុរសដែលនាងជ្រើសរើយយកធ្វើជាគូរអនាគត់នោះ គឺទាល់តែនាងមើលពីចិត្តរបស់គេឱ្យច្បាស់ជាមុនសិន ថាបុរសម្នាក់នោះជាមនុស្សរបៀបណា ? តើគេស្រលាញ់គ្រួសាររបស់នាងទេ និងស្រលាញ់នាងឬអត់? ដូច្នេះមុននឹងនាងទទួលយកបុរសម្នាក់ណាមកធ្វើជាគូរគាប់ទៅថ្ងៃអនាគត់នោះគឺត្រូវរង់ចាំពេលវលាមើលពីចិត្តគ្នាសិន ។
សូមរំលឹកថា កញ្ញា គៀត សុវណ្ណាឡាង ជាកូនកាត់ចិន កើតថ្ងៃទី១០ ខែមេសា ឆ្នាំ១៩៩២ នៅសង្កាត់ទឹកថ្លា ក្នុងរាជធានីភ្នំពេញ។ នាងមានបងប្អូន៤នាក់ (ប្រុស៣ ស្រី១) ដោយនាងគឺជាកូនទី២នៅក្នុងសមាជិកគ្រួសារ។ នាងមានឪពុកឈ្មោះ សុខ ជា ជាអាជីវករលក់គ្រឿងសង្ហារិម និងមានម្ដាយឈ្មោះ ហេង គឹមឡាយ ជាអាជីវករដូចគ្នា។ តាមកម្រិតជីវភាពក្រុមគ្រួសាររបស់នាងគឺជាអ្នកសំបូរប្រាក់ ។
គៀត សុវណ្ណាឡាង ជាបេក្ខនារីមួយរូបក្នុងជុំចុងក្រោយនៃការប្រលង Freshie Girls and Boys ប្រចាំឆ្នាំ២០០៨។ ម្ល៉ោះហើយទើបតារាស្រីរូបនេះមានសំណាងបានក្លាយជាតារាសិល្បៈ ដូចការគ្រោងទុក ។ បើទោះជាការប្រលងកាលនោះមិនទទួលបានលទ្ធផលវិជ្ជមានក្ដី ។ នាងចាប់ផ្ដើមមានមុខមាត់ក្នុងកម្មវិធីសិល្បៈ តែក្នុងរយៈពេលខ្លីប៉ុណ្ណោះ។ នាងល្បីខ្លាំងក្នុងរឿង «ទឹកចិត្តបងស្រី» បន្ទាប់ពីបានដើរតួសំខាន់ក្នុងរឿងនោះ ៕វិរៈ

ប្រភពពី៖ ABC+

ពត័មានជាតិ

ខ្មែរ-ថៃចុះកិច្ចព្រមព្រៀងអភិវឌ្ឍន៍តំបន់ព្រំដែនរួមគ្នា

at 10:49 PM No comments:

កិច្ចប្រជុំគណៈកម្មការចម្រុះរវាងរដ្ឋមន្ត្រីការបរទេសកម្ពុជា-ថៃ លើកទី១ ធ្វើនៅក្រសួងការបរទេសកម្ពុជា រាជធានីភ្នំពេញ ថ្ងៃទី១១ មិថុនា។ ចុចស្តាបសំឡេង

ប្រទេសទាំងពីរបានព្រមព្រៀងអភិវឌ្ឍន៍ខេត្តតាមតំបន់ព្រំដែន និងតភ្ជាប់ពាណិជ្ជកម្មរួមគ្នាក្នុងពេលភាគីទាំងពីរនៅមិនទាន់បានដោះស្រាយជម្លោះនៅក្បែរប្រាសាទព្រះវិហារ លើផ្ទៃដីជាង ៤គីឡូម៉ែត្រក្រឡា ដែលភាគីថៃ ទាមទារថា ជារបស់ខ្លួននៅឡើយ។

ក្នុងជំនួបនោះ លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេសកម្ពុជា មានប្រសាសន៍ថា ភាគីទាំងពីរបានឯកភាព និងព្រមព្រៀងជាមួយគ្នា អភិវឌ្ឍន៍រួមគ្នាលើវិស័យជាច្រើនតាមខេត្តចំនួន ៧ នៅតាមបណ្ដោយព្រំដែនកម្ពុជា-ថៃ។ មានដូចជាវិស័យពាណិជ្ជកម្មថៃ បានព្រមព្រៀងទិញកសិផលពីកម្ពុជា ឬរួមគ្នាបង្កើតតំបន់សេដ្ឋកិច្ចពិសេសតាមខេត្តជាប់ព្រំដែន មានខេត្តកោះកុង ជាដើម។

ក្រៅពីនេះ កម្ពុជា-ថៃ ក៏បានព្រមព្រៀងបើកច្រកព្រំដែនថ្មី តាមខេត្តជាប់ព្រំដែនបន្ថែមទៀត ដើម្បីបម្រើសេវាដឹកជញ្ជូនទំនិញ សម្រួលដល់ការធ្វើពាណិជ្ជកម្មរវាងប្រជាពលរដ្ឋ ឬអ្នកជំនួញប្រទេសទាំងពីរថែមទៀត។

តាមរយៈកិច្ចប្រជុំនេះ លោក ហោ ណាំហុង បញ្ជាក់ថា ភាគីថៃ ក៏ត្រៀមផ្ដល់ជំនួយដល់កម្ពុជា សម្រាប់ពង្រីក ឬស្ថាបនាផ្លូវជាតិតាមខេត្តជាប់ព្រំដែន មានខេត្តកោះកុង ជាដើម។ អភិវឌ្ឍន៍វិស័យសុខាភិបាល និងអគ្គិសនីឲ្យបានច្រើននៅថ្ងៃអនាគត៖ «ប្រទេសថៃ បានយល់ស្របទទួលទិញនូវកសិផលប្រជាជនយើងនៅតាមព្រំដែន ជាពិសេសពោត ដំឡូងឈើ តាមតម្លៃទីផ្សារ ដោយអត់មានការរឹតត្បិត។ យើងបានឯកភាពគ្នាបង្កើតតំបន់សេដ្ឋកិច្ចពិសេសនៅខេត្តបន្ទាយមានជ័យ និងខេត្តកោះកុង»។

យ៉ាងណាក៏ដោយ លោក ចាន់ សុវ៉េត មន្ត្រីស៊ើបអង្កេតជាន់ខ្ពស់សមាគមអាដហុក ហាក់មិនមានជំនឿថា កម្ពុជាទទួលបានផលចំណេញគាប់ប្រសើរពីផែនការអភិវឌ្ឍន៍រួមគ្នានៅតាមព្រំដែនកម្ពុជា-ថៃទេ ព្រោះលោកកត់សម្គាល់ថា រាល់កិច្ចប្រជុំ ឬការចុះកិច្ចព្រមព្រៀងផ្សេងៗ រវាងមន្ត្រីកម្ពុជា-ថៃ មានដូចជាបញ្ឈប់សកម្មភាពបាញ់សម្លាប់ពលរដ្ឋខ្មែរឆ្លងដែនទៅប្រទេសថៃ ជាដើម ថៃមិនបានគោរពតាមទេ។

បន្ថែមលើនេះ លោក ចាន់ សុវ៉េត បានបង្ហាញក្តីព្រួយបារម្ភពីការបាត់បង់ទឹកដីកម្ពុជា តាមព្រំដែនទៅឲ្យប្រទេសថៃ នៅគ្រាព្រំដែនប្រទេសទាំងពីរ មិនទាន់កំណត់ច្បាស់លាស់នោះ៖ «តើការអភិវឌ្ឍទាំងឡាយនៅតាមបន្ទាត់ព្រំដែននេះ សម្រាប់ដើម្បីជាខែលក្នុងការបំពានយកទឹកដី ឬក៏ជាចំណុចមួយដើម្បីធ្វើឲ្យពលរដ្ឋទាំងសងខាង អាចទទួលបាននូវការអភិវឌ្ឍ ឬក៏កាត់បន្ថយភាពក្រីក្រ។ អាហ្នឹងវាហាក់បីដូចជានៅមានមន្ទិលសង្ស័យច្រើន ពីព្រោះកន្លងផុតមក ថៃមិនទាន់បានធ្វើអីជាសញ្ញាណមួយដើម្បីបញ្ជាក់ថា ថៃមានភាពស្មោះត្រង់ជាមួយប្រទេសកម្ពុជា នៅឡើយដែរ ហើយមួយទៀតនោះបញ្ហាការអភិវឌ្ឍវាទាល់តែយើងប្រទេសជិតខាងហ្នឹង បានកំណត់សម្គាល់ទៅលើព្រំដែនច្បាស់លាស់ហើយ។ ចុះបើព្រំដែននៅមិនមានភាពច្បាស់លាស់ នៅមានតំបន់ស តំបន់មិនច្បាស់លាស់ នៅមានកន្លែងខ្លះបាត់បង្គោលឡាក់បង្គោលអី? អ៊ីចឹងធ្វើការអភិវឌ្ឍយ៉ាងដូចម្ដេច? ខ្ញុំនៅតែមានការព្រួយបារម្ភដដែលរឿងហ្នឹង»។

ដូចគ្នាដែរ លោក កែម ឡី អ្នកស្រាវជ្រាវការអភិវឌ្ឍសង្គម និងជាអ្នកវិភាគបញ្ហាសង្គមឯករាជ្យ ក៏មិនទាន់មានទំនុកចិត្តទៅលើផែនការអភិវឌ្ឍតំបន់ព្រំដែនរួមគ្នារវាងកម្ពុជា-ថៃ អាចនាំឲ្យកម្ពុជា ទទួលបានផលចំណេញច្រើនទេ។ លោកបន្តថា កន្លងមក ការចុះកិច្ចព្រមព្រៀងផ្សេងៗជាមួយថៃ កម្ពុជាមិនបានតាមដានការអនុវត្តកិច្ចព្រមព្រៀងរបស់ខ្លួនជាមួយថៃ ឲ្យបានដិតដល់ទេ។

អ្នកស្រាវជ្រាវរូបនេះ មានការព្រួយបារម្ភពីជំនួយអភិវឌ្ឍន៍តាមព្រំដែនរបស់ភាគីថៃ នាំឲ្យកម្ពុជា ខាតបង់ ពិសេសបញ្ហាបូរណភាពទឹកដីតាមព្រំដែន៖«រឿងគេជួយហ្នឹងជាធម្មតាយើងអាចយកជំនួយផ្សេងៗ ទៅអភិវឌ្ឍតាមព្រំដែន ហើយជំនួយរបស់ប្រទេសជិតខាងអាចយកមកធ្វើអភិវឌ្ឍន៍នៅទីក្រុងវិញជាការប្រសើរជាង ពីព្រោះអ្នកផ្ដល់ជំនួយ គឺភាគច្រើនមានចំណង។ អាហ្នឹងត្រូវមានការប្រុងប្រយ័ត្ន។ មួយទៀត ខ្ញុំមានការព្រួយបារម្ភ បើសិនជាការអភិវឌ្ឍរួមគ្នានៅតាមព្រំដែនគួរជៀសវាង ពីព្រោះថៃ យើងត្រូវមើលល្បិចកលគាត់ផង ពីព្រោះគាត់ព្យាយាមអភិវឌ្ឍន៍តាមព្រំដែនជាបន្តបន្ទាប់មក ក្រែងលោយើងជាប់ផុត នៅពេលដីនៅជុំវិញប្រាសាទព្រះវិហារ គេបបួលអភិវឌ្ឍន៍រួមអីយើងជាប់ផុងទៅអភិវឌ្ឍរួមជាមួយគេ អាហ្នឹងវាជាកត្តាស៊ីជម្រៅមួយដែលយើងត្រូវទប់ស្កាត់ដែរ»។

កិច្ចប្រជុំគណៈកម្មការចម្រុះអភិវឌ្ឍន៍តាមព្រំដែន និងការតភ្ជាប់ពាណិជ្ជកម្មកម្ពុជា-ថៃ នៅថ្ងៃទី១១ ខែមិថុនា ភាគីកម្ពុជា ដឹកនាំដោយលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេស និងសមភាគីថៃ ដឹកនាំដោយលោក ស៊ូរ៉ាពង្ស រដ្ឋមន្ត្រីការបរទេសថៃ។

លោក ហោ ណាំហុង បានបញ្ជាក់ថា ការបង្កើតគណៈកម្មការចម្រុះនេះ ជាគំនិតផ្ដួចផ្ដើមរវាងលោកនាយករដ្ឋមន្ត្រី ហ៊ុន សែន និងអ្នកស្រី យ៉ីងឡាក់ នាយករដ្ឋមន្ត្រីថៃ៕

ប្រភពពី៖ RFA

ពត័មានអន្តរជាតិ

អាចម៍ផ្កាយចម្លែកដូចមាសស្រោបត្បូង

at 9:16 PM No comments:

អាចម៍ផ្កាយហ្វូកាងដ៏ភ្លឺចែងចាំងរកឃើញនៅប្រទេសចិន។

ក្រុងប៉េកាំង : អាចម៍ផ្កាយហ្វូកាងដែលបានឃើញដូចនៅក្នុង រូបភាពនេះត្រូវបានគេជឿថាវាមានអាយុកាលដ៏យូរលង់ណាស់មកហើយគឺ ចំនួន៤,៥ពាន់លានឆ្នាំ ខណៈក្រុមអ្នកស្រាវជ្រាវបានប្រទះឃើញវានៅទីក្រុងហ្វូកាងប្រទេសចិន ក្នុងឆ្នាំ២០០០។
វាជាប្រភេទថ្មអាមច៍ផ្កាយដ៏ចម្លែកមានលក្ខណៈថ្លាពណ៌មាសបញ្ចេញ ពន្លឺចែងចាំងលាយឡំគ្នាដោយសារធាតុ Olivine និងថ្មគ្រីស្តាល់រួមផ្សំនឹងដែកនីកែលទើបគេមើលទៅរូបរាងដូចជា ផ្លិតសត្វឃ្មុំនោះ។
អាចម៍ផ្កាយហ្វូកាងត្រូវបានបុរសអ្នកដំណើរម្នាក់បានឃើញមុនគេ។ កាលនោះគាត់បានយកផ្ទាំងថ្មអាចម៍ផ្កាយធំៗនោះមកធ្វើកន្លែងសម្រាប់ សម្រាកញ៉ាំអាហារនាពេលថ្ងៃត្រង់របស់គាត់ជារឿយៗ ហើយលោកតែងតែមានចម្ងល់ផងដែរថាតើវាជាប្រភេទលោហៈឬថ្មអ្វី។ ក្រោយមកលោកក៏បានយកញញួរនិងដែកពន្លាកមកដាប់ថ្មទាំងនេះជាបន្ទះ ដុំៗផ្ញើទៅឯប្រទេសអាមេរិកដើម្បីពិនិត្យ និងពិសោធមើលថាវាពិតជាអាចម៍ផ្កាយមែនឬយ៉ាងណា?
តាមពិតថ្មអាចម៍ផ្កាយកំណើតនោះវាមានទម្ងន់សរុបលើសពីមួយពាន់ គីឡូក្រាមឯណោះ ហើយវាត្រូវបានគេជ្រៀកបំបែកជាបំណែកស្ដើងៗយកទៅដេញថ្លៃលក់ ពាសពេញពិភពលោកទៀតផង។
បើយោងតាមក្រុមហ៊ុនBonhamsបានឲ្យដឹងថា ផ្ទាំងថ្មអាចម៍ផ្កាយត្រូវបានគេគិតថា កកើតដំណាលគ្នានឹងកំណើតរបស់ព្រះអាទិត្យកាលពី៤,៥ពាន់លានឆ្នាំមុន ។ គេជឿថាថ្មពណ៌លឿងថ្លាដូចត្បូងសិលាស្រោបលោហៈមាសនេះ គឺជាស្នូលអាចម៍ផ្កាយធំមួយដែលធ្លាក់មកលើភពផែនដីយើងនេះ៕

ភ្នំពេញប៉ុស្តិ៍

បច្ចេកវិទ្យា

Apple និយាយអួតពី MacBook Air ទាំង២ប្រភេទ

at 9:07 PM No comments:

កាលពីម្សិលមិញក្រុមហ៊ុន Apple បានប្រកាសពី MacBook Air ដែលទទួលបានស្គាល់ជាផ្លូវជាមូយ Model 11 Inch និង 13 inch ដែលមានថាមពលថ្មប្រើប្រាស់ពេញមួយថ្ងៃ ប៉ុន្តែឥឡូវនេះក្រុមហ៊ុនបានលើកសមាសភាពពិតរបស់ MacBook Air ទាំង២ Model នេះមករៀបរាប់នៅលើគេហទំព័រ Geeky-Gadgets។តាមប្រភពព័តមានពីអ្នកតំណាងក្រុមហ៊ុន Apple បានឲ្យដឹងថា MacBook Air 11 Inch មាន LED Blackit Display 11.6 Inch ជាមួយ Resolution 1366x768 Pixels មានបញ្ចូល Processor របស់ Intel 1.3 GHz Dual Core Intel i5 ឬ Dual Core 1.7 GHz i7 និង RAM 8GB Dual Plus ព្រមទាំងជ្រើសរើស 128GB SSD ឬ 256 GB SSD ។ចំណែក MacBook Air 13 Inch វិញមានតម្លើង LED Blacklit Display 13 Inch ជាមួយ Resolution 1440x900 Pixels និងអាចជ្រើសរើស 1.3 GHz Dual Core Intel i5 Processor ឬ Dual Core 1.7 GHz Intel i7 Processor RAM 8GB ជាមួយ 128GB SSD ឬ 256GB SSD ។ជាមួយគ្នាសម្រាប់ MacBook Air ទាំង២ Model នេះគឺមាន Processor ជំនាន់ទី៤ របស់ក្រុមហ៊ុន Intel និង Intel HD Grapgics 500 WiFi 802.11ac ព្រមទាំងតម្លៃ ៩៩៩ដុល្លារ MacBook Air 11Inch និង ១០៩៩ដុល្លារ សម្រាប់ MacBook Air 13 Inch ៕

ប្រភពៈITCITY

ចាប់រំលោភ ពត័មានជាតិ សង្គម

ស្ត្រីមានផ្ទៃពោះជិតគ្រប់ខែ ត្រូវក្មេងស្ទាវមួយក្រុមចាប់រំលោភយ៉ាងព្រៃផ្សៃ

at 8:42 PM

ខេត្តកំពង់ឆ្នាំង ៖ ស្ត្រីម្នាក់ដែលមានផ្ទៃពោះជិតគ្រប់ខែទៅហើយនោះ ត្រូវបានក្រុមក្មេងស្ទាវ២នាក់ ក្នុងចំណោមបក្ខពួក៥នាក់ បានធ្វើសកម្មភាពចាប់រំលោភយ៉ាងព្រៃផ្សៃ ខណៈដែលនាងរួមទាំងកូនតូចៗកំពុងតែដេកនៅក្នុងខ្ទមចាំចំការមួយកន្លែង ស្ថិតក្នុងភូមិបឹងកក់ ឃុំលង្វែក ស្រុកកំពង់ត្រឡាច កាលពីវេលាម៉ោងប្រមាណ៩យប់ ថ្ងៃទី៨ ខែមិថុនា ឆ្នាំ២០១៣។

បើតាមការរៀបរាប់របស់អ្នកភូមិបានឲ្យដឹងថា អំពើចាប់រំលោភនេះប្រហែលជាកើតឡើងដោយសារតែការសងសឹក ព្រោះស្ត្រីម្នាក់នេះ ត្រូវជាប្រពន្ធរបស់តាចាស់ល្មោភតណ្ហា ចាប់រំលោភក្មេងស្រីអាយុ១៤ឆ្នាំ ដែលទើបតែត្រូវសមត្ថកិច្ចចាប់បញ្ជូនទៅពន្ធនាគារកាលពីប៉ុន្មានថ្ងៃមុននេះ។

បើតាមការរៀបរាប់របស់ស្ត្រីគ្រោះបានឲ្យដឹងថា នៅព្រឹកថ្ងៃទី៨ ខែមិថុនា ឆ្នាំ២០១៣ ពេលដែលប៉ូលិសចាប់ប្តីយកទៅបាត់ យប់នោះនាងដេកជាមួយកូនតូច២នាក់របស់ប្រពន្ធដើម ស្រាប់តែម៉ោងប្រមាណ៩យប់ មានក្មេងមួយក្រុមមានគ្នា៥នាក់ ក្នុងនោះ៣នាក់បាននាំគ្នាទៅលួចចាប់មាន់របស់គាត់ ។ ចំណែក២នាក់ទៀតបានចូលចាប់នាងអូសចេញពីខ្ទមយកទៅក្បែរដំបូកមួយស្ថិតនៅខាងក្រោយខ្ទម រួចហើយក៏ធ្វើសកម្មភាពចាប់នាងរំលោភបានសម្រេចម្តងម្នាក់ ។

នាងបញ្ជាក់ថា មុនពេលរំលោភ ពួកវាទាំង២នាក់បានវាយធ្វើបាប ដោយខ្លះជិះលើផ្ទៃពោះ ខ្លះវាយនាងនឹងដៃ ។ នាងបានបង្ហាញស្នាមរបួសដែលពួកក្មេងពាលអូសកាត់ព្រៃដាច់រលាត់ខ្នង និងជាំមុខ ។ នាងបន្តថា ក្នុងពេលកើតហេតុនោះកូនៗទាំង២នាក់បានឃើញ និងភ័យខ្លាចរត់ទៅពួនក្នុងប្រឡាយក្បែរនោះ ។

បន្ទាប់ពីទទួលបានពាក្យបណ្តឹង សមត្ថកិច្ចបានចាត់កម្លាំងឲ្យចុះស្រាវជ្រាវសំណុំរឿងនេះភ្លាមៗផងដែរ ព្រោះជាបទល្មើសឧក្រិដ្ឋ មិនអាចឱ្យជនល្មើសគេចខ្លួនបានឡើយ ៕

ប្រភពពី វត្តភ្នំ

ពត័មានជាតិ សង្គម

ឃាត់ខ្លួនមុខសញ្ញាចោរកម្មដែលលួចក្របីជាង១០របស់លោកមេឃុំ

at 8:41 PM

ខេត្តក្រចេះ ៖ កម្លាំងសមត្ថកិច្ចស្រុកសំបូរ បានធ្វើការចាប់ឃាត់ខ្លួន ជនសង្ស័យ២នាក់ក្នុងចំណោមបក្ខពួក៦នាក់ កាលពីល្ងាចថ្ងៃទី០៩ ខែមិថុនា ឆ្នាំ២០១៣ បន្ទាប់ជនសង្ស័យទាំងនេះបានធ្វើសកម្មភាពលួចក្របីជាង១០ក្បាលរបស់លោកមេឃុំក្បាលដំរី ស្រុកសំបូរ។

បើតាមការរៀបរាប់របស់សមត្ថកិច្ចបានឱ្យដឹងថា ជនសង្ស័យដែលសមត្ថកិច្ចចាប់ឃាត់ខ្លួននេះមានឈ្មោះ ប៊ុន រម្យ អាយុ៣០ឆ្នាំ ជាអ្នកមើលផ្លូវ និងម្នាក់ទៀតឈ្មោះ ម៉ៅ សំអូន អាយុ៣៣ឆ្នាំ ជាជនដៃដល់ចូលកៀងក្របី ។ ជនទាំងពីរនាក់នេះមានទីលំនៅក្នុងភូមិអូរពោរ ឃុំក្បាលដំរី ស្រុកសំបូរ ហើយក៏ជាមុខសញ្ញាចាស់ដែលនគរបាលកំពុងតាមប្រមាញ់ផងដែរក្នុងករណីអំពើចោរកម្ម ។ ជាមួយនឹងការឃាត់ខ្លួននេះ កម្លាំងសមត្ថកិច្ចដកហូតបានវត្ថុតាងមួយចំនួនរួមមាន ម៉ូតូវ៉េវអាល់ហ្វា ពណ៌ខ្មៅចំនួន២គ្រឿង ដែលពួកគេជិះធ្វើសកម្មភាព ទូរស័ព្ទដៃ១គ្រឿង និងកាំបិតសម្រាប់ពន្លះសាច់ក្របី ២។

បន្ទាប់ពីការសាកសួររួចមក ជនសង្ស័យទាំង២នាក់រួមទាំងវត្ថុតាង ត្រូវបានសមត្ថកិច្ចបញ្ជូនទៅកាន់ការិយាល័យព្រហ្មទណ្ឌកម្រិតស្រាលខេត្ត កាលពីព្រឹកថ្ងៃទី១១ មិថុនា ដើម្បីចាត់ការទៅតាមនីតិវិធីច្បាប់បន្តទៀត ៕

ប្រភពពី វត្តភ្នំ

ពត័មានជាតិ សង្គម

ស្ទាវជិះម៉ូតូចាក់កួរផ្លូវមាត់ទន្លេតាខ្មៅដួលផ្ទប់នឹងការ៉ូឡារបួសធ្ងន់

at 8:40 PM

ខេត្តកណ្តាលៈ ក្មេងស្ទាវម្នាក់បានបើកម៉ូតូបត់ចាក់គួរផ្លូវកោងមាត់ទន្លេតាខ្មៅបណ្ដាលឲ្យដួលបោកផ្ទប់នឹងការ៉ូឡាខឿនសួនច្បាររងរបួសសន្លប់ស្តូកស្តឹង កាលពីវេលាម៉ោង៤និង៣០នាទីរសៀលថ្ងៃទី១១ ខែមិថុនា ឆ្នាំ២០១៣ នៅត្រង់ចំណុចផ្លូវកោងសួនច្បារតាខ្មៅ ក្នុងភូមិតាខ្មៅ សង្កាត់តាខ្មៅ ក្រុងតាខ្មៅ។

ស្ទាវដែលរងរបួសបើកម៉ាកម៉ូតូគុបមូល ពណ៌ខៀវ គ្មានកញ្ចក់ គ្មានស្លាក និងមិនមួកសុវត្ថិភាព បើកតាមបណ្ដោយផ្លូវ២១ តាមមាត់ទន្លេក្នុងទិសដៅពីត្បូងទៅជើង។ លុះមកដល់ចំណុចផ្លូវកោងទៅមាត់ស្ទឹងក៏ជិះចាក់កួរបណ្តាលឲ្យជ្រុលទៅបុកនឹងខឿនការ៉ូឡាបណ្ដាលឲ្យដួលរងរបួសធ្ងន់ ត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យឯរាជធានីភ្នំពេញភ្លាមៗផងដែរ៕

ប្រភពពី នគរវត្ត

នយោបាយ ពត័មានជាតិ

អ្នកទោសទួលស្លែងម្នាក់គំរាមប្តឹងលោក កឹម សុខា

at 6:48 PM

ភ្នំពេញ — លោក ជុំ ម៉ី អតីតអ្នកទោសគុកទួលស្លែងនិងជាប្រធានសមាគមជនរងគ្រោះក្នុងរបបកម្ពុជាប្រជាធិបតេយ្យហៅថាសមាគមក្សេមក្សាន្តគ្រោងនឹងប្តឹងលោក កឹម សុខា ស្របពេលដែលសមាគមក្សេមក្សាន្តគ្រោងនឹងបោះឆ្នោតផ្លាស់ប្តូររូបលោក។

គម្រោងរបស់លោក ជុំ ម៉ី ធ្វើឡើងមួយថ្ងៃប៉ុណ្ណោះបន្ទាប់ពីលោក កឹម សុខា ប្រធានស្តីទីគណបក្សសង្គ្រោះជាតិប្រកាសមិនសុំទោសតាមការទាមទាររបស់លោក។ យ៉ាងណាក៏ដោយ លោក ជុំ ម៉ី នៅមិនទាន់ដឹងច្បាស់ថានឹងត្រូវដាក់បណ្តឹងទៅកាន់តុលាការនៅពេលណានោះទេ។ លោក ជុំ ម៉ី គ្រាន់តែ បញ្ជាក់ថា៖ «អាចនឹងឆាប់ៗហ្នឹងមើលទៅ»។

លោក ជុំ ម៉ី កាលពីថ្ងៃអាទិត្យទី០៩កន្លងទៅនេះ បានដឹកនាំបាតុកម្មប្រឆាំងទាមទារឱ្យលោក កឹម សុខា ចេញមុខសុំទោសជាសាធារណៈ។ លោក កឹម សុខា ត្រូវបានចោទប្រកាន់ថា បាននិយាយថា គុកទួលស្លែងគឺជាគុកសិប្បនិម្មិតនឹងរៀបចំឡើងដោយវៀតណាម។ ទោះបីជាយ៉ាងនេះក្តី ប្រធានស្តីទីនៃគណបក្សសង្គ្រោះជាតិបានបដិសេធចោលលើការចោទប្រកាន់។

លោក យ៉ែម ប៉ុញ្ញឫទ្ធិ អ្នកនាំពាក្យគណបក្សសង្គ្រោះជាតិនិយាយថាប្រសិនបើលោក ជុំ ម៉ី ដាក់ពាក្យប្តឹងលោក កឹម សុខា នោះគឺជាសិទ្ធិសេរីភាពរបស់លោកជុំ ម៉ី។

លោកនិយាយថា៖ «ដល់ពេលអីចឹងទៅខ្ញុំអត់ដឹងថាគាត់ចង់ធ្វើអ្វីទៀត។ នេះជាសិទ្ធិរបស់គាត់។ ចង់និយាយថា កឹម សុខា ក៏ជាជនរងគ្រោះក្នុងសម័យខ្មែរក្រហម»។

រដ្ឋសភាជាតិកម្ពុជាកាលពីថ្ងៃទី០៨ ខែមិថុនាកន្លងទៅនេះបានសម្រេចអនុម័តសេចក្តីព្រាងច្បាប់ដាក់ទោសជនទាំងឡាយណាដែលហ៊ានអះអាងថា មិនមានឧក្រិដ្ឋកម្មក្នុងរបបខ្មែរក្រហម។ ការអនុម័តនោះគ្មានវត្តមានតំណាងរាស្ត្រគណបក្សជំទាស់ឡើយ។ច្បាប់នេះត្រូវបង្កើតឡើងក្រោយពីមានការចោទប្រកាន់ទៅលើលោក កឹម សុខា តាមការបង្គាប់របស់លោកនាយករដ្ឋមន្ត្រីហ៊ុន សែន។

លោក សុខ សំអឿន នាយកប្រតិបត្តិនៃអង្គការមិនមែនរដ្ឋាភិបាលមួយហៅថាក្រុមអ្នកច្បាប់ការពារសិទ្ធិកម្ពុជាប្រាប់ថាលោក ជុំ ម៉ី អាចប្តឹងលោក កឹម សុខា បានប៉ុន្តែក្រមព្រហ្មទណ្ឌមិនអាចដាក់ទោសនោះទេ ដោយហេតុថាច្បាប់នេះកើតក្រោយពេលដែលលោ គឹម សុខាត្រូវបានចោទប្រកាន់។

កាលពីថ្ងៃសៅរ៍សប្តាហ៍មុន នៅឯកិច្ចប្រជុំរបស់គណៈកម្មាធិការនាយកនៃសមាគមក្សេមក្សាន្តចំនួនប្រាំបីរូបក្នុងចំណោមសមាជិកសរុបប្រាំបួនរូប បានអនុម័តថា នឹងជ្រើសរើសប្រធានសមាគមថ្មីជំនួសលោក ជុំ ម៉ី។

លោក ឆាត គឹមឈុន ប្រធានរដ្ឋបាលនៃសមាគមនេះ បញ្ជាក់ថា កិច្ចប្រជុំដើម្បីជ្រើសរើសប្រធានថ្មីនឹងត្រូវធ្វើឡើងក្រោយពីការបោះឆ្នោតជ្រើសតាំងតំណាងរាស្ដ្រខែកក្កដា ខាងមុខនេះ។

លោក ឆាត គឹមឈុន បន្ថែមថា៖ «យើងជ្រើសរើសមេដឹកនាំកុំឱ្យពាក់ព័ន្ធនឹងគណបក្សនយោបាយ»។

លោក ជុំ ម៉ី ព្រមានថា.«ប្រសិនជាចង់ដករូបលោកមែននោះ»ត្រូវមានហេតុផលត្រឹមត្រូវពីព្រោះលោកត្រូវបានទទួលស្គាល់ដោយក្រសួងមហាផ្ទៃ៕

ប្រភពពី វីអូអេខ្មែរ

នយោបាយ ពត័មានជាតិ

អ្នកគាំទ្របក្សកាន់អំណាចរំខានការជួបប្រជុំរបស់បក្សប្រឆាំង

at 6:47 PM

ភ្នំពេញ — ការជួបជុំសំណេះសំណាលរបស់គណបក្សប្រឆាំងបានរងនូវការរំខានពីក្រុមអ្នកគាំទ្រគណបក្សកាន់អំណាចនៅខេត្តកណ្តាលនាថ្ងៃអង្គារ៍នេះហើយពួកគេបានរាំងខ្ទប់លោក កឹម សុខា អនុប្រធានគណបក្សសង្គ្រោះជាតិមិនឱ្យចាកចេញពីកន្លែងប្រជុំមុននឹងត្រូវក្រុមអ្នកគាំទ្របក្សប្រឆាំងជម្លៀសលោកចេញ។

លោក ចាន់ ចេង សមាជិកសភាតំណាងរាស្ត្ររបស់គណបក្សសម រង្ស៊ី បាននិយាយថាគណបក្សសង្គ្រោះជាតិដែលបង្កើតឡើងដោយគណបក្សសិទ្ធិមនុស្សនិងគណបក្សសមរង្ស៊ីបានរៀបចំវេទិការ សម្តែងមតិមួយដើម្បីជួបជុំរវាងលោកកឹម សុខានិងប្រជាពលរដ្ឋនៅស្រុកលើកដែកនិងស្រុកល្វាអែមខេត្តកណ្តាល។

លោកបាននិយាយថាវេទិការទាំងពីរនេះត្រូវបានរំខានដោយអ្នកគាំទ្រគណបក្សគ្រប់គ្រងអំណាចដោយពួកគេជាច្រើនបានជិះរថយន្តដឹកឧគ្ឃោសនស័ព្ទមកចាក់រំខានមិនឱ្យអ្នកចូលរួមពិធីស្តាប់ប្រសាសន៍របស់លោកកឹម សុខាបាន។

លោកបាននិយាយថាក្រោយពេលបញ្ចប់វេទិការយ៉ាងតិចមានរថយន្តចំនួន១២គ្រឿងបានមករារាំងរថយន្តរបស់លោកកឹម សុខាមិនឱ្យចេញពីវេទិការក៏ប៉ុន្តែទោះជាយ៉ាងណាក៏ដោយការរំខានទាំងពីរលើកនេះមិនមានការប៉ះទង្គិចដោយអំពើហិង្សាទេ។

លោកចាន់ ចេងបន្ថែមថា៖ «ហែរមកដល់វេទិការគណបក្សសង្គ្រោះជាតិហ្នឹងឈប់ រួចចាក់មេក្រូហើយស្រែក។យើងបានប្រាប់ទៅអ្នកចូលរួមនៅក្នុងកម្មវិធីហ្នឹងឱ្យស្ងប់ស្ងៀមអត់ឱ្យមានអំពើហិង្សាទេ»។

លោកចាន់ ចេងបាននិយាយទៀតថាលោកបានរាយការណ៍ជូនអាជ្ញាធរមូលដ្ឋានដែរអំពីសកម្មភាពរំខានរបស់មន្ត្រីមកពីគណបក្សប្រជាជនតែពួកគេមិនបានអន្តរាគមទេដោយបណ្តោយឱ្យសកម្មភាពនេះធ្វើឡើងដោយគ្មានការរារាំង។

លោក អ៊ុង ស៊ីលាក់ ប្រធានប៉ុស្តិប៉ូលិសឃុំដីឥដ្ឋមិនបានអត្ថាធិប្បាយទេដោយលោកនិយាយថាកំពុងជាប់រវល់។

លោកបាននិយាយថា៖ «បាទខ្ញុំជាប់រវល់។ និយាយជាមួយបងឯងអត់កើតទេ»។

លោកនាយករដ្ឋមន្ត្រីហ៊ុន សែន ពីខេត្តពោធិ៍សាត់នៅថ្ងៃអង្គារនេះបាននិយាយថាលោកបានដឹងពីសកម្មភាពទាំងនេះដែរតែលោកមិនបានចេញអន្តរាគមន៍ណាមួយប្រាកដប្រជាទេ។លោកហ៊ុន សែន គ្រាន់តែបាននិយាយថាឱ្យមានការអត់ធ្មត់តែប៉ុណ្ណោះ។

លោកថ្លែងថា៖ «យើងក៏អត់ធ្មត់ធ្វើយ៉ាងណាកុំឱ្យមានអំពើហិង្សាកើតឡើងប្រើត្រឹមតែញ៉ោមខន្តីបានហើយ។ប៉ុន្តែសូមអំណាវនាវទៅបក្សប្រឆាំងនិងបក្សដទៃទៀតឃោសនាតែពីទំនិញរបស់ខ្លួនបានហើយកុំវាយប្រហារគេ»។

លោក កឹម សុខាអនុប្រធានគណបក្សសង្គ្រោះជាតិបានហៅការរារាំងនេះជាចេតនារបស់រដ្ឋាភិបាលទៅលើសកម្មភាពនយោបាយរបស់គណបក្សប្រឆាំងដោយសារតែខ្លាចចាញ់ឆ្នោត។

លោកនិយាយថា៖ «គណបក្សប្រជាជន រដ្ឋាភិបាលគាត់ចាប់ផ្តើមធ្វើអំពើនេះថោកទាបណាស់ ដែលសង្គមប្រជាធិបតេយ្យគេអត់ធ្វើទេ។ប្រកួតប្រជែងឈ្នះចាញ់អ្វីឱ្យធ្វើត្រឹមត្រូវមក ហើយកុំថាប្រជាពលរដ្ឋ មិនមែនប្រជាពលរដ្ឋទេសុទ្ធតែមេដឹកនាំនៅតាមមូលដ្ឋានទាំងអស់ដែលនាំក្បួនឡានអស់ហ្នឹង»។

ការរារាំងសកម្មភាពជួបប្រជុំរវាងអ្នកតំណាងរាស្រ្តមកពីគណបក្សប្រឆាំងបានកើតមានឡើងមុនពេលការឃោសនាបោះឆ្នោតឈានចូលមកដល់ដែលគ្រោងធ្វើចាប់ពីថ្ងៃទី២៧ខែមិថុនានេះហើយគ្រោងនឹងបញ្ចប់នៅថ្ងៃទី២៦ខែកក្កដា។

លោកទេព នីថា អគ្គលេខាធិការនៃគណៈកម្មាធិការជាតិរៀបចំការបោះឆ្នោតបាននិយាយថាសកម្មភាពរំខាននេះមិនមែនជាសមត្ថកិច្ចរបស់គ.ជ.បទេ៕

ប្រភពពី វីអូអេខ្មែរ

ពត័មានជាតិ

បដិមាដែលអាមេរិក ប្រគល់ឲ្យខ្មែរ បាននាំមក ដល់កម្ពុជាហើយ បន្ទាប់ពីឃ្លាតឆ្ងាយ ជាង ៤០ឆ្នាំ

at 6:46 PM

ភ្នំពេញៈ រូបបដិមា នៃសតវត្សរ៍ទី១០ ចំនួនពីរ ដែលសារមន្ទីរមេត្រូប៉ូលីតែន (Metropolitan Museum) នៅទីក្រុងញ៉ូវយ៉ក បានសម្រេចប្រគល់ឲ្យកម្ពុជាវិញ បានដឹកបញ្ជូនមកដល់កម្ពុជាវិញហើយ នៅម៉ោង៦ល្ងាចថ្ងៃទី១១ ខែមិថុនា ឆ្នាំ២០១៣ បន្ទាប់ពីជនខិលខូចលួចលក់ទៅក្រៅប្រទេសអស់រយៈពេលជាង ៤០ឆ្នាំ។

បើតាមសេចក្តីប្រកាសព័ត៌មានរបស់ទីស្តីការគណៈរដ្ឋមន្រ្តីនាពេលកន្លងមក បានឲ្យដឹងថា រូបបដិមាថ្មពីរ នៃសតវត្សរ៍ទី១០ មានឈ្មោះថា “បនទវៈ លុតជង្គង់” (Kneeling Pandawas) ពេលខ្លះត្រូវបានគេស្គាល់ថា “ជាអ្នកបំរើ លុតជង្គង់” (Kneeling Attendants) ត្រូវបានគេលួចចេញពីប្រាសាទចិន នៅកោះកែរ អំឡុងពេលសង្គ្រាមស៊ីវិល ក្នុងប្រទេសកម្ពុជា នាទស្សវត្សរ៍ទី៧០។ បដិមាទាំងពីរ ត្រូវបានសារមន្ទីរ Metropolitan នៅទីក្រុងញ៉ូវយ៉ក សម្រេចប្រគល់មកឲ្យកម្ពុជាវិញ ក្រោយពីមានការពិភាក្សា ជាច្រើនលើកជាមួយទីស្តីការគណរដ្ឋមន្រ្តី។

លោក Thomas P. Campbell នាយកសារមន្ទីរ Metropolitan បានថ្លែងក្នុងសេចក្តីប្រកាសព័ត៌មាន របស់ខ្លួន កាលពីថ្ងៃទី៣ ខែឧសភា ឆ្នាំ២០១៣ ថា «សារមន្ទីរប្តេជ្ញាចិត្តអនុវត្ត យ៉ាងហ្មត់ចត់នូវបទដ្ឋាន នៃទីកន្លែងដើម មិនគ្រាន់តែទៅលើរបស់ដែលទើបទទួលបានថ្មីៗប៉ុណ្ណោះទេ ថែមទាំងទៅលើការសិក្សា ស្វែងយល់ពីការងារក្នុងការ ប្រមែប្រមូលសន្សំទុក របស់ខ្លួនដ៏យូរយាមកហើយ ក្នុងកិច្ចខិតខំប្រឹងប្រែង ដែលកំពុងតែប្រព្រឹត្តទៅ ដើម្បីសិក្សាស្វែងយល់ឲ្យ បានច្រើនដែលអាចធ្វើបានទៅលើប្រវត្តិ នៃកម្មសិទ្ធិផង»។

លោក Thomas P. Campbell បានឲ្យដឹងទៀតថា សារមន្ទីរកំពុងតែពង្រឹងទំនាក់ទំនងល្អ ដែលខ្លួនបានរក្សាជាយូរមកហើយនោះ ជាមួយនឹងស្ថាប័នអ្នកសិក្សាស្រាវជ្រាវ និងសហសេវិកកម្ពុជា ក៏ដូចជាការជំរុញ និងបន្តនូវទំនាក់ទំនងល្អព្រមទាំងកិច្ចពិភាក្សាល្អរវាងគ្នា និងគ្នា។

បើយោងតាមសេចក្តីប្រកាសព័ត៌មានរបស់អង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី បានបញ្ជាក់ថា រូបបដិមាថ្មពីរ ដែលមានឈ្មោះថា “បនទវៈ លុតជង្គង់” ឬ “ជាអ្នកបំរើ លុតជង្គង់” នេះ គឹជាផ្នែកមួយនៃរូបបដិមាមួយក្រុម ដែលតំណាងឲ្យការប្រយុទ្ធតស៊ូ ដ៏ល្បីល្បាញរវាង ភីម (Bhima) និង ឌូរីយោដាន (Duryod hana) នៃរឿងព្រេង មហាភារតៈ (Mahabharat) ហើយដែលត្រូវបានគេកាច់បំបាក់ យ៉ាងឃោរឃៅ ពីជើងទម្ររបស់វា និងបញ្ជូនចេញទៅក្រៅប្រទេស៕

ប្រភពពី៖ NEWS4KH

Pages

New Design

Recent Post

កម្ពុជាលុបចោលបម្រាមការផ្សាយមុនពេលបោះឆ្នោតជាតិ

អ្នកបឹងកក់៖ ក្រសួងព័ត៌មានបំបិទសិទ្ធិនិងសំឡេងអ្នករងគ្រោះ

ពលរដ្ឋមានជម្លោះដីសុំឲ្យនាយករដ្ឋមន្ត្រីជួយ

គណបក្សនយោបាយធំៗ លើកលែងគណបក្សប្រជាជនកម្ពុជា សន្យាធ្វើឲ្យមានច្បាប់ស្តីពីសិទ្ធិទទួលបានព័ត៌មាន

គ្រោះថ្នាក់ចរាចរណ៍បង្ករបួសដល់សកម្មជនគណបក្សប្រជាជននិងគណបក្សសង្គ្រោះជាតិនៅថ្ងៃឃោសនាទីពីរ

គណបក្សសង្គ្រោះជាតិ ចេញសេចក្តីថ្លែងការណ៍ ថ្កោលទោស ចំពោះសេចក្តីណែនាំ របស់ក្រសួងព័ត៌មាន

ដើរកាត់ចំការឪឡឹក ឃើញនាងនៅតែម្នាក់ឯងស្ទុះចូលទៅចាប់រំលោភទាំងកំរោល

តារាវ័យក្មេងសាច់ខ្ចីមានគេចោមស្នេហ៍ច្រើនស្របពេលមិនទាន់ គិតគូរ

ខ្មែរ-ថៃចុះកិច្ចព្រមព្រៀងអភិវឌ្ឍន៍តំបន់ព្រំដែនរួមគ្នា

អាចម៍ផ្កាយចម្លែកដូចមាសស្រោបត្បូង

Apple និយាយអួតពី MacBook Air ទាំង២ប្រភេទ

ស្ត្រីមានផ្ទៃពោះជិតគ្រប់ខែ ត្រូវក្មេងស្ទាវមួយក្រុមចាប់រំលោភយ៉ាងព្រៃផ្សៃ

ឃាត់ខ្លួនមុខសញ្ញាចោរកម្មដែលលួចក្របីជាង១០របស់លោកមេឃុំ

ស្ទាវជិះម៉ូតូចាក់កួរផ្លូវមាត់ទន្លេតាខ្មៅដួលផ្ទប់នឹងការ៉ូឡារបួសធ្ងន់

អ្នកទោសទួលស្លែងម្នាក់គំរាមប្តឹងលោក កឹម សុខា

អ្នកគាំទ្របក្សកាន់អំណាចរំខានការជួបប្រជុំរបស់បក្សប្រឆាំង

បដិមាដែលអាមេរិក ប្រគល់ឲ្យខ្មែរ បាននាំមក ដល់កម្ពុជាហើយ បន្ទាប់ពីឃ្លាតឆ្ងាយ ជាង ៤០ឆ្នាំ

Send Quick Massage