Nation News Daily

គ.ជ.ប.ចេញបំភ្លឺស្តីពីការផ្អាកវិទ្យុមិនឲ្យផ្សាយបន្ត និងការហាមផ្សព្វផ្សាយលទ្ធផលនៃការបោះឆ្នោត

ដើម្បីបញ្ជាក់ឲ្យបានច្បាស់លាស់នូវការយល់ច្រឡំមួយចំនួន គណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប.បានចេញសេចក្តីបំភ្លឺមួយ ចុះថ្ងៃទី១៧កក្កដាម្សិលមិញ។
ដោយបានលើកឡើងថា សូមកុំឲ្យសាធារណជនមួយចំនួនយល់ច្រឡំថា គ.ជ.ប.ជាអ្នកផ្អាកវិទ្យុមិនឲ្យផ្សាយបន្តក្នុងអំឡុងពេលបោះ ឆ្នោត និងកុំយល់ច្រឡំថា.គ.ជ.ប.ហាមមិនឲ្យប្រព័ន្ធផ្សព្វផ្សាយព័ត៌មាន ផ្សាយព័ត៌មានពាក់ព័ន្ធនឹងការបោះឆ្នោត និងលទ្ធផលនៃការបោះឆ្នោតក្នុងរយៈពេល៥ថ្ងៃមុនថ្ងៃបោះឆ្នោត និងថ្ងៃរាប់សន្លឹកឆ្នោត។
ពាក់ព័ន្ធនឹងករណីយល់ច្រឡំទាំងពីរខាងលើនេះ គ.ជ.ប សូមបំភ្លឺជូនសាធារណជនទាំងអស់ឲ្យបានជ្រាបថា គ.ជ.ប មិនបានផ្អាកវិទ្យុមិនឲ្យធ្វើការផ្សាយបន្តនោះទេ។
ផ្ទុយទៅវិញ គ.ជ.ប បានចេញគោលការណ៍សម្រាប់ប្រព័ន្ធផ្សព្វផ្សាយព័ត៌មាន ក្នុងគោលបំណង ធ្វើយ៉ាងណាឲ្យការបោះឆ្នោតជ្រើសតាំងតំណាងរាស្ត្រ ប្រព្រឹត្តិទៅដោយសេរី ត្រឹមត្រូវ និងយុត្តិធម៌ ក្នុងនោះគ.ជ.ប.បានជំរុញឲ្យប្រព័ន្ធផ្សព្វផ្សាយ ផ្សាយព័ត៌មានទាំងអស់ត្រូវតែផ្តល់ព័ត៌មាន និងការអប់រំ អំពីការបោះឆ្នោតដែលងាយយល់ និងមានអព្យាក្រឹត្យ ក្នុងការផ្សព្វផ្សាយព័ត៌មានពាក់ព័ន្ធនឹងការបោះឆ្នោត។
ម្យ៉ាងទៀត គ.ជ.ប លើកឡើងថា សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៥ ឆ្នាំ២០១៣ ម្ចាស់ប្រព័ន្ធផ្សព្វផ្សាយព័ត៌មាន និងអ្នកគ្រប់គ្រង ត្រូវតែខិតខំប្រឹងប្រែងឲ្យអស់លទ្ធភាពចូលរួមបោះឆ្នោត និងចាត់ទុកព័ត៌មានអំពីការបោះឆ្នោត ជាព័ត៌មានអាទិភាព។
គ.ជ.ប បានគូសបញ្ជាក់ថា ចំពោះការហាមផ្សព្វផ្សាយក្នុងរយៈពេល៥ថ្ងៃ មុនថ្ងៃបោះឆ្នោត និងថ្ងៃរាប់សន្លឹកបោះឆ្នោតដែលមានចែងក្នុងបទបញ្ជា និងនីតិវិធី សម្រាប់ការបោះឆ្នោតជ្រើសតាំងតំណាងរាស្ត្រ ជំពូក៧ ចំណុច ៧.៥.២សំដៅដល់ការធ្វើ និងហាមផ្សព្វផ្សាយលទ្ធផលនៃការស្ទង់មតិទាក់ទងនឹងដំណើរការបោះ ឆ្នោតតែប៉ុណ្ណោះ។
ចំណែកការផ្សព្វផ្សាយលទ្ធផលនៃការបោះឆ្នោត ប្រព័ន្ធផ្សព្វផ្សាយព័ត៌មានទាំងអស់មានសិទ្ធិធ្វើការផ្សព្វផ្សាយ លទ្ធផលដែលខ្លួនទទួលបាន។
នៅក្នុងសេចក្តីប៉ភ្លឺនោះផងដែរ គ.ជ.ប ក៏បានប្រកាសពីចំនួនបណ្តឹង ក្នុងអំឡុងពេលឃោសនាបោះឆ្នោតគិតចាប់ពីថ្ងៃទី២៧ មិថុនា មកត្រឹមថ្ងៃទី១៦ កក្កដា មានបណ្តឹងនៅថ្នាក់គណៈកម្មការឃុំសង្កាត់រៀបចំការបោះឆ្នោត ចំនួន២៣៩បណ្តឹង។
ក្នុងនោះនៅថ្នាក់គណៈកម្មការរាជធានីខេត្ត រៀបចំការបោះឆ្នោតមាន ៦៦បណ្តឹង និងនៅថ្នាក់គណៈកម្មាធិការជាតិរៀបចំការបោះឆ្នោតគជបមានចំនួន១២ បណ្តឹង៕

បណ្តាញសង្គមជាវេទិកាថ្មីនៃការឃោសនារកសំឡេងឆ្នោត

at 9:13 PM No comments:

74C079E4-AF7F-456D-8FA3-17B2E31D65DF_w640_r1_s-e1374176778630

ភ្នំពេញ៖ បណ្តាញសង្គមមាន Facebook Google Plus និង Youtube ជាដើមបានក្លាយជាវេទិកានៃយុទ្ធនាការឃោសនាស្វែងរកសំឡេងឆ្នោតយ៉ាងសកម្មសម្រាប់គណបក្សធំៗក្នុងប្រទេសកម្ពុជា។

ក្រុមអ្នកគាំទ្រ និងទីចាត់ការនយោបាយរបស់គណបក្សប្រជាជនកម្ពុជានិងគណបក្សសង្គ្រោះជាតិបានប្រើប្រាស់បណ្តាញសង្គមទាំងនេះដើម្បីជូនដំណឹងដល់សាធារណជន បង្ហាញពីគោលនយោបាយនិងសកម្មភាពរបស់ខ្លួន និងអំពាវនាវឲ្យមានការបោះឆ្នោតគាំទ្ររៀងៗ។

លោក ហូ វណ្ណ អតីតតំណាងរាស្ដ្រគណបក្សសង្គ្រោះជាតិ ពន្យល់ថាការឃោសនានយោបាយតាមរយៈហ្វេសប៊ុក(Facebook) និងការហែ ក្បួនឃោសនាគឺជាការជួយបំពេញឲ្យគ្នាទៅវិញទៅមក។

លោកនិយាយថា៖ «បើនិយាយពីសារនយោបាយគឺយើងបញ្ជូនចេញទៅស្របគ្នា ប៉ុន្តែការហែក្បួន ជាទូទៅមានការបញ្ចេញកម្លាំងកាយ មានការចំណាយជាសម្ភារៈ ជាថវិកាអស់ច្រើន តែបើហ្វេសប៊ុក (Facebook) យើងឃើញថា បានទទួលព័ត៌មានផង គ្មានការគាបសង្កត់ផង ហើយមិនមានចំណាយថវិកាផង»។

នៅលើទំព័រហ្វេសប៊ុក (Facebook) របស់អ្នកមានទំនោរទៅកាន់គណបក្សសង្រ្គោះជាតិ និងហ្វេសប៊ុក (Facebook) របស់គណបក្សនេះបានបង្ហោះរូបភាពនៃការឃោសនាប្រចាំថ្ងៃ ព្រមទាំងចែករំលែកឈុតវីដេអូខ្លីៗពីគេហទំព័រយូធូប (Youtube) ដើម្បីទាក់ទាញឲ្យប្រជាពលរដ្ឋសម្រេចចិត្តបោះឆ្នោតជូនគណបក្សសង្គ្រោះជាតិ។

រូបភាព និងវីដេអូ ដោយមានសារគាំទ្រខ្លីៗ បង្ហាញពីការប្រមូលផ្តុំរបស់ក្រុមយុវជនដែលមានឯកសណ្ឋាន និងមួករូបព្រះអាទិត្យរះ។ ពួកគេបិទនិមិត្តសញ្ញានេះលើមុខ និងការលើកដៃលេខ៧ជាតំណាងឲ្យលេខរៀងទី៧របស់គណបក្សសង្គ្រោះជាតិក្នុងសន្លឹកឆ្នោត។ មួយវិញទៀត គេហទំព័រទាំងនោះ ក៏បានលើកឡើងផងដែរនូវចំណុចអវិជ្ជមានកន្លងមក ស្ថិតក្រោមការដឹកនាំរបស់គណបក្សប្រជាជនកម្ពុជា ដែលជាគណបក្សកាន់អំណាច។

គណបក្សប្រជាជនកម្ពុជា និងអ្នកគាំទ្រគណបក្សកំពុងកាន់អំណាចយ៉ាងរឹងមាំនេះក៏បាននិងកំពុងប្រើប្រាស់បណ្តាញសង្គមខាងលើនេះដែរ។ គណបក្សនេះបានបង្ហោះ និងចែករំលែករូបភាព និងវីដេអូអំពីសកម្មភាពឃោសនាគណបក្សខ្លួនដែលពាក់ឯកសណ្ឋាន មួកនិងនិមិត្តសញ្ញាគណបក្សដែលមានរូបទេវតាបាចផ្កា ព្រមទាំងគាស់កកាយអំពីសមិទ្ធិផលល្អៗ ដែលបង្កើតដោយរដ្ឋាភិបាលក្នុងអាណត្តិមុនៗ រួមទាំងប្រកាសគោលជំហរនយោបាយជាពាក្យកាព្យ ឬសារខ្លីៗថា នឹងមិនផ្លាស់ប្តូរលេខ៤ចេញឡើយ។

ទោះជាបែបនេះក្តី លោកផៃ ស៊ីផាន រដ្ឋលេខាធិការនិងជាអ្នកនាំពាក្យទីស្តីការគណៈរដ្ឋមន្ត្រី និងជាមន្ត្រីរបស់គណបក្សប្រជាជនកម្ពុជា នៅតែគិតថា បណ្តាញសង្គមមិនមានឥទ្ធិពលខ្លាំងដល់លទ្ធផលបោះឆ្នោតនោះទេ។

លោកបកស្រាយថា៖ «ហ្វេសប៊ុក (Facebook)ជាប្រព័ន្ធព័ត៌មានមួយដែលទាំងអស់គ្នាមានសេរីភាពក្នុងការបញ្ចេញយោបល់រៀងៗខ្លួន ជាពិសេសបានបង្ហាញនូវអ្វីដែលជាសមិទ្ធិផលរបស់គណបក្សប្រជាជន។ វាមិនអាចធ្វើឲ្យមានការផ្លាស់ប្តូរច្រើនទេ។

បណ្តាញសង្គមគ្រាន់តែជាចំណែកមួយចំនួនជាមួយសកម្មភាពយុវជនផ្សព្វផ្សាយព័ត៌មានរបស់គណបក្ស។ ក៏ប៉ុន្តែអំណាចរបស់គណបក្សប្រជាជនគឺនៅនឹងមូលដ្ឋាន តាមរយៈការចុះជាប់នឹងប្រជាពលរដ្ឋអស់រយៈពេល៥ឆ្នាំកន្លងមកនេះ និងសមិទ្ធិផលមើលឃើញជាក់ស្តែងនឹងភ្នែកនៃការអភិវឌ្ឍ»។

លោក រិន សំណាង ជាអ្នកប្រើប្រាស់បណ្តាញសង្គមម្នាក់ ព្រមទាំងជាអ្នកគាំទ្រគណបក្សប្រជាជនកម្ពុជាផងដែរ។

លោកបានបង្ហាញរូបផ្ទាល់ខ្លួនលើទំព័រហ្វេសប៊ុក (Facebook) ដោយពាក់អាវ និងមួកដែលមាននិមិត្តសញ្ញាគណបក្សប្រជាជនកម្ពុជា។

លោកថ្លែងថា៖ «ធម្មតាទេ Profile Facebook ជាProfile ផ្ទាល់ខ្លួនដែលខ្ញុំអាចបង្ហាញនូវការពេញចិត្តរបស់ខ្ញុំ។ ខ្ញុំទទួលស្គាល់ថា ពិតជាមានអ្នកខ្លះគេអត់ពេញចិត្តគណបក្សប្រជាជនកម្ពុជា។ វាជាសិទ្ធិរបស់ខ្ញុំក្នុងការស្រឡាញ់គណបក្ស»។

នៅប្រទេសកម្ពុជា អ្នកប្រើប្រាស់បណ្តាញសង្គមមានចំនួនកាន់តែច្រើនទៅៗ ស្របពេលដែលបណ្តាញអ៊ីនធើណែតមានភាពទូលំទូលាយជាងមុន៕

អ្នកប្រើប្រាស់ ហ្វេសប៊ុក (Facebook) នៅកម្ពុជាមានរហូតដល់ជាង៧៨០ ០០០នាក់ នេះបើយោងតាមរបាយការណ៍ចុងក្រោយបំផុតដែលផ្សព្វផ្សាយដោយគេហទំព័របស់ហ្វេសប៊ុក (Facebook)នៅឆ្នាំ២០១៣នេះ។ រីឯអ្នកប្រើប្រាស់ប្រព័ន្ធអ៊ីនធើណែតមានចំនួន១០ភាគរយនៃចំនួនប្រជាពលរដ្ឋកម្ពុជាសរុប១៤លាននាក់។

ទោះបីជាយ៉ាងណាក៏ដោយ គេសង្កេតឃើញថា មានគណបក្សចំនួនតែពីរខាងលើគឺគណបក្សសង្គ្រោះជាតិ និងគណបក្សប្រជាជនកម្ពុជាប៉ុណ្ណោះដែលកំពុងតែប្រើប្រាស់បណ្តាញសង្គមសម្រាប់ជាជំនួយដល់ការឃោសនានយោបាយរបស់ខ្លួនក្នុងពេលនេះ។

រីឯអ្នកទទួលខុសត្រូវគណបក្សផ្សេងៗទៀតហាក់ដូចជាមិនសូវចាប់អារម្មណ៍ទៅលើហ្វេសប៊ុក (Facebook)ណាស់ណាទេ ដោយពួកគេយល់ឃើញថា ចំនួនអ្នកប្រើហ្វេសប៊ុក (Facebook) នៅតូចចង្អៀតនៅឡើយ។

ដោយប្រៀបធៀបទៅនឹងប្រព័ន្ធផ្សព្វផ្សាយផ្សេងទៀត លោកខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យមានប្រសាសន៍ថា៖ «ការផ្សព្វផ្សាយទៅដល់ប្រជាពលរដ្ឋ[តាមរយៈហ្វេសប៊ុក (Facebook)នៅមានទំហំតូចជាងប្រព័ន្ធផ្សព្វផ្សាយដទៃទៀត ដូចជាវិទ្យុជាដើម»។

លោកសេក សុជាតិ ជាប្រធានយុវជនគណបក្សហ៊្វុនស៊ីនប៉ិច។លោកបង្ហាញទស្សនៈស្រដៀងគ្នានេះដែរថា ជាទូទៅការប្រើប្រាស់បណ្តាញសង្គមគ្រាន់តែមួយផ្នែកតែប៉ុណ្ណោះ។ មធ្យោបាយក្នុងការបញ្ជូនសារនយោបាយដ៏សំខាន់របស់គណបក្សនេះគឺតាមរយៈការចុះចែកខិតបណ្ណផ្ទាល់ដល់ភូមិ ឃុំ។

លោកនិយាយថា៖ «អ្វីដែលមិនសូវសំខាន់មួយផ្នែកគឺសំដៅទៅលើបណ្តាប្រជាពលរដ្ឋនៅតាមទីជនបទ ពុំមានប្រព័ន្ធបច្ចេកទេសប្រើប្រាស់ឡើយ»។

ម្យ៉ាងទៀត លោកសុជាតិយល់ឃើញថា ជាទូទៅ គណបក្សផ្សេងប្រើហ្វេសប៊ុក (Facebook)ដើម្បីរិះគន់ ឈ្នានីស ឬវាយប្រហារគណបក្សដទៃទៀត។

មេដឹកនាំគណបក្សនយោបាយតូចៗដទៃទៀតដែលកំពុងស្ថិតក្នុងការប្រកួតប្រជែងក៏មិនបានប្រើប្រាស់ឱកាសក្នុងបណ្តាញសង្គមដែរ។

លោកសេង សុខខេង ប្រធានគណបក្សសញ្ជាតិកម្ពុជា បានឲ្យដឹងថា ដោយសារតែគណបក្សលោកទើបតែបង្កើតថ្មីក្នុងអាណត្តិនេះ ទើបបានជារៀបចំមិនទាន់នូវការឃោសនាតាមបណ្តាញសង្គម។ យ៉ាងណាមិញ លោកនឹងប្រើប្រាស់បណ្តាញសង្គមនាអាណត្តិក្រោយៗ។ ចំណែកឯប្រធានគណបក្សខ្មែរអភិវឌ្ឍន៍សេដ្ឋកិច្ចគឺលោកហួន រាជចំរើនបានលើកឡើងថា ការឃោសនាតាមបណ្តាញសង្គមមិនចាំបាច់ឡើយចំពោះគណបក្សរបស់លោក។

លោកង៉ែត ម៉ូសេ មន្ត្រីសម្របសម្រួលផ្នែកទំនាក់ទំនងនៃមជ្ឍមណ្ឌលអប់រំច្បាប់សម្រាប់សហគមន៍ និងជាអ្នកសកម្មម្នាក់ក្នុងបណ្តាញសង្គម បានឲ្យដឹងថា បណ្តាញសង្គមនារដូវកាលឃោសនាបោះឆ្នោតនេះមិនមែនជាកម្មសិទ្ធិរបស់គណបក្សកាន់អំណាច ឬគណបក្សប្រឆាំងណាមួយឡើយ តែជាទីកន្លែងដែលប្រជាពលរដ្ឋអាចទទួលព័ត៌មាន ស្តាប់ ឬមើលឃើញនូវសកម្មភាពរបស់គណបក្ស ដើម្បីឲ្យពួកគាត់អាចសម្រេចចិត្តជ្រើសរើសអ្នកដឹកនាំ។

លោកម៉ូសេបានបង្ហាញទស្សនៈរបស់លោកថា បណ្តាញសង្គមជាអាវុធមុខពីរ។
លោកនិយាយថា៖ «ល្អម៉្យាង ហើយអាក្រក់ម៉្យាង អាស្រ័យលើអ្នកប្រើប្រាស់។ ល្អត្រង់ថា វាជាកន្លែងចែកចាយ និងទទួលព័ត៌មាន។ អាក្រក់នៅត្រង់ការប្រើប្រាស់ភាសា ប្រើពាក្យអសុរស។ ការឃើញភ្លាម សរសេរភ្លាម អាចបង្កការយល់ច្រឡំ។ មួយវិញទៀតគឺការកាត់តរូបភាព ឬវីដេអូដើម្បីវាយប្រហារអ្នកដទៃជាដើម»។

លោកម៉ូសេសំណូមពរឲ្យអ្នកប្រើប្រាស់បណ្តាញសង្គមទាំងអស់ចៀសវាងនូវការប្រើប្រាស់ភាសា ឬសារនយោបាយណាដែលបង្កឲ្យមានការស្អប់ខ្ពើម ឬរើសអើងគ្នា៕

ប្រភពពី វីអូអេខ្មែរ

ច្បាប់ពត័មានជាតិ

ជនជាតិវៀតណាមសម្រុកចូលមកកម្ពុជា

at 9:03 PM No comments:

ចុចស្តាប់សំឡេង

មន្ត្រីសង្កេតការណ៍បោះឆ្នោតនៃអង្គការក្រៅរដ្ឋាភិបាលមួយ បានកត់សម្គាល់ឃើញថា មានជនអន្តោប្រវេសន៍វៀតណាម រាប់ពាន់នាក់បានចូលមកតាមច្រកទ្វារអន្តរជាតិកម្ពុជា-វៀតណាម ក្នុងខេត្តរតនគិរី ខណៈដែលប្រទេសកម្ពុជា កំពុងរៀបចំបោះឆ្នោតជ្រើសតាំងតំណាងរាស្ត្រអាណត្តិទី៥នេះ។

សមត្ថកិច្ចប៉ូលិសអន្តោប្រវេសន៍ច្រកទ្វារអន្តរជាតិស្រុកអូរយ៉ាដាវ ទទួលស្គាល់ថា ក្រុមជនជាតិវៀតណាម ដែលចូលមកកម្ពុជានេះ មួយផ្នែកជាអ្នកទេសចរ និងមួយផ្នែកទៀត ជាកម្មករបច្ចេកទេសចូលមកធ្វើការសម្រាប់ក្រុមហ៊ុនសម្បទានសេដ្ឋកិច្ចចម្ការកៅស៊ូ។

មន្ត្រីអង្គការក្រៅរដ្ឋាភិបាលមួយអំពាវនាវឲ្យអាជ្ញាធរខេត្តរតនគិរី ស៊ើបអង្កេតជាបន្ទាន់ពីសកម្មភាពហូរចូលនៃជនជាតិវៀតណាម ទាំងនោះ ដែលគេសង្ស័យថា ក្រុមហ៊ុនសម្បទានសេដ្ឋកិច្ចវៀតណាម នាំចូលមកធ្វើជាកម្មករនៅតាមចម្ការកៅស៊ូនៅខេត្តរតនគិរីនេះ។

លេខាគណៈកម្មការដើម្បីការបោះឆ្នោតដោយសេរីនិងយុត្តិធម៌នៅកម្ពុជា ហៅកាត់ថា ខុមហ្វ្រែល (Comfrel) ប្រចាំខេត្តរតនគិរី លោក ជូន ភីនដារ៉ា នៅថ្ងៃព្រហស្បតិ៍ ទី១៨ ខែកក្កដា មានប្រសាសន៍បញ្ជាក់ថា រថយន្តប្រភេទបើស (BUS) ដឹកអ្នកដំណើរពីប្រទេសវៀតណាម ជាក្រុមៗ បានដឹកជញ្ជូនជនជាតិវៀតណាម ឆ្លងកាត់តាមច្រកទ្វារអន្តរជាតិនេះក្នុងមួយលើកៗមានគ្នាប្រមាណ ៥០នាក់ ទៅ ៦០នាក់ ចូលមកក្រុងបានលុង ខេត្តរតនគិរី ប៉ុន្តែគេមិនឃើញជនជាតិវៀតណាម ទាំងនោះមកកាន់ខេត្តនេះជាអ្នកទេសចរនោះទេ។

លោកបន្តថា ការដឹកជញ្ជូនជនជាតិវៀតណាមនេះ ធ្វើឡើងមួយសប្ដាហ៍ពីរ ឬ បីលើក តាំងពីពាក់កណ្ដាលខែមិថុនា មកម្ល៉េះ៖ «បើសិនជាមកដើរទេសចរ អាហ្នឹងវាមានប៉ាសស្ព័រទេសចរ គេត្រូវដើរមើលឯណាឯណីហើយ។ អានេះចូលបាត់ៗ អ៊ីចឹងមកធ្វើកម្មករគេ មកមួយសាបីឡានអ៊ីចឹង ហាហុកសិបៗអ៊ីចឹង ជាងមួយខែហើយ រាប់ពាន់នាក់។ ឡានប្រភេទទេសចរណ៍ ឡានវៀតណាម»។

ទាក់ទងការអះអាងនេះ ប្រធានប៉ូលិសអន្តោប្រវេសន៍ច្រកទ្វារអន្តរជាតិអូរយ៉ាដាវ ខេត្តរតនគិរី លោក ឡុង រុក្ខា ទទួលស្គាល់ថា ពិតជាមានពលរដ្ឋវៀតណាម ឆ្លងកាត់ច្រកទ្វារនេះមែន ប៉ុន្តែលោកថា ពួកគេមានលិខិតឆ្លងដែនត្រឹមត្រូវខ្លះចូលមកអ្នកទេសចរ ខ្លះជាបុគ្គលិកបច្ចេកទេសមកធ្វើការសម្រាប់ក្រុមហ៊ុនសម្បទានសេដ្ឋកិច្ចនៅក្នុងខេត្តនេះ ប៉ុន្តែពួកគេបានវិលត្រឡប់ទៅប្រទេសវៀតណាម វិញជាបន្តបន្ទាប់៖ «ឥឡូវយើងលើកលែងទិដ្ឋាការ ភ្ញៀវឡើងចុះៗ រដូវនេះលក្ខណៈគេមកសួរសុខទុក្ខក្រុមគ្រួសារគេដែលមកធ្វើការនៅបណ្ដាក្រុមហ៊ុនវិនិយោគណា!»។

ដូចគ្នានេះដែរ ប្រធានការិយាល័យប៉ូលិសអន្តោប្រវេសន៍នៃស្នងការដ្ឋានប៉ូលិសខេត្តរតនគិរី លោក មឿង ខេម មានប្រសាសន៍បញ្ជាក់ថា មិនមានជនជាតិវៀតណាម ណាម្នាក់ចូលមកបម្រើការជាកម្មករចម្ការកៅស៊ូក្រុមហ៊ុនវៀតណាម ខុសច្បាប់ក្នុងខេត្តនេះទេ។

លោកអះអាងថា កម្មករបច្ចេកទេសវៀតណាម មានប្រមាណ ១០ភាគរយនៃចំនួនកម្មករខ្មែរដែលបម្រើការងារក្នុងក្រុមហ៊ុនសម្បទានចម្ការកៅស៊ូរបស់ក្រុមហ៊ុនវៀតណាម៖ «អត់មានទេ យើងបានត្រួតពិនិត្យជាអចិន្ត្រៃយ៍តាមបណ្ដាក្រុមហ៊ុនអ្នកមកវិនិយោគជាពលករ ឬកម្មករជំនាញ គឺគាត់មកមានលិខិតឆ្លងដែនត្រឹមត្រូវ មានវីសាស្នាក់នៅ មានប័ណ្ណការងារសៀវភៅការងារ»។

យ៉ាងនេះក្តី កម្មករខ្មែរសុំមិនបញ្ចេញឈ្មោះមួយរូបកំពុងបម្រើការក្នុងក្រុមហ៊ុនចម្ការកៅស៊ូវៀតណាម នៅខេត្តរតនគិរី ឲ្យដឹងថា កម្មករវៀតណាម ត្រូវគេនាំចូលមកធ្វើការនៅក្រុមហ៊ុនចម្ការកៅស៊ូវៀតណាម រាប់រយនាក់ច្រើនជាងកម្មករខ្មែរ។

ស្ថិតិរបស់ការិយាល័យប៉ូលិសអន្តោប្រវេសន៍ខេត្តរតនគិរី ចាប់ពីខែមករា ឆ្នាំ២០១៣ រហូតបច្ចុប្បន្ន មានកម្មករបរទេសរួមមាន វៀតណាម ចិន អូស្ត្រាលី សរុប ២៨៨នាក់ចូលមកធ្វើការជាកម្មករបច្ចេកទេសក្នុងក្រុមហ៊ុនជាង ២០ នៅក្នុងខេត្តនេះ។ ក្នុងនោះ ៩០ភាគរយ ជាជនជាតិវៀតណាម។ចំណែកជនអន្តោប្រវេសន៍វៀតណាម ដែលកំពុងស្នាក់នៅក្នុងខេត្តនេះមាន ២៧២ មានសមាជិកសរុប ៦៥៥នាក់៕

ប្រភពពី RFA

all entries politic

តំណាងរាស្ត្របក្សសង្គ្រោះជាតិចោទបក្សប្រជាជនថាជាដើមហេតុបង្កហិង្សា

at 9:01 PM No comments:

បេក្ខជនតំណាងរាស្ត្រមណ្ឌលខេត្តកណ្ដាល មកពីគណបក្សសង្គ្រោះជាតិ បានចោទប្រកាន់ក្រុមឃោសនារបស់គណបក្សប្រជាជនកម្ពុជា ថាគឺជាដើមហេតុដែលជំរុញឲ្យមានអំពើហិង្សាកើតឡើង។ ជាមួយគ្នានោះដែរ គណៈកម្មការរៀបចំការបោះ ឆ្នោតឃុំ និងគណៈកម្មការ រៀបចំការបោះឆ្នោតខេត្ត
ក៏
ត្រូវរងការចោទប្រកាន់ដែរថា ពុំមានសមត្ថភាពដើម្បីបញ្ចប់ជម្លោះ ទើបបណ្ដាលឲ្យមានវិវាទនេះកើតឡើង។

បេក្ខជនតំណាងរាស្ត្ររបស់គណបក្សសង្គ្រោះជាតិ បានចេញផ្សាយលិខិតចំហមួយចោទប្រកាន់ថា ចេតនារំខានរបស់សមាជិកគណបក្សប្រជាជនកម្ពុជា និងការខ្វះសមត្ថភាពរបស់មន្ត្រីរៀបចំការបោះឆ្នោតឃុំ និងស្រុកពញាឮ ខេត្តកណ្ដាល នាំឲ្យមានអំពើហិង្សាកើតឡើងក្នុងអំឡុងយុទ្ធនាការឃោសនាបោះឆ្នោត។

លិខិតចុះថ្ងៃទី១៨ កក្កដា របស់បេក្ខជនតំណាងរាស្ត្រគណបក្សសង្គ្រោះជាតិ លោក អេង ឆៃអៀង ឲ្យដឹងថា ព្រឹត្តិការណ៍ដែលបានកើតឡើងនៅស្រុកពញាឮ ខេត្តកណ្ដាល កាលពីថ្ងៃទី១៥ កក្កដា គឺបង្កឡើងដោយក្រុមសមាជិកគណបក្សប្រជាជនកម្ពុជា។ លិខិតបន្តថា ក្រុមនេះបង្កើតឡើងសម្រាប់ចាំអុកឡុក និងរំខានសកម្មភាពឃោសនារបស់គណបក្សសង្គ្រោះជាតិ ជាបន្តបន្ទាប់។

លិខិតឲ្យដឹងទៀតថា អ្នកដែលទទួលខុសត្រូវចំពោះអំពើហិង្សាដែលបានកើតឡើងនេះ គឺជាបន្ទុករបស់មន្ត្រីគណៈកម្មការខេត្តកណ្ដាល រៀបចំការបោះឆ្នោត និងមន្ត្រីឃុំរៀបចំការបោះឆ្នោត ដែលពុំមានសមត្ថភាពក្នុងការចាត់វិធានការដោះស្រាយដោយប្រសិទ្ធភាព។

ម្យ៉ាងវិញទៀត អនុប្រធានគណៈកម្មការប្រតិបត្តិស្រុកពញាឮ ខេត្តកណ្ដាល របស់គណបក្សសង្គ្រោះជាតិ លោក ស៊ិន សីហា បញ្ជាក់ថា នៅថ្ងៃកើតហេតុ លោក ប៊ុត សាខន សកម្មជនគណបក្សសង្គ្រោះជាតិ ដែលត្រូវសមត្ថកិច្ចចាប់ខ្លួន កាលពីថ្ងៃទី១៧ កក្កដា ពុំបានស្ថិតនៅក្នុងព្រឹត្តិការណ៍នោះទេ។ លោកចាត់ទុកថា ការចាប់ខ្លួនសកម្មជនរបស់បក្សប្រឆាំងនេះ ធ្វើឡើងក្រោមហេតុផលនយោបាយ៖ «នេះនិយាយទៅដូចគំរាមខាងនយោបាយ ខាងសង្គ្រោះជាតិ ខ្ញុំមិនឲ្យយុវជនដទៃទៀត ហ៊ានងើបក្បាលដើម្បីចូលរួមដង្ហែគណបក្សសង្គ្រោះជាតិ»។

លោក ប៊ុត សាខន អាយុប្រហែល ២០ឆ្នាំ ត្រូវបានសមត្ថកិច្ចស្រុកពញាឮ ចាប់ខ្លួនដោយពុំមានដីកា កាលពីថ្ងៃទី១៧ កក្កដា។ ហើយបានបញ្ជូនភ្លាមៗ ក្រោយពីការចាប់ខ្លួនបន្តទៅឃុំនៅពន្ធនាគារខេត្តកណ្ដាល គិតមកដល់ថ្ងៃទី១៨ កក្កដា ដែលជាប់សង្ស័យថាបានបង្កហិង្សាប្រឆាំងក្បួនឃោសនារបស់គណបក្សប្រជាជនកម្ពុជា កាលពីថ្ងៃទី១៥ កក្កដា។

ក៏ប៉ុន្តែ ករណីនេះត្រូវបានប្រធានប្រតិបត្តិគណៈកម្មការស្រុកពញាឮ របស់គណបក្សសង្គ្រោះជាតិ លោក ភួង សុខា ឲ្យដឹងថា សកម្មជនគាំទ្រគណបក្សគ្រប់គ្រងអំណាច គ្រោះថ្នាក់នោះ គឺធ្លាក់ពីលើម៉ូតូដោយខ្លួនឯងក្នុងពេលឃោសនា និងព្យាយាមរំខានក្បូនដង្ហែរបស់បក្សសង្គ្រោះជាតិ ជាច្រើនដង។

ប្រធានគណៈកម្មការរៀបចំការបោះឆ្នោតខេត្តកណ្ដាល លោក គឹម ហុង អះអាងថា លោកពុំមានពេលវេលាដើម្បីបំភ្លឺបញ្ហានេះទេ ព្រោះជាប់រវល់ប្រជុំ៖ «ខ្ញុំកំពុងប្រជុំគ្នា កំពុងប្រជុំមនុស្សច្រើនពេក ស្ដាប់អត់ឮទេ»។

លិខិតចុះថ្ងៃទី១៨ កក្កដា របស់លោក អេង ឆៃអៀង បញ្ជាក់ថា ស្រុកពញាឮ ជាភូមិសាស្ត្រមួយដែលត្រូវរងការរំខានជាញឹកញាប់ពីគណបក្សប្រជាជនកម្ពុជា ក្នុងពេលបើកយុទ្ធនាការឃោសនាបោះឆ្នោត។ ការអុកឡុកនេះ កើតឡើងជាបន្តបន្ទាប់ចាប់ពីឆ្នាំ២០០៨ ការបោះឆ្នោតឃុំសង្កាត់ឆ្នាំ២០១២ និងយុទ្ធនាការឃោសនាបោះឆ្នោតឆ្នាំ២០១៣។ អង្គការសង្គមស៊ីវិល ដែលធ្វើការពាក់ព័ន្ធនឹងការបោះឆ្នោត ចាត់ទុកថា ដំណើរការបោះឆ្នោតនៅកម្ពុជា ត្រូវគេរកឃើញថា នៅតែមិនទាន់មានភាពចាស់ទុំផ្នែកនយោបាយនៅឡើយ៕

ប្រភពពី RFA

ជម្លោះដីធ្លី ពត័មានជាតិ

អ្នកបឹងកក់ស្នើក្រសួងព័ត៌មានពិនិត្យការផ្សាយរបស់ទូរទស្សន៍ឯកជនមួយចំនួន

at 9:01 PM No comments:

អ្នកភូមិបឹងកក់ ដែលធ្លាប់តែតវ៉ានៅមុខសាលារាជធានីភ្នំពេញ មុខភូមិគ្រឹះលោកនាយករដ្ឋមន្ត្រី ឬនៅតាមស្ថានទូតផ្សេងៗ ឥឡូវបានប្ដូរទិសដៅកន្លែងតវ៉ាហើយ។ នៅព្រឹកថ្ងៃទី១៨ កក្កដា ក្រុមអ្នកភូមិបឹងកក់ បានជួបជុំគ្នានៅមុខក្រសួងព័ត៌មាន ទាមទាររកចំណាត់ការពីក្រសួង ចំពោះស្ថានីយទូរទស្សន៍ក្នុងស្រុកមួយចំនួនដែលពួកគេចោទថា កំពុងផ្សព្វផ្សាយព័ត៌មានមិនពិត និងមិនអព្យាក្រឹត្យ ជុំវិញបញ្ហាដីធ្លីរបស់អ្នកភូមិបឹងកក់។

«សំឡេងតវ៉ា»

នេះជាសំឡេងរបស់អ្នកភូមិបឹងកក់ ប្រមាណជិត ១០០នាក់ ដែលបានប្រមូលផ្តុំគ្នានៅមុខក្រសួងព័ត៌មាន នៅព្រឹកថ្ងៃទី១៨ កក្កដា នេះ តវ៉ាទាមទារឲ្យក្រសួងត្រួតពិនិត្យលើការផ្សាយរបស់ស្ថានីយទូរទស្សន៍ឯកជនមួយចំនួន អំពីបញ្ហាដីធ្លីអ្នកភូមិបឹងកក់ ដោយពួកគេបានចោទប្រកាន់ថា ទូរទស្សន៍ទាំងនោះមិនមានភាពឯករាជ្យ អព្យាក្រឹត្យ និងមានចរិតញុះញង់បំបែកបំបាក់បំភ្លៃខុសពីការពិត។

ក្នុងការតវ៉ានោះ អ្នកភូមិបឹងកក់ បានធ្វើរូបទូរទស្សន៍ក្រដាសតំណាងឲ្យស្ថានីយទូរទស្សន៍ឯកជនមួយចំនួន ដូចជា ទូរទស្សន៍ ស៊ី.អិន.ស៊ី (CNC) បាយ័ន អប្សរា ជាដើម។ អ្នកភូមិបឹងកក់ ទាំងនោះចោទថា ស្ថានីយទូរទស្សន៍ទាំងអស់នោះបានផ្សព្វផ្សាយពីរឿងរ៉ាវដីធ្លីអ្នកភូមិបឹងកក់ ដោយលម្អៀងទៅក្រុមម្ខាងទៀតដែលបានផ្តាច់ខ្លួន និងប្រឆាំងក្រុម អ្នកស្រី ទេព វន្នី។

តាមរយៈញត្តិដែលអ្នកភូមិទាំងនោះបានដាក់ជូនក្រសួងព័ត៌មាន បានឲ្យដឹងថា ក្នុងរយៈពេលជាង ១០ថ្ងៃកន្លងមកនេះ មានបណ្ដាញទូរទស្សន៍ឯកជនមួយចំនួនបានរៀបចំថតឈុតឆាកសម្ដែង ដែលនិយាយពីរឿងមិនពិតក្នុងសហគមន៍បឹងកក់ ដែលរៀបចំដោយក្រុមបក្ខពួកក្រុមហ៊ុន និងក្រុមមន្ត្រីពុករលួយ។ ការផ្សាយនោះ មានចរិតញុះញង់បំបែកបំបាក់ដល់សាមគ្គីភាពក្នុងសហគមន៍ បំភិតបំភ័យ បង្កចលាចលក្នុងសហគមន៍ ក្នុងគោលបំណងលេបត្របាក់យកដីតំបន់បឹងកក់។

សម្រែកតវ៉ានេះ បានបន្តរហូតដល់ម៉ោង ១០ព្រឹក ពេលដែលក្រសួងព័ត៌មាន ចាត់អ្នកតំណាងម្នាក់ឲ្យចេញមកទទួលយកញត្តិរបស់អ្នកភូមិបឹងកក់ និងបានអនុញ្ញាតឲ្យអ្នកភូមិបីនាក់ចូលជួបតំណាងរបស់ក្រសួង។

ក្រោយពីបានចូលជួបមន្ត្រីក្រសួងព័ត៌មាន រួចមក តំណាងអ្នកភូមិបឹងកក់ អ្នកស្រី ទេព វន្នី បានឲ្យដឹងពីលទ្ធផលនៃការជួបចរចានោះថា តំណាងក្រសួងព័ត៌មាន លោក ចាន់ គឹមស៊ា បានជម្រាបដល់អ្នកភូមិបឹងកក់ ថា ក្នុងករណីពួកគាត់រកឃើញថា ស្ថានីយទូរទស្សន៍ទាំងនោះផ្សាយព័ត៌មានទាក់ទងនឹងបញ្ហាដីធ្លីរបស់អ្នកភូមិបឹងកក់ ដោយប្រាសចាកពីច្បាប់ស្ដីពីរបបសារព័ត៌មាន អ្នកភូមិបឹងកក់ អាចដាក់ញត្តិមកកាន់ក្រសួងព័ត៌មាន ម្តងទៀត ហើយក្រសួងនឹងផ្ញើលិខិតទៅអគ្គនាយកស្ថានីយទូរទស្សន៍ទាំងនោះ ឲ្យគោរពតាមច្បាប់ស្ដីពីរបបសារព័ត៌មាន និងក្រមសីលធម៌វិជ្ជាជីវៈអ្នកសារព័ត៌មាន ឬពួកគាត់អាចដាក់ពាក្យបណ្ដឹងទៅតុលាការតែម្តង។

អ្នកស្រី ទេព វន្នី៖ «គាត់ថា បើសិនជាករណីបណ្ដាញសារព័ត៌មានក្នុងប្រទេស ជាពិសេសទូរទស្សន៍ទាំងអស់ ដែលប៉ុន្មានថ្ងៃនេះ គាត់ចាក់ផ្សាយព័ត៌មានមិនពិត និងភាពអយុត្តិធម៌មកលើរូបនាងខ្ញុំ ក៏ដូចអ្នកបឹងកក់ ដទៃទៀត ហើយផ្សាយបំផ្លើសពីការពិតហ្នឹង គឺថាអាចមានសិទ្ធិប្ដឹង ព្រោះអាហ្នឹងវាខុសពីវិជ្ជាជីវៈ ខុសនឹងច្បាប់សារព័ត៌មានដែលឯករាជ្យ និងយុត្តិធម៌ ហើយអាចដាក់ពាក្យប្ដឹងនៅកន្លែងគាត់ម្តងទៀត យកពាក្យបណ្ដឹងហ្នឹងប្ដឹងតែម្តង ដើម្បីគាត់អន្តរាគមន៍យកទៅអគ្គនាយកដ្ឋានបណ្ដាញទូរទស្សន៍ទាំងអស់នោះ ដើម្បីឲ្យត្រួតពិនិត្យឡើងវិញ និងចាត់វិធានការទៅលើករណីហ្នឹង»។

មន្ត្រីស៊ើបអង្កេតនៃអង្គការសិទ្ធិមនុស្សលីកាដូ (Licadho) លោក អំ សំអាត យល់ឃើញថា ស្ថាប័នសារព័ត៌មានគួរចេញផ្សាយនូវព័ត៌មានដែលមានតុល្យភាព មិនគួរផ្តល់ឱកាសឲ្យភាគីតែម្ខាងនោះទេ ប្រសិនបើរឿងរ៉ាវទំនាស់នោះមានភាគីពាក់ព័ន្ធច្រើន ទើបប្រជាពលរដ្ឋអាចវែកញែកថា ភាគីណាខុស ភាគីណាត្រូវ។

លោក អំ សំអាត៖ «ប្រទេសប្រជាធិបតេយ្យ ប្រព័ន្ធផ្សព្វផ្សាយវាជាកាតាលីករមួយដ៏សំខាន់ សម្រាប់ប្រជាពលរដ្ឋក្នុងការទទួលព័ត៌មាន ដោយគេហៅថា មានតុល្យព័ត៌មាន។ អ៊ីចឹង ការដែលសារព័ត៌មានមួយៗ យើងគិតហើយ អ្នកសារព័ត៌មានតែងតែមានក្រមសីលធម៌វិជ្ជាជីវៈ ប៉ុន្តែដើម្បីឲ្យព័ត៌មាននោះវាបានល្អ វាទាល់តែមានតុល្យភាព បានន័យថា បើអ្នកបឹងកក់ ហ្នឹង គាត់មានភាគី២ ឬភាគី៣ យើងត្រូវតែយកព័ត៌មានទាំងពីរ ទាំងបីក្រុមហ្នឹងយកទៅធ្វើការផ្សាយ ដើម្បីវិភាគទៅថា តើក្រុមណាមួយ ក្រុមណាមួយខុស ឬមួយក៏ក្រុមទាំងអស់ហ្នឹង គាត់ធ្វើការតវ៉ាហ្នឹងដើម្បីទាមទារអ្វី»។

រឿងរ៉ាវដីធ្លីរបស់អ្នកភូមិបឹងកក់ ជាមួយក្រុមហ៊ុនស៊ូកាគូ (Shukaku) មានអាយុកាល ៦ឆ្នាំហើយ។ នៅរយៈពេលចុងក្រោយនេះ សហគមន៍បឹងកក់ បានបែងចែកជាពីរក្រុមប្រឆាំងគ្នា ហើយកន្លងមក សាធារណជនទាំងឡាយមិនធ្លាប់បានឃើញស្ថានីយទូរទស្សន៍ក្នុងស្រុកណាមួយ ចាក់ផ្សាយពីការប្រើអំពើហិង្សារបស់អាជ្ញាធរមកលើក្រុមអ្នកតវ៉ាបញ្ហាដីធ្លីនោះទេ៕

ប្រភពពី RFA

ជម្លោះដីធ្លី ពត័មានជាតិ

ពលរដ្ឋបឹងកក់ស្នើក្រសួងព័ត៌មានរឿងបណ្តាញទូរទស្សន៍ផ្សាយញុះញង់

at 3:02 AM No comments:

ពលរដ្ឋបឹងកក់តវ៉ានៅមុខក្រសួងព័ត៌មាននៅព្រឹកថ្ងៃព្រហស្បតិ៍នេះ។ រូបថត ហេង ជីវ័ន

ភ្នំពេញៈ ប្រជាពលរដ្ឋបឹងកក់ ដែលមានជម្លោះដីធ្លីដ៏រ៉ាំងរ៉ៃអស់រយៈពេល៧ឆ្នាំមកហើយ បានចេញមកតវ៉ានៅមុខក្រសួងព័ត៌មាននៅព្រឹកថ្ងៃព្រហស្បតិ៍នេះ ស្នើឲ្យមានការត្រួតពិនិត្យលើការបណ្តាញទូរទស្សន៍ឯកជនមួយចំនួន ដែលមិនមានភាពឯករាជ្យ អព្យាក្រឹត្យ ក្នុងរឿងជម្លោះដីធ្លីតំបន់បឹងកក់ និងការកាត់ទោសអ្នកស្រីយ៉ោម បុប្ផា។

តំណាងប្រជាពលរដ្ឋបឹងកក់បានលើកឡើងក្នុងលិខិតដែលដាក់ជូនរដ្ឋមន្ត្រីក្រសួងព័ត៌មានឲ្យដឹងថា ក្នុងរយៈពេលជាង ១០ ថ្ងៃកន្លងមកនេះ មានបណ្តាញទូរទស្សន៍ឯកជនមួយចំនួន បានរៀបចំថតឈុតឆាកសម្តែង ដែលនិយាយពីរឿងមិនពិតក្នុងសហគមន៍បឹងកក់ ដែលរៀបចំដោយក្រុមបក្សក្រុមហ៊ុន និងក្រុមមន្ត្រីពុករលួយដែលមានចរិកញុះញង់ បំបែកបំបាក់ដល់សាមគ្គីភាពក្នុងសហគមន៍ បំភិតបំភ័យ បង្ករចលាចលក្នុងសហគមន៍ ក្នុងគោលបំណងលេបត្របាក់យកដីតំបន់បឹងកក់ ដោយមិនមានគោលបំណងឲ្យប្រជាពលរដ្ឋបានរស់នៅក្នុងតំបន់បឹងកក់ដូចតាមអនុក្រឹត្យលេខ ១៨៣ របស់រាជរដ្ឋាភិបាល វាហាក់បីដូចជាអនុក្រឹត្យនេះគ្រាន់តែជាការបោកប្រាស់ប្រជាពលរដ្ឋ។

លិខិតបន្តថា រឿងពិតនៃការឈឺចាប់របស់ប្រជាពលរដ្ឋក្នុងសហគមន៍ជាង ៧ ឆ្នាំមកហើយ ស្ថានីយទូរទស្សន៍ទាំងនោះ ព្រមទាំងស្ថានីយ៍ទូរទស្សន៍ជាតិ មិនដែលយកមកចាក់ផ្សាយឲ្យប្រជាពលរដ្ឋដឹងឡើយ។

ក្រុមប្រជាពលរដ្ឋបឹងកក់បានស្នើឲ្យក្រសួងព័ត៌មានចាត់វិធានការលើបណ្តាញផ្សព្វផ្សាយទាំងនោះ។

សូមរង់ចាំអានព័ត៌មានពិស្តារក្នុងកាសែតភ្នំពេញប៉ុស្តិ៍

ពត័មានជាតិ សង្គម

លោក សយ សុភាព ពិតជាកោរសក់មែនឬ?

at 3:00 AM No comments:

កាលពីពេលថ្មីៗនេះ លោក សយ សុភាព ត្រូវបានមហាជនសួរដេញដោលអំពីការវិភាគ និងការនិយាយរបស់លោកនៅតាមបណ្តាញស្ថានីយ៍ទូរទស្សន៍មួយចំនួនដែលលោក ធ្វើជាវាគ្មិន នាពេលកន្លងមក ដោយបានធ្វើការវិភាគអំពីការវិលត្រលប់មកកម្ពុជាវិញរបស់លោក សម រង្ស៊ី។

លោក សយ សុភាព ធ្លាប់បាននិយាយថា លោក សម រង្ស៊ីគ្មានឳកាសត្រូវបានលើកលែងទោស និងមិនហានត្រលប់ចូលមកក្នុងប្រទេសកម្ពុជាវិញឡើយ។ លោកបាននិយាយថា បើលោក សម រង្ស៊ី អាចវិលចូលក្នុងស្រុកខ្មែរវិញបាន លោកនឹងកោរសក់។

ចំពោះពាក្យសំដីរបស់លោកដែលបាននិយាយខាងលើនេះ មិនទាន់ត្រូវបានគេចាប់អារម្មណ៍ប៉ុន្មានទេ។ ប៉ុន្តែក្រោយពីមានព្រះរាជក្រឹត្យលើកលែងទោស និងដំណឹងពីការវិលត្រលប់របស់លោក សម រង្ស៊ី ធ្វើអោយអ្នកដែលតាមដានការវិភាគរបស់លោក សយ សុភាព ចាប់ផ្តើមសួរដេញដោល និងចំអកឡកឡើយដល់លោកថា “តើលោក សយ សុភាព ពិតជាហ៊ានកោរសក់ខ្លួនឯងមែនឬ?”

តាមអ្នកវិភាគស្ថានការណ៍នយោបាយមួយចំនួនបានលើកឡើងថា បរិបទនយោបាយក្នុងប្រទេសកម្ពុជាហាក់មានរបត់ខ្លាំងហួសពីការ គិតស្មានទៅទៀត ទាំងនាពេលកន្លងមក និងនាពេលបច្ចុប្បន្ននេះ ហើយពេលខ្លះក៏វាផ្ទុយស្រលះតែម្តងពីការវិភាគរបស់អ្នកជំនាញ ដូចជាលោក សយ សុភាព នេះជាដើម។ រហូតមកទល់ពេលនេះ គេពុំទាន់បានឃើញការចេញមកបកស្រាយណាមួយពីលោក សយ សុភាព ចំពោះពាក្យសំដីរបស់ខ្លួន និងការចំអកឡកឡើយនេះនៅឡើយទេ៕

all entries politic

និស្សិតត្រូវសាលាផ្តល់ប្រាក់ឲ្យមកជួយឃោសនាឲ្យ CPP

at 2:59 AM No comments:

ភ្នំពេញៈ និស្សិត សំ អាត (ឈ្មោះដាក់ជំនួសឈ្មោះពិត) អះអាងថា គេបានចូលរួមនៅក្នុងការប្រមូលផ្តុំការឃោសនាការបោះឆ្នោតឲ្យគណបក្សប្រជាជនកម្ពុជាចំនួនពីរលើក នៅក្នុងយុទ្ធនាការឃោសនាកន្លងមកនេះ។

សំអាតថាទាំងពីរលើកនេះខាងសាកលវិទ្យាល័យបានផ្តល់ប្រាក់កម្រៃសម្រាប់ការចូលរួម។

និស្សិតវ័យ២៣ឆ្នាំរូបនេះថ្លែងបន្តថា អ្នកគ្រប់គ្រងរដ្ឋបាលនៅវិទ្យាស្ថានសហប្រតិបត្តិការអន្តរជាតិកម្ពុជាដែលជាសាលាឯកជនគាត់រៀននៅរាជធានីភ្នំពេញ បានរៀបចំរថយន្តក្រុងសម្រាប់ដឹកក្រុមនិស្សិតទៅឃោសនា។

សំ អាត ថ្លែងនៅសប្តាហ៍នេះថា៖«ខាងរដ្ឋបាលវិទ្យាស្ថានបានប្រាប់និស្សិត[តាមថ្នាក់]ឲ្យមកចុះឈ្មោះស្ម័គ្រចិត្តទៅឃោសនាឲ្យគណបក្សប្រជាជន។ ពួកយើងត្រូវគេសន្យាថា នឹងទទួលបានប្រាក់៤ដុល្លារសម្រាប់ការចូលរួមមួយលើកៗហើយបើការទៅហែប៉ះត្រូវម៉ោងរៀន គេសន្យាថា នឹងមិនគូសអវត្តមានក្នុងបញ្ជីទេ»។

និស្សិត សំ អាត បន្តថា បន្ទាប់ពីការហែមួយលើកៗបុគ្គលិករដ្ឋបាលបានផ្តល់ប្រាក់ឲ្យគាត់ផ្ទាល់ដៃប៉ុន្តែមិនច្រើនដូចពីដំបូងទេ។

លោកបន្តថា ៖ «ខ្ញុំបានចូលរួមការហែបាន២ដង។ ប៉ុន្តែខ្ញុំទទួលបានប្រាក់តែ២,៥ដុល្លារប៉ុណ្ណោះសម្រាប់លើកទី១ និងប្រហែល២ដុល្លារសម្រាប់លើកទី២»។

និស្សិតម្នាក់ទៀត ឈ្មោះ សៀង (ឈ្មោះជំនួសឈ្មោះពិត)ដូច សំអាត ដែរគឺភ័យខ្លាចមានបញ្ហា ប្រសិនបើគេដឹងអំពីអត្តសញ្ញាណពិត។ គាត់និយាយថា៖«ខ្ញុំមិនដឹងថាហេតុអ្វីបានជារដ្ឋបាលសាលាជំរុញយើងឲ្យពាក់ព័ន្ធនៅក្នុងការឃោសនាបោះឆ្នោតរបស់គណបក្សប្រជាជនកម្ពុជា»។

ទោះយ៉ាងណាមិនដូច សំអាត ទេ និស្សិត សៀង បានបដិសេធមិនចូលរួមនៅក្នុងការឃោសនាការបោះឆ្នោតឡើយ។ គាត់ឲ្យដឹងបន្តថា៖ «សម្រាប់ខ្ញុំ ខ្ញុំមិនគិតថា នេះជាគំនិតល្អទេ»។ និស្សិតខ្លះបានស្ម័គ្រទៅពាក់ព័ន្ធព្រោះពួកគេត្រូវការលុយ។ សូម្បីតែមិត្តខ្ញុំ ក៏ស្ម័គ្រចិត្តចូលរួមដែរ»។

ក្នុងបទសម្ភាសផ្ទាល់កាលពីថ្ងៃអង្គារបុគ្គលិកម្នាក់នៅវិទ្យាស្ថានសហប្រតិបត្តិការអន្តរជាតិកម្ពុជា ដែលសុំមិនបញ្ចេញឈ្មោះ បានបដិសេធមិនឆ្លើយតបនឹងការលើកឡើងរបស់និស្សិតនេះទេ។

គាត់បានបង្វែរឲ្យសាកសួរទៅនាយកវិទ្យាស្ថានដែលលោកបដិសេធមិនអត្ថាធិប្បាយដូចគ្នា។

ចាប់តាំងពីយុទ្ធនាការឃោសនាបោះឆ្នោតចាប់ផ្តើមនាចុងខែមិថុនា និស្សិតរាប់ពាន់នាក់បានទៅចូលរួមហែក្បួនតាមផ្លូវនិងមានកាន់ទង់ជ័យបក្សហែផង។

ច្រើនលើកហើយយុវវ័យមួយចំនួនដែលចូលរួមការឃោសនាបោះឆ្នោតបានប្រាប់ភ្នំពេញ ប៉ុស្តិ៍ ថា ពួកគេទទួលបានប្រាក់កម្រៃ សម្រាប់ការចូលរួមឃោសនា។

សម្រាប់អ្នកគាំទ្រចៀសមិនផុតទេ ត្រូវពាក់មួកគណបក្សប្រជាជននិងបានប្រាក់៥ដុល្លារសម្រាប់ការចូលរួមមួយលើកៗ។

និស្សិតស្រីម្នាក់នៅសាកលវិទ្យាល័យភូមិន្ទភ្នំពេញ បានថ្លែងក្នុងការហែក្បួនឃោសនាកាលពីសប្តាហ៍មុនថា៖«យើងមកនេះជាមួយមេក្រុមតាមថ្នាក់រៀនយើង។ គ្រូចាត់ពួកគេមក ដើម្បីឲ្យប្រាកដថា យើងពិតជាបានមកចូលរួមការឃោសនាពិតមែន»។

ប៉ុន្តែនិស្សិតស្រីរូបនេះនិងមិត្តភក្តិនាងថា ពួកគេមិនបានរងការគំរាមកំហែងឬការបង្ខំឲ្យមកទេ។ តាមពិត ពួកគេជាអ្នកគាំទ្រលោកនាយករដ្ឋមន្រ្តី ហ៊ុន សែន ប៉ុន្តែក៏បានសារភាពថា គេមិនដឹងច្រើនទេ អំពីបញ្ហានយោបាយ។

នៅពេលដែលមានការប្រមូលផ្តុំរបស់គណបក្សប្រជាជនកម្ពុជានៅសួនច្បារវត្តបទុមនិស្សិតម្នាក់នៅសាកលវិទ្យាល័យឯកទេសនៃកម្ពុជានិយាយថា គាត់ចូលរួមហែក្បួន គឺព្រោះតែប្រាក់កម្រៃ។ គាត់ថា៖ «សាលាខ្ញុំឲ្យប្រាក់ខ្ញុំ៥ដុល្លារពេលត្រឡប់មកវិញ»។

នៅពេលទាក់ទងកាលពីម្សិលមិញបុគ្គលិកនៅសាកលវិទ្យាល័យទាំងពីរនេះថ្លែងថា ពួកគេពុំមានតួនាទីត្រូវធ្វើអត្ថាធិប្បាយទេ ខណៈក្រសួងអប់រំមិនអាចទាក់ទងសុំអត្ថាធិប្បាយបាន។

ប៉ុន្តែសមាជិកម្នាក់ក្នុងចំណោមនិស្សិតដែលភ្នំពេញ ប៉ុស្តិ៍ បានសម្ភាសក្រៅសាកលវិទ្យាល័យភូមិន្ទភ្នំពេញ កាលពីថ្ងៃអង្គារថ្លែងថា ពួកគេមិនបានឮថា បុគ្គលិកឬថ្នាក់ដឹកនាំណាបញ្ជាឲ្យនិស្សិតទៅឃោសនាបោះឆ្នោតទេ។

និស្សិត សុភ័ក្រ្ត រៀនផ្នែកទេសចរនៅសាកលវិទ្យាល័យជាតិគ្រប់គ្រង នៅជិតវត្តភ្នំ បានប្រាប់ថា នៅសាកលវិទ្យាល័យនេះក៏មានការបង្ខិតបង្ខំដែរ។

គាត់ប្រាប់ថា៖ «មិត្តភក្តិខ្ញុំមួយចំនួនដែលរៀននៅពេលព្រឹកនិយាយថា គ្រូៗបានជំរុញឲ្យពួកគេទៅឃោសនាឲ្យគណបក្សប្រជាជន។ ប៉ុន្តែគ្រូរបស់ខ្ញុំ គាត់មិនបានធ្វើអ៊ីចឹងទេ»។

ប៉ុន្តែ កញ្ញា ចាន់ បុត ជានិស្សិតផ្នែកធនាគារនិងហិរញ្ញវត្ថុ ឲ្យដឹងថា ថ្នាក់រៀននាងត្រូវគ្រូដាក់មេរៀនឲ្យរបៀបឃោសនាសម្រាប់គណបក្សកាន់អំណាច។ នាងបន្តថា៖«គ្រូខ្ញុំបានជំរុញយើងឲ្យចូលរួមការហែក្បួនគណបក្សប្រជាជននៅពេលយើងទំនេរ។ មិត្តរួមថ្នាក់របស់ខ្ញុំខ្លះបានស្ម័គ្រចិត្តចូលរួម ប៉ុន្តែ ខ្ញុំមិនស្ម័គ្រចិត្តទៅទេ»។

អគ្គលេខាធិការគណៈកម្មាធិការជាតិរៀបចំការបោះឆ្នោត លោក ទេព នីថា ថ្លែងកាលពីម្សិលមិញថា វាជាការខុសច្បាប់សម្រាប់គ្រូនៅសាលារដ្ឋ និងសាកលវិទ្យាល័យរដ្ឋ ដែលប្រើម៉ោងសិក្សាជំរុញឲ្យសិស្សនិស្សិតចូលរួមការហែក្បួនឃោសានាឲ្យគណបក្សនយោបាយ។ លោកបន្តថា៖ «នៅក្រៅម៉ោងសិក្សា ពួកគេអាចធ្វើបាន»។

លោកបន្តថា ប៉ុន្តែសាកលវិទ្យាល័យឯកជន ដូចជា វិទ្យាស្ថានសហប្រតិបត្តិការអន្តរជាតិកម្ពុជាគឺមិនត្រូវបានហាមឃាត់ដោយច្បាប់បោះឆ្នោតទេ។«ដូច្នេះ ម្ចាស់សាកលវិទ្យាល័យ អាចលើកទឹកចិត្តនិស្សិតខ្លួនឲ្យចូលរួមជាមួយគណបក្សគាត់បាន។ តែទោះជាយ៉ាងណា ប្រការនេះមិនមានន័យថា ពួកគេអាចផ្តល់ប្រាក់ឲ្យនិស្សិតធ្វើដូច្នេះទេ ហើយយើងមិនឃើញករណីសំណូកដែរ ក្នុងអំឡុងការបោះឆ្នោតនេះ»។

លោក ទេព នីថា បន្ថែមថា វាលំបាកប្រាប់ថា តើគ្រូឬថ្នាក់ដឹកនាំរបស់ក្រុមនិស្សិតដែលកំពុងផ្តល់សាំងឬអាហារដល់ពួកគេថា«មិនមែនជាសំណូក» ឬគ្រាន់តែជាការផ្តល់ប្រាក់ចាយវាយ។

តាមទ្រឹស្តី សាកលវិទ្យាល័យត្រូវបង្រៀននិស្សិតអំពីរបៀបគិតដោយឯករាជ្យ លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជាថ្លែងថា ការបញ្ចុះបញ្ចូលនិស្សិតទៅចូលរួមការប្រមូលផ្តុំអ្វីមួយគឺជារឿងធម្មតានៅកម្ពុជា។ លើសពីនេះវាកំពុងដាក់កំហិតទៅលើសេរីភាពការសិក្សា។

លោកបន្តថា ៖ «[ហេតុដូច្នេះ] វាក៏កំពុងដាក់កំហិតទៅលើការគិតបែបលក្ខណៈរិះគន់ទៅលើក្រុម និសិ្សតផងដែរ ហើយជាទូទៅកំពុងដាក់កំហិតទៅលើចំណេះដឹង និងការអប់រំ»។

លោក អ៊ូ វីរៈ បន្ថែមថា វាមិនមែនតែសិស្សទេ ដែលកំពុងរងសម្ពាធពីព្រោះថាគណបក្សប្រជាជនកម្ពុជាចង់ឲ្យគេឃើញថា ជា«គណបក្សសាធារណៈ» សូម្បីតែសាស្រ្តចារ្យក៏អ៊ីចឹងដែរត្រូវគេរំពឹងថា បង្ហាញការគាំទ្រចំពោះគណបក្សកាន់អំណាច។

នៅសាកលវិទ្យាល័យអាស៊ីអឺរ៉ុប រូបថតចំនួនបួនរបស់លោកនាយករដ្ឋមន្រ្តី ហ៊ុន សែន បានតាំងនៅលើជញ្ជាំងការិយាល័យរបស់ លោក ស៊ាង សុវណ្ណ ទីប្រឹក្សាផ្ទាល់របស់សាកលវិទ្យាធិការសាកលវិទ្យាល័យនេះនិងនៅកន្លែងផ្សេងទៀតក្នុងនោះរូបថតមួយ បានបិទក្នុងនាឡិកា។ សាកលវិទ្យាធិការសាកលវិទ្យាល័យអាស៊ីអឺរ៉ុប លោក ឌួង លាង អនុប្រធានសមាគមឧត្តមសិក្សាកម្ពុជាជាក្រុមគាំទ្រចំហទៅលើគោលនយោបាយអប់រំរបស់រដ្ឋាភិបាល។ ប៉ុន្តែ លោក សុវណ្ណ ថ្លែងថា បុគ្គលិកផ្នែកបង្រៀនក្នុងសាលាមិនបង្រៀនពីនយោបាយទេហើយសាកលវិទ្យាល័យជំរុញនិស្សិតឲ្យធ្វើសេចក្តីសម្រេចចិត្តខ្លួនឯង អំពីនយោបាយ។

លោកថា និស្សិតគួរតែផ្តោតទៅលើគណបក្សណាដែលនឹងនាំនូវ«សន្តិភាព និងការអភិវឌ្ឍ»សម្រាប់អនាគតពួកគេ។ លោកបន្តថា៖«ពួកគេជាទំពាំងស្នងឫស្សីរបស់ប្រទេសប្រសិនបើពួកគេមិនដឹងអំពីអនាគតនិងពីតួនាទីខ្លួន តើពួកគេអាចអភិវឌ្ឍប្រទេសយ៉ាងម៉េច?»។ស្រដៀងគ្នាដែរតំណាងរាស្រ្តគណបក្សប្រជាជនកម្ពុជា លោក ជាម យៀប បានបដិសេធថា គណបក្សលោកពុំមាននយោបាយផ្តល់ប្រាក់ដល់និស្សិតដែលមកចូលរួមការឃោសនាបោះឆ្នោតទេ។

លោកបានថ្លែងថា៖ «គណបក្សប្រជាជនកម្ពុជាបានពន្យល់ប្រជាជនអំពីគោលនយោបាយ ខ្លួនហើយប្រាប់យុវជនអំពីសិទ្ធិរបស់ពួកគេ…ដើម្បីជំរុញឲ្យពួកគេយល់ពីរបៀបធ្វើការអភិវឌ្ឍប្រទេសជាតិ»។

លោក ជាម យៀប បន្តថា លោកនាយករដ្ឋមន្រ្តី នៅគ្រប់ពិធីចែកសញ្ញាបត្រដល់និស្សិតតាមមហាវិទ្យាល័យ លោកតែងតែលើកអំពីតួនាទីយុវជន និងអំពីគោលនយោបាយដែលផ្សារភ្ជាប់ទៅនឹងការអភិវឌ្ឍប្រទេស ដើម្បីឲ្យយុវជនស្វែងយល់កាន់តែច្បាស់អំពីមាគ៌ាដឹកនាំនិងការអភិវឌ្ឍប្រទេសឆ្ពោះទៅកាន់នីតិរដ្ឋ និងការអភិវឌ្ឍ។

លោកអះអាងថា ៖«គណបក្សប្រជាជនកម្ពុជាពុំមានគោលនយោបាយផ្តល់ប្រាក់ដល់អ្នកស្ម័គ្រចិត្តចូលគាំទ្រក្នុងយុទ្ធនាការឃោសនារបស់គណបក្សខ្លួននោះទេ។ ប៉ុន្តែបញ្ហាខ្លះ ដែលចៀសពុំរួចដូចជាករណីអ្នកគាំទ្របានធ្វើដំណើរតាមម៉ូតូហើយ អស់សាំងដូច្នេះ ពួកគេត្រូវទទួលបានការផ្តល់ការឧបត្ថម្ភជាសាំង។ អ្នកគាំទ្រមួយចំនួនគឺក្រីក្រដូច្នេះក្រុមអ្នកដឹកនាំក្រុមអាចទិញអាហារ ដូចជា នំប៉័ង ទឹកសុទ្ធ ចែកដល់ពួកគេ។ នេះមិនមែនជាការទិញពួកគេឲ្យគាំទ្រទេ តែវាគឺជាសន្តានចិត្តរបស់ប្រជាពលរដ្ឋខ្មែរ»។

ទោះយ៉ាងណាក្តី លោកថ្លែងថា លោកមិនអាចធានាថា អ្នកចូលរួមគ្រប់ៗគ្នាជាមួយនឹងការឃោសនារបស់គណបក្សប្រជាជនកម្ពុជាមកចូលរួមដោយសុទ្ធចិត្តទេ។ លោកថា៖ «ប៉ុន្តែខ្ញុំអាចនិយាយថា ៩៨ ភាគរយ គឺមកដោយស្ម័គ្រចិត្ត»៕

ប្រភពពី ភ្នំពេញ ប៉ុស្តិ៍

ពត័មានជាតិ សង្គម

ប៉ូលិសព្រំដែនខេត្តរតនគិរីរងការចោទថាឲ្យពលរដ្ឋវៀតណាមស្នាក់នៅតំបន់ស

at 8:10 AM No comments:

នៅឯតំបន់ព្រំដែនកម្ពុជា-វៀតណាម ក្នុងខេត្តរតនគិរី មានសេចក្តីរាយការណ៍ចោទថា ប៉ូលិសការពារព្រំដែនបានអនុញ្ញាតឲ្យពលរដ្ឋវៀតណាម មួយគ្រួសារ បោះជំរុំស្នាក់នៅតំបន់ស។ ការអនុញ្ញាតឲ្យពលរដ្ឋវៀតណាម មកបោះជំរុំនោះ ធ្វើឲ្យពលរដ្ឋវៀតណាម ផ្សេងទៀតមកស្នាក់នៅជំរុំនោះ ដើម្បីកាប់ឈើក្នុងដីខ្មែរ។

ចុចស្តាប់សំឡេង

ច្បាប់ជម្លោះដីធ្លី នយោបាយ ពត័មានជាតិ

និស្សិតមួយចំនួន បញ្ចេញទស្សនៈលើការទាមទារកោះត្រល់មកវិញ

at 7:52 AM No comments:

ថ្មីៗនេះ បញ្ហាកោះត្រល់ ត្រូវបានជីកកកាយឡើងវិញពីសំណាក់សង្គមស៊ីវិល និងគណបក្សប្រឆាំង ដោយស្នើឲ្យរដ្ឋាភិបាលកម្ពុជា សាកល្បងប្រើផ្លូវច្បាប់ ដើម្បីទាមទារកោះត្រល់មកវិញ។

និស្សិតមួយចំនួន ដែលកំពុងសិក្សានៅមហាវិទ្យាល័យក្នុងរាជធានីភ្នំពេញ បានបង្ហាញពីទស្សនៈលើកោះត្រល់នេះ ដោយចង់ឲ្យមានការទាមទារមកវិញ ប្រសិនបើអាចធ្វើបាន៖ស្ដាប់សំឡេង {audio}audio/news/july2013/130701-liny-VOX-POX-ON-KOH-TRAL.MP3{/audio}

ថ្មីៗនេះ ភស្តុតាងចំនួនពីរ ដែលបង្ហាញថា កោះត្រល់ ត្រូវបានបាត់បង់ក្រោយឆ្នាំ១៩៨០ គឺឯកសារជាសៀវភៅ និងសម្តីសាក្សីនៅសាលាក្តីខ្មែរក្រហម។

កាលពីថ្ងៃទី១៧ ខែមិថុនា ក្រុមប្រឹក្សាឃ្លាំមើលកម្ពុជា(CWC) បានលើកយកឯកសារសៀវភៅមេរៀនភូមិវិទ្យាថ្នាក់ទី៧នៃសម័យសាធារណរដ្ឋប្រជាមានិតកម្ពុជា(១៩៧៩ដល់១៩៨៩) ដែលបង្ហាញពីប្រវត្តិកោះខ្មែរមួយចំនួន ត្រូវបានបាត់បង់ ពិសេសកោះត្រល់ ដែលមានន័យថា កោះត្រល់ គឺទើបតែបាត់បង់ក្រោយឆ្នាំ១៩៨០នោះទេ។

ភស្តុតាងមួយទៀត គឺកាលពីថ្ងៃទី១៥ ខែសីហា ឆ្នាំ២០១២ សាក្សីជាអតីតអ្នកធ្លាប់បំពេញការងារនៅក្រសួងឃោសនាការ ក្នុងសម័យកម្ពុជាប្រជាធិបតេយ្យ អ្នកស្រី ស សៀក ហៅស៊ីម បានប្រាប់សវនាការសាលាក្តីខ្មែរក្រហមថា នៅក្នុងសម័យ ប៉ុល ពត(១៩៧៥-១៩៧៩) ទាហានវៀតណាម បានចូលវាយយកកោះត្រល់។ អ្នកស្រីបន្តថា មេដឹកនាំក្នុងរបបខ្មែរក្រហម បានអំពាវនាវឲ្យប្រជាជនខ្មែរចូលរួមវាយវៀតណាម នៅពេលដែលទាហានវៀតណាមវាយកាន់កាប់កោះត្រល់ ៖ “យួនឈ្លានពាន ពេលនោះប្រជាជនខ្លាចបាត់បង់ទឹកដី ដូច្នេះវិទ្យុតែងតែមានការអប់រំ មានការដើម្បីដាស់អារម្មណ៍ឲ្យមានការឈឺចាប់ ការពារទឹកដីខ្លួនឯង”។

ពាក់ព័ន្ធនឹងកោះត្រល់នេះ កាលពីថ្ងៃទី០៩ ខែសីហា ឆ្នាំ២០១២ លោកនាយករដ្ឋមន្ត្រី ហ៊ុន សែន បានចូលបំភ្លឺក្នុងរដ្ឋសភាថា ការបាត់បង់កោះត្រល់ គឺបាត់តាំងពីឆ្នាំ១៩៣៩ មកម្ល៉េះ នៅពេលដែលកម្ពុជានៅក្រោមអាណានិគមបារាំង ហើយត្រូវបាន លោក Previe(ប្រេវីយេ) ជនជាតិបារាំង ជាអ្នកគ្រប់គ្រងនៅតំបន់ឥណ្ឌូចិន បានកាត់កោះនោះឲ្យវៀតណាម។ លោកនាយករដ្ឋមន្ត្រី ក៏បានបន្ថែមថា អតីតព្រះមហាក្សត្រ ដែលជាអ្នកដឹកនាំប្រទេសនៅពេលនោះក៏ទទួលស្គាល់ថា កោះត្រល់ត្រូវបានប្រគល់ឲ្យវៀតណាមដែរ ហើយលោកនាយករដ្ឋមន្ត្រី ថា ប្រសិនបើនរណាចង់ដណ្តើមយកកោះត្រល់វិញទៅដណ្តើមខ្លួនឯងចុះ លោកមិនទៅចូលរួមទេ ៖ “បន្ទាប់មកនៅឆ្នាំ១៩៦៤ សម្តេចព្រះ នរោត្តម សីហនុ ព្រះប្រមុខរដ្ឋនាពេលនោះ បានយកខ្សែប្រេវីយេឆ្នាំ១៩៣៩ ទៅតម្កល់នៅអង្គការសហប្រជាជាតិ ដោយស្នើសុំឲ្យអន្តរជាតិ និងប្រទេសសាម៉ី ទទួលស្គាល់ថាជាព្រំដែនសមុទ្ររវាងព្រំដែនកម្ពុជានិងវៀតណាម ចំណុចចុងក្រោយនេះ មានន័យថា កម្ពុជាឈប់ទាមទារយកកោះត្រល់មកវិញហើយ”។

ឯកសារបង្ហាញថា កោះត្រល់ ដែលវៀតណាម ហៅថា ភូក្វុក(Phu Quoc) មានផ្ទៃដីទំហំ៥៤០គីឡូម៉ែត្រក្រឡា ជិតស្មើនឹងប្រទេសសិង្ហបុរី ដែលមានទំហំ ៥៨១គីឡូម៉ែត្រក្រឡា៕

ប្រភពពី - VoD

all entries politic

តុលាការកោះហៅលោក សួង សុភ័ណ្ឌ ទាក់ទងរឿងប្ដឹងលោក ហ៊ុន សែន

at 7:51 AM No comments:

តុលាការរាជធានីភ្នំពេញ កោះហៅបេក្ខភាពតំណាងរាស្រ្តមណ្ឌលប៉ៃលិន របស់បក្សសង្គ្រោះជាតិ លោក សួង សុភ័ណ្ឌ ឲ្យទៅបំភ្លឺនៅព្រឹកថ្ងៃ១ ខែកក្កដា ជុំវិញពាក្យបណ្ដឹងរបស់លោកដែលបានប្ដឹងលោកនាយករដ្ឋមន្ត្រី ហ៊ុន សែន ពីបទក្លែងឯកសារសាធារណៈ ដែលនាំឲ្យមានការហូរចូលជនអន្តោប្រវេសន៍វៀតណាម មករស់នៅក្នុងប្រទេសកម្ពុជា ដោយខុសច្បាប់។

លោក សួង សុភ័ណ្ឌ ដែលឈរជាបេក្ខជនតំណាងរាស្ត្រមណ្ឌលប៉ៃលិន របស់គណបក្សសង្គ្រោះជាតិ បានប្រគល់ភស្តុតាងសំខាន់២ ទៅឲ្យព្រះរាជអាជ្ញារងសាលាដំបូងរាជធានីភ្នំពេញ នៅថ្ងៃទី១ ខែកក្កដា ពាក់ព័ន្ធនឹងបណ្ដឹងដែលបានប្ដឹងទៅលោកនាយករដ្ឋមន្ត្រី ហ៊ុន សែន។

ភស្តុតាងទាំងពីរនោះ រួមមានខ្សែអាត់ជាសំឡេងសារភាពផ្ទាល់របស់លោក ហ៊ុន សែន ក្នុងទសវត្ស៩០ ដែលបានសារភាពថា លោកជាអាយ៉ងរបស់វៀតណាម ក្រោយឆ្នាំ១៩៧៩ ហើយលោកគ្មានសិទ្ធិអំណាចរារាំងមិនឲ្យជនជាតិវៀតណាម ចូលមករស់នៅក្នុងទឹកដីខ្មែរបានទេ។ ភស្តុតាងមួយទៀត លោក សួង សុភ័ណ្ឌ ស្នើសុំឲ្យតំណាងអយ្យការចេញដីកានាំខ្លួនជនជាតិវៀតណាម ១០រូប មកពីសង្កាត់ទន្លេបាសាក់ ៥រូប និងសង្កាត់ជ្រោយចង្វារ ៥រូប ដើម្បីជាភស្តុតាងរស់ក្នុងសវនាការ។

លោក សួង សុភ័ណ្ឌ៖ «នៅពេលឃោសនាបោះឆ្នោតលោកនាយករដ្ឋមន្ត្រី ហ៊ុន សែន មិនមែនជានាយករដ្ឋមន្ត្រីទៀតទេ គឺជាបេក្ខភាពតំណាងរាស្ត្រអស់សិទ្ធិជានាយករដ្ឋមន្ត្រីហើយ ដូច្នេះត្រូវតែមកជួបជជែកតវ៉ាជាមួយខ្ញុំនៅក្នុងតុលាការ។ ខ្ញុំជឿថា លោកស្រី ស៊ឺ វណ្ណនី ប្រហែលជាត្រូវបានខ្លាចនូវអំណាចរបស់រដ្ឋាភិបាល ខ្លាចអំណាចរបស់នាយករដ្ឋមន្ត្រីហើយ។ ខ្ញុំអាចសន្និដ្ឋានថា ការមកបំភ្លឺនេះប្រហែលជាមិនចាត់ការដូចលើកមុន តែខ្ញុំជឿជាក់ថា តុលាការនិងលោក ហ៊ុន សែន ដែលចិត្តសឿងក្រឡុកអ្នកនយោបាយបក្សប្រឆាំងកន្លងមកច្រើននោះ ហើយលោកត្រូវតែចិត្តសឿងមកប្រឈម ហើយកុំធ្វើដូចបណ្ដឹងមុនៗទៀត»។

ជាលើកដំបូងហើយដែលតុលាការរាជធានីភ្នំពេញ កោះហៅលោក សួង សុភ័ណ្ឌ ឲ្យចូលបំភ្លឺក្នុងបណ្ដឹងរបស់លោក កាលពីថ្ងៃទី២០ ខែមិថុនា ដែលបានប្ដឹងលោក ហ៊ុន សែន ថាជាអ្នកផ្ដើមគំនិតរួមដៃជាមួយបក្ខពួករបស់ខ្លួន បណ្ដោយឲ្យជនជាតិវៀតណាម ចូលមករស់នៅកម្ពុជា ដោយខុសច្បាប់ ហើយមានសិទ្ធិកាន់អត្តសញ្ញាណប័ណ្ណ ដើម្បីចូលរួមបោះឆ្នោតថែមទៀត។

បន្ទាប់ពីបណ្ដឹងលើកទី១របស់លោកត្រូវបានតុលាការតម្កល់ទុកឥតចាត់ការពាក់ព័ន្ធលោក ហ៊ុន សែន ឲ្យទទួលខុសត្រូវចំពោះការរត់ជាន់គ្នាស្លាប់នៅលើស្ពានកោះពេជ្រជាង ៣៥០នាក់ នៅថ្ងៃទី៣ ក្នុងពិធីបុណ្យអុំទូកកាលពីឆ្នាំ២០១០។

វិទ្យុអាស៊ីសេរីមិនអាចទាក់ទងព្រះរាជអាជ្ញារងសាលាដំបូងរាជធានីភ្នំពេញ លោកស្រី ស៊ឺ វណ្ណនី បានទេនៅថ្ងៃទី១ ខែកក្កដា ដោយលោកស្រីមិនលើកទូរស័ព្ទ។

យ៉ាងណា លោក សួង សុភ័ណ្ឌ សង្ឃឹមថា បណ្ដឹងរបស់លោកលើកនេះ អាចនឹងដំណើរការទៅមុខរហូតឈានដល់ការបើកសវនាការ ហើយតុលាការនឹងកោះហៅនាយករដ្ឋមន្ត្រី ហ៊ុន សែន ឲ្យបំភ្លឺដូចគ្នាក្នុងនាមជាចុងចម្លើយលើបណ្ដឹងនេះដែរ។

មន្ត្រីនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ហាក់មិនចាប់អារម្មណ៍ចំពោះនីតិវិធីរបស់តុលាការដែលផ្ដើមសាកសួរលោក សួង សុភ័ណ្ឌ ដែលហ៊ានប្ដឹងប្រមុខរដ្ឋាភិបាលនោះទេ។

លោកក៏មិនប្រាកដថា រដ្ឋាភិបាលនឹងចាត់វិធានការតបយ៉ាងណានោះទេក្នុងរឿងនេះ ព្រោះជាសមត្ថកិច្ចរបស់តុលាការ៖ «អានេះជានីតិវិធី ហើយនឹងយល់របៀបម៉េចជាការវិនិច្ឆ័យរបស់តុលាការ ខ្ញុំអត់មានដែនសមត្ថកិច្ច ឬសិទ្ធិនៅក្នុងការលូកលាន់នៅក្នុងរឿងនោះទេ។ តើធាតុប៉ុន្មានដែលអាចគួបផ្សំក្នុងកិច្ចពង្រឹង សុពលភាពក្នុងការពាក្យបណ្ដឹងអាហ្នឹងជាការវិនិច្ឆ័យរបស់តុលាការ»។

ពាក់ព័ន្ធនឹងបញ្ហានេះ គេហទំព័ររបស់ ហ្គូហ្គល (Google) បានចេញផ្សាយក្នុងរបាយការណ៍របស់ខ្លួនថា ជនអន្តោប្រវេសន៍វៀតណាម រស់នៅក្នុងទឹកដីកម្ពុជា មានចំនួន ៦០ម៉ឺននាក់។ ក៏ប៉ុន្តែលោក ហ៊ុន សែន អះអាងកាលពីថ្ងៃទី១៩ ខែមិថុនា ថា ជនជាតិវៀតណាម រស់នៅក្នុងប្រទេសកម្ពុជា មានប្រមាណ ១០ម៉ឺននាក់ប៉ុណ្ណោះ៕

ប្រភពពីវិទ្យុអាស៊ីសេរី

ច្បាប់នយោបាយ ពត័មានជាតិ

កម្ពុជាលុបចោលបម្រាមការផ្សាយមុនពេលបោះឆ្នោតជាតិ

at 10:52 PM No comments:

វ៉ាស៊ីនតោន — រដ្ឋាភិបាលកម្ពុជាបានអនុញ្ញាតជាថ្មីឱ្យមានការផ្សាយបន្តតាមស្ថានីយវិទ្យុអេហ្វអឹមក្នុងស្រុកនូវកម្មវិធីរបស់វិទ្យុបរទេសផ្សាយជាភាសាខ្មែរដែលមានដូចជាវិទ្យុវីអូអេនិងវិទ្យុអាស៊ីសេរី បន្ទាប់ពីមានការជំទាស់យ៉ាងខ្លាំងក្លាពីសហរដ្ឋអាមេរិកនិងសហគមន៍អន្តរជាតិ។

នេះជាការសម្រេចដែលបញ្ច្រាសទៅនឹងការហាមឃាត់ដែលបានចេញកាលពីប៉ុន្មានថ្ងៃមុនដែលដាក់បម្រាមចំនួន៣១ថ្ងៃសម្រាប់អំឡុងពេលឃោសនាបោះឆ្នោតនិងថ្ងៃបោះឆ្នោត។

នៅក្នុងសេចក្តីប្រកាសព័ត៌មានមួយដែលបានផ្សាយតាមទូរទស្សន៍ជាតិកម្ពុជានៅយប់ថ្ងៃសៅរ៍បានបញ្ចាក់ថា៖ «យោងតាមសំណូមពរសុំឱ្យក្រសួងព័ត៌មានអនុញ្ញាតឱ្យមានការចាក់ផ្សាយឡើងវិញនូវការផ្សាយបន្តរបស់វិទ្យុបរទេសជាខេមរភាសាតាមរយៈវិទ្យុអេហ្វអឹមក្នុងស្រុក ក្រសួងព័ត៌មានសម្រេចអនុញ្ញាតឱ្យវិទ្យុអេហ្វអឹមទាំងអស់ដែលជួលម៉ោងផ្សាយបន្តឱ្យស្ថានីយវិទ្យុបរទេសបន្តការផ្សព្វផ្សាយតាមធម្មតាដូចដើមឡើងវិញចាប់ពីពេលនេះតទៅ»។

សេចក្តីប្រកាសនោះក៏បន្ថែមទៀតថា សេចក្តីណែនាំចុះថ្ងៃទី២១ខែមិថុនារបស់លោកខៀវ កាញារិទ្ធរដ្ឋមន្ត្រីក្រសួងព័ត៌មានគឺនៅមានសុពលភាពដដែល។

«ទន្ទឹមនឹងនេះ ក្រសួងព័ត៌មានសូមឱ្យប្រព័ន្ធផ្សព្វផ្សាយព័ត៌មានទាំងអស់ត្រូវយកចិត្តអនុវត្តតាមសេចក្តីណែនាំរបស់ក្រសួងព័ត៌មានលេខ០៤ពមសណន ចុះថ្ងៃទី២១ខែមិថុនាឆ្នាំ២០១៣ដែលចុះហត្ថលេខាដោយឯកឧត្តមខៀវ កាញារិទ្ធ រដ្ឋមន្ត្រីក្រសួងព័ត៌មាន»។

នៅក្នុងសេចក្តីណែនាំរបស់លោក ខៀវ កាញារិទ្ធ បានប្រាប់គ្រប់បណ្តាញឃោសនាឱ្យ«បញ្ឈប់ការផ្សព្វផ្សាយនិងការផ្សាយបន្តពីវិទ្យុបរទេសទាំងអស់ ពីការស្ទង់មតិ លទ្ធផលនៃការស្ទង់មតិដែលទាក់ទងនឹងដំណើរការបោះឆ្នោតក្នុងរយៈពេល៥ថ្ងៃមុនថ្ងៃបោះឆ្នោតនិងថ្ងៃបោះឆ្នោត រួមទាំងបញ្ឈប់ការផ្សព្វផ្សាយពីសកម្មភាពឃោសនាអ្វីទាំងអស់អំឡុងពេល២៤ម៉ោងមុនថ្ងៃបោះឆ្នោតនិងថ្ងៃបោះឆ្នោត»។

ការផ្សាយរបស់វីអូអេត្រូវបានដកចេញពីស្ថានីយដៃគូក្នុងស្រុករបស់ខ្លួនដែលមានវិទ្យុសំបុកឃ្មុំអេហ្វអឹម១០៥ វិទ្យុរបស់មណ្ឌលព័ត៌មានស្រ្តីអេហ្វអឹម១០២ និងអង្គររដ្ឋាអេហ្វអឹម៩៥,៥នៅថ្ងៃសុក្រនិងថ្ងៃសៅរ៍បន្ទាប់ពីមានលិខិតមួយចុះថ្ងៃទី២៥ខែមិថុនាដោយលោកអ៊ុក ប្រាថ្នា រដ្ឋមន្ត្រីស្តីទីនៃក្រសួងព័ត៌មានបញ្ជាមិនឱ្យស្ថានីយទាំងនោះបន្តផ្សាយលើរលកធាតុអាកាសរបស់ខ្លួនហើយគំរាមថាបើមិនអនុវត្តតាមអាចប្រឈមមុខនឹងវិធានការតាមផ្លូវច្បាប់។

លិខិតនោះត្រូវស្ថានីយវិទ្យុអេហ្វអឹមក្នុងស្រុកនានាទទួលបានយ៉ាងតក់ក្រហល់នៅរសៀលថ្ងៃសុក្រទី២៨ខែមិថុនា ហើយម្ចាស់ស្ថានីយបានបង្ខំចិត្តផ្អាកការផ្សាយបើទោះបីជាត្រូវប្រឈមមុខនឹងកង្វះកម្មវិធីដែលត្រូវមកបំពេញម៉ោងនោះ។

អ្នកប្រើប្រាស់បណ្តាញសង្គមខ្មែរមានប្រតិកម្មរិះគន់ភ្លាមៗនៅលើទំព័រ Facebook របស់វីអូអេ ទៅនឹងព័ត៌មាននៃបម្រាមរបស់ក្រសួងព័ត៌មាន។ (២៩ មិថុនា ២០១៣)

ការហាមឃាត់នោះបាននាំឱ្យមានការតវ៉ានិងថ្កោលទោសពីសហគមន៍អន្តរជាតិ ក្រុមការពារសិទ្ធិមនុស្ស អ្នកស្តាប់វិទ្យុនិងអ្នកដែលប្រើប្រាស់បណ្តាញសង្គមហ្វេសប៊ុក (Facebook) ជាដើម រហូតដល់មានការប្រកាសធ្វើយុទ្ធនាការតាមប្រព័ន្ធហ្វេសប៊ុកអំពាវនាសុំមិនឱ្យបោះឆ្នោតឱ្យគណបក្សកាន់អំណាចបើសិទ្ធិសេរីភាពជាមូលដ្ឋានរបស់ពួកគេត្រូវបានដកហូតតាំងពីមុនពេលការបោះឆ្នោតមកដល់។

កាលពីថ្ងៃសុក្រ សហរដ្ឋអាមេរិកបានថ្កោលទោសប្រទេសកម្ពុជាក្នុងការហាមប្រាមមិនឱ្យផ្សព្វផ្សាយបន្តកម្មវិធីវិទ្យុបរទេសនៅតាមស្ថានីយអេហ្វអឹមក្នុងពេលយុទ្ធនាការបោះឆ្នោតថាជាការរំលោភធ្ងន់ធ្ងរនឹងសេរីភាពសារព័ត៌មាននិងសេរីភាពបញ្ចេញមតិធ្ងន់ធ្ងរ ហើយបានព្រមានថា ចំណាត់ការនេះនឹងនាំឱ្យការបោះឆ្នោតនេះមិនមានលក្ខណៈគួរឱ្យជឿទុកចិត្តបាន។

ក្រសួងការបរទេសសហរដ្ឋអាមេរិកក៏បានទទូចឱ្យរដ្ឋាភិបាលកម្ពុជាពិចារណាឡើងវិញនូវការសម្រេចចិត្តរបស់ខ្លួន។

លោក Patrick Ventrell អ្នកនាំពាក្យក្រសួងការបរទេសបានប្រាប់ក្រុមអ្នកសារព័ត៌មានថា៖ «ក្នុងខណៈពេលដែលមន្ត្រីរាជរដ្ឋាភិបាលកម្ពុជានៅកម្រិតកំពូលបានសម្តែងជាសាធារណៈនូវចេតនាក្នុងការរៀបចំការបោះឆ្នោតមួយដែលសេរីនិងយុត្តិធម៌ ការរឹតត្បិតសារព័ត៌មាននេះនិងការខិតខំប្រឹងប្រែងដទៃទៀតក្នុងការកំហិតសេរីភាពនៃការបញ្ចេញមតិធ្វើឱ្យមានការសង្ស័យដល់ចេតនានិងភាពគួរឱ្យជឿទុកចិត្តបាននៃដំណើរការរៀបចំការបោះឆ្នោតនេះ»។

ព័ត៌មានពីការហាមឃាត់នោះបានត្រូវផ្សព្វផ្សាយយ៉ាងរហ័សដោយសារតែបណ្តាញផ្សព្វផ្សាយឯករាជ្យដែលមានតែពីរបីសម្រាប់កម្ពុជាបានប្រឈមមុខនឹងការបំបិទមាត់ក្នុងពេលដែលកម្ពុជាកំពុងធ្វើការឃោសនាបោះឆ្នោតដ៏សំខាន់មួយ។

គណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន និងអ្នកគាំទ្ររបស់លោកគ្រប់គ្រងបណ្តាញផ្សព្វផ្សាយដែលមានវិទ្យុនិងទូរទស្សន៍ស្ទើរតែទាំងអស់ក្នុងប្រទេស។

ការបោះឆ្នោតជ្រើសរើសតំណាងរាស្ត្រអណត្តិទី៥នឹងប្រព្រឹត្តទៅនៅ ថ្ងៃទី២៨ខែកក្កដាខាងមុខនេះហើយការឃោសនាបានចាប់ផ្តើមកាលពីថ្ងៃទី២៧ខែមិថុនាមក។ មានគណបក្សនយោបាយចំនួន៨បានចុះឈ្មោះចូលរួមការបោះឆ្នោតនេះប៉ុន្តែគេសង្កេតឃើញមានតែគណបក្សពីរប៉ុណ្ណោះដែលមានសំទុះខ្លាំងជាងគេគឺគណបក្សប្រជាជនកម្ពុជានិងគណបក្សសង្គ្រោះជាតិរបស់លោកសម រង្ស៊ីនិងលោកកឹមសុខា។

លោក ស្ទីវ រ៉េដឌីស (Steve Redish) និពន្ធនាយករបស់វីអូអេបានថ្កោលទោសចំពោះកិច្ចខិតខំប្រឹងប្រែងណាមួយក្នុងការបំបិតមាត់សារព័ត៌មាន។

លោករ៉េដឌីសបានបន្ថែមថា ដំណឹងនិងព័ត៌មានដែលមានតុល្យភាពត្រឹមត្រូវនិងគួរឱ្យទុកចិត្តបានគឺមានសារៈសំខាន់ណាស់ដែលត្រូវការជាចាំបាច់នៅមុនការបោះឆ្នោត។

លោកបានបន្ថែមថា៖ «ការសម្រេចដកកម្មវិធីរបស់វីអូអេចេញពីស្ថានីយអេហ្វអឹមក្នុងប្រទេសកម្ពុជាគឺជាការដកហូតនូវសិទ្ធិរបស់អ្នកស្តាប់មិនឱ្យដឹងនូវព័ត៌មាននិងដំណឹងដ៏សំខាន់នៅមុនពេលការបោះឆ្នោតជាតិនៅថ្ងៃទី២៨ខែកក្កដា»។

រីឯគណៈអភិបាលផ្នែកការផ្សាយវិញដែលជាស្ថាប័នគ្រប់គ្រងរបស់វិទ្យុវីអូអេនិងអាស៊ីសេរី កាលពីថ្ងៃសុក្រក៏បានថ្កោលទោសការហាមប្រាមនោះដែរហើយក៏បានដាក់ចេញ វិធានការបន្ទាន់ភ្លាមៗក្នុងការបន្ថែមរលកធាតុអាកាសផ្សាយ។

លោកវិកទ័រ អែស (Victor Ashe) ដែលជាអភិបាលមួយរូបបានបញ្ជាក់ថា៖
«ការបដិសេធចោលនូវសិទ្ធិពលរដ្ឋក្នុងការទទួលបានដំណឹងនិងព័ត៌មានក្នុងពេលដ៏សំខាន់នេះគឺជាការប្រមាថដល់ភាពស្របច្បាប់របស់ខ្លួនឯងនិងជាការបដិសេធចោលដោយអត់អៀនខ្មាស់នូវលទ្ធិប្រជាធិបតេយ្យដែលកម្ពុជាខ្លួនឯងជាអ្នកសម្រេចយក»។

លោកអភិបាលវិកទ័រ អែស បានបន្ថែមថាពេលដែលលោកទៅទស្សនកិច្ចប្រទេសកម្ពុជាក្នុងខែឧសភាកន្លងមក លោកបានជួបជាមួយថ្នាក់ដឹកនាំខាងអង្គការសង្គមស៊ីវិលនិងបណ្តាញព័ត៌មាន ហើយលោកបានដឹងថា តើអ្នកទាំងនោះពឹងផ្អែកលើការផ្សាយរបស់វីអូអេនិងអាស៊ីសេរីយ៉ាងណា។

ទោះជាយ៉ាងណាក៏ដោយ ក៏គណៈកម្មាធិការជាតិរៀបចំការបោះឆ្នោត (គជប) យល់ថា ពលរដ្ឋនៅតែអាចទទួលព័ត៌មានតាមប្រភពផ្សេងៗបានហើយការហាមឃាត់មិនប៉ះពាល់ដល់លទ្ធផលឆ្នោតទេ។

លោក ទេព នីថា អគ្គលេខាធិការនៃគជបបានបញ្ជាក់ប្រាប់វីអូអេនៅយប់ថ្ងៃសៅរ៍មុនពេលដែលមានសេចក្តីសម្រេចរបស់ក្រសួងព័ត៌មានថា៖ «ខ្ញុំគិតថាមិនមែនជាមូលហេតុប៉ុណ្ណឹងដែលអាចវាយតម្លៃការទទួលព័ត៌មានអំពីអ្នកបោះឆ្នោតនៅប្រទេសកម្ពុជាថាខ្វះខាតនោះទេ ព្រោះថាប្រព័ន្ធផ្សព្វផ្សាយក្នុងស្រុកក៏មានច្រើនដែរ ហើយម៉្យាងទៀតការផ្សព្វផ្សាយពីបរទេសគាត់មានគោលនយោបាយរបស់គាត់ដោយឡែកអញ្ចឹងទេអាចមួយចំណែកនោះវាប៉ះពាល់ដល់គណបក្សនយោបាយដែលកំពុងប្រកួតប្រជែងដែលកំពុងធ្វើការឃោសនានៅប្រទេសកម្ពុជា»។

លោកម៉ម សុណង់ដូនាយកវិទ្យុសំបុកឃ្មុំអេហ្វអឹម១០៥បានប្រាប់វីអូអេថាលោកបានដឹងពីការប្រកាសលើកលែងបម្រាមរបស់រដ្ឋាភិបាលហើយ ហើយលោកនឹងដាក់ផ្សាយកម្មវិធីរបស់វីអូអេឡើងវិញដូចធម្មតា៕

សចេក្តីណែនាំរបស់ក្រសួងព័ត៌មានឲ្យម្ចាស់ស្ថានីយវិទ្យុអេហ្វអឹមក្នុងស្រុកផ្អាកការផ្សាយកម្មវិធីបន្តពីវិទ្យុបរទេស។

ប្រភពព័ត៌មានពី៖ VOA

ជម្លោះដីធ្លី ពត័មានជាតិ

អ្នកបឹងកក់៖ ក្រសួងព័ត៌មានបំបិទសិទ្ធិនិងសំឡេងអ្នករងគ្រោះ

at 10:50 PM No comments:

ប្រជាពលរដ្ឋដែលនិយមតាមដានស្ដាប់វិទ្យុអន្តរជាតិផ្សាយជាខេមរភាសាកាន់តែច្រើនឡើង បានប្រតិកម្មចំពោះក្រសួងព័ត៌មាន និងរាជរដ្ឋាភិបាល ថាបានបំបិទសិទ្ធិសេរីភាពក្នុងការទទួលព័ត៌មាន និងរំលោភច្បាប់រដ្ឋធម្មនុញ្ញដែលជាច្បាប់កំពូលរបស់កម្ពុជា។

ប្រជាពលរដ្ឋបានហៅសេចក្ដីណែនាំរបស់ក្រសួងព័ត៌មាន ដែលបានហាមមិនឲ្យវិទ្យុអែហ្វអឹម (FM) ក្នុងស្រុកផ្សាយបន្តកម្មវិធីព័ត៌មានជាភាសាខ្មែររបស់វិទ្យុបរទេស ថារឹតត្បិតសិទ្ធិសេរីភាពរបស់ពលរដ្ឋក្នុងការទទួលព័ត៌មានធ្ងន់ធ្ងរ ហើយទាមទារឲ្យមានការដោះស្រាយបញ្ហានេះជាបន្ទាន់។

ប្រជាពលរដ្ឋរស់នៅតំបន់បឹងកក់ មានគម្រោងជួបជុំគ្នាហែញត្តិតវ៉ាទៅក្រសួងព័ត៌មាន ទាក់ទងជាមួយការហាមវិទ្យុអែហ្វអឹម ក្នុងស្រុកផ្សាយបន្តវិទ្យុបរទេសដែលផ្សាយជាខេមរភាសា ក្នុងឱកាសយុទ្ធនាការឃោសនាបោះឆ្នោត ៣១ថ្ងៃ និងក្នុងថ្ងៃបោះឆ្នោត។

សកម្មជនការពារដីធ្លីនៅតំបន់បឹងកក់ អ្នកស្រី ទេព វន្នី មានប្រសាសន៍ថា គ្រួសារអ្នកស្រី និងអ្នកភូមិបឹងកក់ ដែលរងផលប៉ះពាល់ពីការបណ្ដេញចេញដោយបង្ខំ នឹងត្រូវបាត់សំឡេងតវ៉ាពីការរំលោភ និងជិះជាន់ពីអ្នកមានលុយ និងមានអំណាច៖ «ជាពិសេស គឺវិទ្យុអាស៊ីសេរី ហ្នឹង គឺជាវិទ្យុឯករាជ និងផ្ដល់ព័ត៌មានដែលពិតៗ និងយុត្តិធម៌»។

អ្នកស្រីបន្តថា ក្រុមអ្នកភូមិ និងសហគមន៍ដែលរងផលប៉ះពាល់ពីការបណ្ដេញចេញ មានគម្រោងជួបប្រជុំគ្នា ដើម្បីធ្វើការតវ៉ា និងដង្ហែញត្តិទៅមុខក្រសួងព័ត៌មាន ដើម្បីសុំឲ្យក្រសួងបើកការផ្សាយបន្តវិទ្យុអន្តរជាតិ ដូចជាវិទ្យុសំឡេងសហរដ្ឋអាមេរិក និងវិទ្យុអាស៊ីសេរី ឡើងវិញ។

ស្រដៀងគ្នានេះដែរ តំណាងសហគមន៍បុរីកីឡា អ្នកស្រី ឆាយ គឹមហ៊ន មានប្រសាសន៍ថា ប្រសិនបើក្រសួងបិទការផ្សាយបន្ត គួរណាស់តែបិទវិទ្យុក្នុងស្រុកដែរ ព្រោះវិទ្យុក្នុងស្រុកភាគច្រើនមិនដែលបានផ្សាយពីទុក្ខលំបាក និងវិនាសខ្លោចផ្សារបស់ប្រជាពលរដ្ឋនោះទេ៖ «ដល់អីចឹង ប្រសិនបើអត់ពីពីរហ្នឹងទៀត ពួកខ្ញុំចប់ហើយ ដូចផ្ដាច់ជីវិតពួកខ្ញុំចោលហ្មង និយាយទៅណា៎អានេះចំពោះអ្នកដែលពួកខ្ញុំកំពុងតែរងគ្រោះកំពុងប្រឈមមុខណាបង»។

ក្រុមអាជីវករ អ្នករត់ម៉ូតូឌុប អ្នកលក់ដូង និងទឹកសុទ្ធនៅតាមដងផ្លូវនានាក្នុងរាជធានីភ្នំពេញ ស្នើសុំក្រសួងព័ត៌មាន និងរាជរដ្ឋាភិបាល អនុញ្ញាតឲ្យវិទ្យុអែហ្វអឹម ក្នុងស្រុកទាំងអស់បានផ្សាយបន្តនូវកម្មវិធីវិទ្យុអន្តរជាតិឯករាជ្យឡើងវិញជាបន្ទាន់៖ «សំណូមពរឲ្យរដ្ឋាភិបាលហ្នឹង បើកវិទ្យុអាស៊ីសេរី វិទ្យុវីអូអេ (VOA) ហ្នឹង ឡើងវិញ កុំធ្វើបាបប្រជាជនអួតខ្លួនឯងថាខ្លួនប្រជាធិបតេយ្យ ហើយមកបិទសិទ្ធិប្រជាជនអីចឹង អត់ត្រឹមត្រូវទេ។ វាអាចមានផលប៉ះពាល់បានគេឲ្យផ្អាកផ្សាយបើអត់បញ្ហា គេមិនអាចឲ្យផ្អាកបានទេ យល់ឃើញថាអីចឹងណា៎។ យី! ចង់ឲ្យបើកស្អែកហ្នឹង ព្រោះមនុស្សត្រូវការស្ដាប់ព័ត៌មានដូចបាយទឹកយើងត្រូវហូបអីចឹង ដល់ម៉ោងឲ្យតែដល់ម៉ោងរត់ទៅ ខ្ញុំរត់ម៉ូតូឌុបក៏ដោយ តែដល់ម៉ោងខ្ញុំរត់ទៅស្ដាប់អាស៊ីសេរី ហើយ»។

ប្រជាពលរដ្ឋម្នាក់រស់នៅសង្កាត់ចោមចៅ រាជធានីភ្នំពេញ ឈ្មោះ ដេ ប៉ូ មានប្រសាសន៍ថា រូបលោក និងប្រជាពលរដ្ឋនៅក្នុងមូលដ្ឋានជាច្រើននាក់ មានការហួសចិត្តចំពោះក្រសួងព័ត៌មាន ដែលបានផ្អាកការផ្សាយបន្តកម្មវិធីវិទ្យុបរទេសជាខេមរភាសាតាមវិទ្យុអែហ្វអឹម ក្នុងស្រុកនេះ។ លោកបន្តថា ប្រជាពលរដ្ឋបាត់ឱកាសក្នុងការទទួលព័ត៌មាន និងរឿងរ៉ាវសំខាន់ៗដែលកើតឡើងក្នុងអំឡុងពេលយុទ្ធនាការឃោសនាបោះឆ្នោត៖ «ខ្ញុំជាប្រជាពលរដ្ឋមានសិទ្ធិគ្រប់គ្រាន់ក្នុងការទទួលព័ត៌មាន ខ្ញុំមានសម្បត្តិរដ្ឋធម្មនុញ្ញព្រះរាជាណាចក្រកម្ពុជា ដែរ ហេតុអីបានជាប្រជាពលរដ្ឋមិនអាចទទួលព័ត៌មានទាំងអស់នេះបាន ហើយសុខៗបែរទៅបិទវិទ្យុ»។

ក្រសួងព័ត៌មាន កាលពីល្ងាចថ្ងៃទី២៥ មិថុនា ឆ្នាំ២០១៣ បានចេញសេចក្ដីណែនាំមួយ ប៉ុន្តែលិខិតនោះបានផ្សព្វផ្សាយជាសាធារណៈនៅថ្ងៃទី២៨ មិថុនា ដោយបានណែនាំដល់ស្ថានីយវិទ្យុអែហ្វអឹម ក្នុងស្រុកទាំងអស់ត្រូវផ្អាកការផ្សាយបន្តកម្មវិធីវិទ្យុបរទេសជាខេមរភាសា ក្នុងអំឡុងពេលយុទ្ធនាការបោះឆ្នោតរយៈពេល ៣១ថ្ងៃ និងក្នុងថ្ងៃបោះឆ្នោត៕

___________________
ប្រភពព័ត៌មានពី៖ អាស៊ីសេរី

ជម្លោះដីធ្លី ពត័មានជាតិ សង្គម

ពលរដ្ឋមានជម្លោះដីសុំឲ្យនាយករដ្ឋមន្ត្រីជួយ

at 9:15 AM No comments:

ព្រះ សីហនុៈ ពលរដ្ឋក្រុងព្រះសីហនុជាង ១០០គ្រួសារ បានអង្វរប្រមុខរដ្ឋាភិបាលឲ្យជួយអន្តរាគមន៍ ករណីជម្លោះដីធ្លីដែលពួកគាត់បានចោទថា ត្រូវបានមន្ត្រីមានអំណាចឃុបឃិតគ្នាធ្វើប្លង់ដីនិងប្រើហិង្សា ឈូសឆាយបណ្តេញគាត់ចេញពីលំនៅឋាន។

លោក ឈុន សារឿនអាយុ ៥១ឆ្នាំ ជាតំណាងប្រជាពលរដ្ឋ ចំនួន១០៤គ្រួសារក្នុងភូមិ ៣ សង្កាត់លេខ១ បានធ្វើដំណើរមកកាន់ការិយាល័យកាសែតភ្នំពេញ ប៉ុស្តិ៍កាលពីម្សិលមិញហើយបានប្រគល់ឯកសារពាក់ព័ន្ធទំនាស់ដីធ្លី ចំនួន ៤៦ ទំព័រនិងរូបថត១៣៦សន្លឹក។ រូបថតទាំងនេះបានបង្ហាញពីសកម្មភាពឈូសឆាយ និងរុះរើលំនៅឋានរបស់ពលរដ្ឋកាលពីពេលកន្លងមក។ លោក សារឿន អះអាងថា ពលរដ្ឋបានរស់នៅលើផ្ទៃដីទំហំ ៥ហិកតា និង៣អា តាំងពីឆ្នាំ១៩៩៤ ដោយសុខសាន្ត។ ប៉ុន្តែនៅឆ្នាំ ២០០៥ ស្រាប់តែមានមន្ត្រីកំពង់ផែ និងមេបញ្ជាការរងយោធាខេត្តព្រះសីហនុ បានដាក់ពាក្យបណ្តឹងប្តឹងប្រជាពលរដ្ឋចោទថា បានចូលរស់នៅនិងកាន់កាប់ដោយខុសច្បាប់លើដីរបស់ពួកគេ។

តុលាការខេត្តនិងកំពូលបានកាត់ឲ្យប្រជាពលរដ្ឋចាញ់ដោយកំបាំងមុខ ដោយសំអាងលើប្លង់ដីដែលពួកគេបានធ្វើដោយស្ងាត់ៗ។ លោកបន្តថា៖«ពួកគេបានឃុបឃិតគ្នាលួចធ្វើប្លង់កម្មសិទ្ធិដោយមិន មានអាជ្ញាធរមូលដ្ឋានដឹងឮទេហើយបានយកកម្លាំងប្រហែល២០០នាក់និង គ្រឿងចក្រឈូសបំផ្លាញផ្ទះអស់គ្មានសល់»។បន្ទាប់ពីឈូសនិង បណ្តេញពលរដ្ឋចេញទាំងកម្រោលកាលពីឆ្នាំ ២០១១ នោះ ពួកគេបានធ្វើរបងព័ទ្ធដីនោះ ហើយសព្វថ្ងៃនេះមាននគរបាលមួយគ្រួសារបានរស់នៅយាមកាមលើដីនោះ។

ក្នុងនាមតំណាងប្រជាពលរដ្ឋទាំង១០៤គ្រួសារដែលកំពុងសុំដីនិង ផ្ទះគេជ្រកកោន លោកសារឿនបានអំពាវនាវសុំឲ្យប្រមុខរដ្ឋាភិបាលលោកហ៊ុន សែនជួយអន្តរាគមន៍បានរស់នៅនិងកាន់កាប់ដីនោះដូចដើមវិញ។

យោងតាមឯកសារដីទំនាស់នោះត្រូវបានជនជាតិសិង្ហបុរីម្នាក់ឈ្មោះ ទៀវ ប៊ីសេង ស្នាក់នៅបណ្តោះអាសន្នក្នុងខណ្ឌដូនពេញ រាជធានីភ្នំពេញ បានលក់ទៅឲ្យមន្រ្តីកំពង់ផែនៅក្នុងតម្លៃ១៧ម៉ឺនដុល្លារដោយមានការ ផ្ទេរប្លង់ដីកម្មសិទ្ធិផងដែរ។ ប៉ុន្តែពលរដ្ឋថា មិនមានអ្នកឈ្មោះប៊ីសេងនោះទេ។ វាគ្រាន់តែជាការប្រឌិតឈ្មោះប៉ុណ្ណោះហើយអាជ្ញាធរខណ្ឌដូនពេញក៏ បញ្ជាក់ក្នុងលិខិតថា មិនដែលឃើញឈ្មោះប៊ីសេងនោះដែរ។ ម្យ៉ាងទៀតមេភូមិ ៣ ក៏ថា មិនមានឈ្មោះ ប៊ីសេងកាន់កាប់ដីនោះដែរ។

លោកឈិត សុផាត ចៅសង្កាត់លេខ១ បានថ្លែងថា ពលរដ្ឋទាំងនេះរស់នៅលើដីឯកជនខុសច្បាប់ដែលមានប្លង់កម្មសិទ្ធិត្រឹមត្រូវ។

លោកបួន ណារិទ្ធិមន្រ្តីសម្របសម្រួលអង្គកាលីកាដូបានឲ្យដឹងថា តុលាការនិងអាជ្ញាធរបានអនុវត្តសាលក្រមបណ្តោះអាសន្នប្រើកម្លាំងទៅ រុះរើផ្ទះនិងបណ្តេញពលរដ្ឋចេញ។ ពលរដ្ឋមួយចំនួនទទួលបានសំណងខ្លះតែខ្លះទៀតមិនព្រមទទួលដោយសារ សំណងមិនសមរម្យ៕

ប្រភពពី ភ្នំពេញ ប៉ុស្តិ៍

all entries politic

គណបក្សនយោបាយធំៗ លើកលែងគណបក្សប្រជាជនកម្ពុជា សន្យាធ្វើឲ្យមានច្បាប់ស្តីពីសិទ្ធិទទួលបានព័ត៌មាន

at 4:13 AM No comments:

ភ្នំពេញ — នៅសល់តែ១ខែមុនការបោះឆ្នោត តំណាងគណបក្សនយោបាយធំៗ លើកលែងតែគណបក្សប្រជាជនកម្ពុជា បានសន្យាធានាឲ្យមានការអនុម័តច្បាប់ស្តីពីការទទួលបានព័ត៌មានដែលគេរង់ចាំជាយូរមកហើយនោះ ប្រសិនបើពួកគេឈ្នះការបោះឆ្នោតនាខែកក្កដាខាងមុខនេះ។

គណបក្សនយោបាយធំៗមួយចំនួនដែលកំពុងប្រកួតប្រជែងគ្នានៅក្នុងការបោះឆ្នោតជាតិនាខែកក្កដាខាងមុខនេះ បានប្តេជ្ញាចិត្តថា នឹងអនុម័តច្បាប់ស្តីពីការទទួលបានព័ត៌មានដែលគេរង់ចាំជាមួយមកហើយនោះ ប្រសិនបើពួកគេឈ្នះឆ្នោត។

លោកគី វណ្ណដារ៉ា គឺជាតំណាងមកពីគណបក្សសង្គ្រោះជាតិ។ លោកបានថ្លែងប្រាប់វីអូអេនៅឯវេទិកានយោបាយមួយដែលរៀបចំដោយអង្គការសង្គមស៊ីវិលកាលពីពេលថ្មីៗនេះនៅក្នុងរាជធានីភ្នំពេញ។

លោកនិយាយថា៖ «យើងតាំងចិត្តថានឹងធ្វើឲ្យចេញ បើយើងធ្វើមិនចេញទេ យើងនាំគ្នាឈប់ទៅ ព្រោះបើគ្រាន់តែច្បាប់ប៉ុណ្ណឹង យើងធ្វើមិនកើត តើយើងនៅដឹកនាំប្រទេសបានការអីទៀត? ដូច្នេះការតាំងចិត្តរបស់គណបក្សសង្គ្រោះជាតិគឺច្បាស់លាស់ណាស់ ព្រោះនេះជារឿងអាយុជីវិតរបស់ប្រជាពលរដ្ឋផង និងរបស់ជាតិយើងទាំងមូលផង»។

ច្បាប់ស្តីពីសិទ្ធិទទួលបានព័ត៌មាននេះនឹងអនុញ្ញាតឲ្យសាធារណជនអាចទទួលបានឯកសារនានាដែលទាក់ទងនឹងការសម្រេចចិត្ត និងសកម្មភាពរបស់រដ្ឋាភិបាល។ តាមរយៈច្បាប់នេះ សារព័ត៌មានក៏នឹងអាចធានាបានផងដែរថា កិច្ចការរបស់រដ្ឋាភិបាលនឹងត្រូវបានដឹងឮដល់មនុស្សគ្រប់គ្នា មិនមែនដឹងត្រឹមតែអ្នកដែលមានបុព្វសិទ្ធិតែប៉ុន្មាននាក់នោះទេ។ ប៉ុន្តែសេចក្តីព្រាងច្បាប់នេះបានជាប់គាំងតាំងពីឆ្នាំ២០០៧មកម៉្លេះ។

លោកទេព នន្ទរី គឺជាតំណាងមកពីគណបក្សហ៊្វុនស៊ិនប៉ិច។

លោកនិយាយថា៖ «ច្បាប់នេះគឺជាគន្លឺះរបស់ប្រជាពលរដ្ឋ។ បើហ៊្វុនស៊ិនប៉ិចឈ្នះ ហ្វ៊ុនស៊ិនប៉ិចនឹងជំរុញច្បាប់ស្តីពីសិទ្ធិទទួលបានព័ត៌មាននេះ ឲ្យចេញ។ បើគណបក្សយើងដោះស្រាយបញ្ហាហ្នឹងមិនចេញ អាណត្តិក្រោយឬក៏អាណត្តិហ្នឹងលាឈប់ក៏ល្អដែរ ព្រោះយើងធ្វើអីអត់ចេញសម្រាប់ប្រជារាស្ត្រ»។

គណបក្សប្រឆាំង សម រង្ស៊ី ធ្លាប់បានជំរុញឲ្យមានការពិភាក្សាច្បាប់នេះចំនួនពីរដងគឺនៅឆ្នាំ២០១០និងនៅឆ្នាំ២០១២ ប៉ុន្តែ ពង្រាងច្បាប់ដែលខ្លួនបានតាក់តែងឡើង ត្រូវបានបដិសេធដោយគ្មានការជជែកដេញដោលគ្នាទាំងពីរដង ដោយរដ្ឋសភាដែលគ្រប់គ្រងដោយគណបក្សប្រជាជានកម្ពុជាដែលកំពុងកាន់អំណាច។

លោកស្រី ម៉ែន សំអន គឺជាឧបនាយករដ្ឋមន្ត្រីម្នាក់ខាងគណបក្សប្រជាជនកម្ពុជានិងជារដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភានិងអធិការកិច្ច។ ក្រសួងនេះ ត្រូវបានរដ្ឋាភិបាលចាត់តាំងឲ្យធ្វើការងារទៅលើគោលនយោបាយស្តីពីសិទ្ធិទទួលបានព័ត៌មាននេះ។

លោកស្រី បានថ្លែងទៅកាន់សន្និសិទថ្នាក់ជាតិមួយស្តីពីសិទ្ធិទទួលបានព័ត៌មាននេះ។

អ្នកស្រីនិយាយថា៖ «បន្ទាប់ពីបានសិទ្ធិក្នុងការទទួលរៀបចំគោលនយោបាយនេះ ក្រសួងបានរៀបចំក្រុមការងារហើយបានចុះកិច្ចព្រមព្រៀងជាមូយអង្គការ PACT ដោយមានការគាំទ្រពីទីភ្នាក់ងារអភិវឌ្ឍអន្តរជាតិ សហរដ្ឋអាមេរិក USAID ដើម្បីបង្កើតរៀបចំគោលនយោបាយស្តីពីសិទ្ធិទទួលបានព័ត៌មាននេះ»។

ប៉ុន្តែ នៅពេលដែលត្រូវក្រុមអ្នកកាសែតសួរថាតើគណបក្សប្រជាជនកម្ពុជា នឹងធានាថានឹងអនុម័តច្បាប់ស្តីពីសិទ្ធិទទួលបានព័ត៌មាននេះដែរឬទេ នៅក្នុងអាណត្តិរដ្ឋាភិបាលថ្មី ប្រសិនបើគណបក្សនេះឈ្នះឆ្នោតនោះ លោកស្រី បានបដិសេធមិនឆ្លើយនឹងសំណួរនេះទេ។

អ្នកស្រីថ្លែងថា៖ «ទុកឲ្យជំនាញគេឆ្លើយចាស៎!»

ក្រុមអ្នករិះគន់និយាយថា ប្រសិនរដ្ឋាភិបាលដែលដឹកនាំដោយគណបក្សប្រជាជនកម្ពុជាចង់អនុម័តច្បាប់នេះ ពួកគេអាចធ្វើបានយ៉ាងស្រួល ដូចក្នុងករណីធ្វើច្បាប់ដែលទើបនឹងអនុម័តកាលពីថ្មីៗនេះប្រឆាំងជនណាដែលបដិសេធឧក្រិដ្ឋកម្មសម័យខ្មែរក្រហមជាដើម។ ច្បាប់ថ្មីនេះចំណាយពេលមិនដល់២សប្តាហ៍ផង ក្នុងការបង្កើតឡើងនោះ។

លោកព្រាប កុលគឺជានាយកប្រតិបត្តិនៃអង្គការតម្លាភាពកម្ពុជា។

លោកនិយាយថា៖ «ចំណុចនេះគឺជាចំណុចដែលយើងទាំងអស់គ្នាចោទជាសំណួរ។ មកពីគាត់មិនឲ្យអាទិភាពទៅលើច្បាប់ហ្នឹង ឬមួយក៏ច្បាប់ហ្នឹងវាអាចមានឥទ្ធិពលទៅលើការគ្រប់គ្រងរដ្ឋ ឬមួយយ៉ាងម៉ិច? អាហ្នឹង ខ្ញុំមិនទាន់ហ៊ានសន្និដ្ឋានជំនួសប្រជាពលរដ្ឋទេ»។

លោកឈិត សំអាតគឺជានាយកប្រតិបត្តិនៃអង្គការវេទិកានៃអង្គការមិនមែនរដ្ឋាភិបាលស្តីពីកម្ពុជា។ លោកមានប្រសាសន៍ថា ការសន្យារបស់គណបក្សនយោបាយថា នឹងធានាឲ្យមានច្បាប់ស្តីពីសិទ្ធិទទួលបានព័ត៌មាននេះ អាចមានឥទ្ធិពលដល់អ្នកបោះឆ្នោតខ្លះដែរ។

លោកនិយាយថា៖ «បើអ្នកដែលយល់ថា ច្បាប់ហ្នឹងមានសារៈសំខាន់ វាអាចប៉ះពាល់ដល់សំឡេងឆ្នោតរបស់គាត់ដែរ ព្រោះថា បើគណបក្សណាមួយដែលមិនប្តេជ្ញាចិត្តធ្វើអាហ្នឹងទេ គឺអាចប៉ះពាល់ដល់ការសម្រេចចិត្តរបស់អ្នកបោះឆ្នោតដល់គណបក្សនីមួយៗ»។

ក្រុមអ្នកវិភាគមួយចំនួនព្រមានថា ប្រសិនបើគណបក្សកាន់អំណាចបច្ចុប្បន្ននៅតែបន្តដឹកនាំរដ្ឋាភិបាលអាណត្តិថ្មី នោះច្បាប់ស្តីពីសិទ្ធិទទួលបានព័ត៌មាននៅតែមិនអាចលេចចេញជារូបរាងបានដដែល៕

ប្រភពពី វីអូអេខ្មែរ

Pages

New Design

Recent Post

គ.ជ.ប.ចេញបំភ្លឺស្តីពីការផ្អាកវិទ្យុមិនឲ្យផ្សាយបន្ត និងការហាមផ្សព្វផ្សាយលទ្ធផលនៃការបោះឆ្នោត

បណ្តាញសង្គមជាវេទិកាថ្មីនៃការឃោសនារកសំឡេងឆ្នោត

ជនជាតិវៀតណាមសម្រុកចូលមកកម្ពុជា

តំណាងរាស្ត្របក្សសង្គ្រោះជាតិចោទបក្សប្រជាជនថាជាដើមហេតុបង្កហិង្សា

អ្នកបឹងកក់ស្នើក្រសួងព័ត៌មានពិនិត្យការផ្សាយរបស់ទូរទស្សន៍ឯកជនមួយចំនួន

ពលរដ្ឋបឹងកក់ស្នើក្រសួងព័ត៌មានរឿងបណ្តាញទូរទស្សន៍ផ្សាយញុះញង់

លោក សយ សុភាព ពិតជាកោរសក់មែនឬ?

និស្សិតត្រូវសាលាផ្តល់ប្រាក់ឲ្យមកជួយឃោសនាឲ្យ CPP

ប៉ូលិសព្រំដែនខេត្តរតនគិរីរងការចោទថាឲ្យពលរដ្ឋវៀតណាមស្នាក់នៅតំបន់ស

និស្សិតមួយចំនួន បញ្ចេញទស្សនៈលើការទាមទារកោះត្រល់មកវិញ

តុលាការកោះហៅលោក សួង សុភ័ណ្ឌ ទាក់ទងរឿងប្ដឹងលោក ហ៊ុន សែន

កម្ពុជាលុបចោលបម្រាមការផ្សាយមុនពេលបោះឆ្នោតជាតិ

អ្នកបឹងកក់៖ ក្រសួងព័ត៌មានបំបិទសិទ្ធិនិងសំឡេងអ្នករងគ្រោះ

ពលរដ្ឋមានជម្លោះដីសុំឲ្យនាយករដ្ឋមន្ត្រីជួយ

គណបក្សនយោបាយធំៗ លើកលែងគណបក្សប្រជាជនកម្ពុជា សន្យាធ្វើឲ្យមានច្បាប់ស្តីពីសិទ្ធិទទួលបានព័ត៌មាន

Send Quick Massage